Şartty türde bostandyqta jürgen qandyqol qylmysker üş äieldı zorlap, öltırıp tastaǧan. Būl turaly «Nemolchi.kz» qozǧalysynyŋ basşysy Dina Taŋsärı jazdy, dep habarlaidy «Adyrna» ūlttyq portaly Stan.kz aqparat agenttıgıne sılteme jasap.
Dina Taŋsärı qūzırettı organdardyŋ mūndai qylmyskerdı bostandyqqa jıberuın qatelık dep sanaitynyn aitty.
«Rustam Kiknadze 1980 jyly ömırge kelgen, Jambyl oblysynyŋ tumasy. Ol 2004 jyly Jambyl oblystyq sotynyŋ şeşımımen bas bostandyǧynan aiyrylǧan. Sot ony qylmystyq kodekstıŋ 96 baby 2-tarmaǧy boiynşa 16 jylǧa sottaǧan», – dep jazdy ol.Oǧan qosa, Kiknadze zorlau baby boiynşa da aiyptalǧan. Bıraq būl bap boiynşa ol aqtalyp, jazasyn öteu merzımı 14 jylǧa deiın qysqardy.
«Jambyl oblysy Baizaq audandyq sotynyŋ 2013 jylǧy 18 şıldedegı qaulysymen Qazaqstan Respublikasynyŋ Qylmystyq kodeksınıŋ 70-babyna säikes Kiknadze 2013 jyldyŋ 15 tamyzynda şartty türde merzımınen būryn bosatylǧan. Ol äieldı qatıgezdıkpen öltırıp, denesın örtep jıbergenı üşın jazasyn ötep, şartty türde bosap şyqqanan keiın, serebraldy sal auruy bar qyzdy zorlap, dosyn da qyzdy zorlauǧa mäjbürlegen. Oǧan qosa, Kiknadze qorǧansyz qyzdy soqqynyŋ astyna alady», – deidı Taŋsärı.«Qaraǧandy oblysy Sätbaev qalalyq sotynyŋ 2014 jylǧy 9 säuırdegı ükımımen Kiknadzege Qazaqstan Respublikasy Qylmystyq Kodeksınıŋ 120-bölıgı 2-bölıgınıŋ «b» tarmaǧymen 7 jyl 6 aiǧa bas bostandyǧynan aiyru jazasy taǧaiyndaldy, jiyntyq ükımder boiynşa ötelmegen merzım ışınara qosyldy, aqyr soŋynda jazany öteu üşın arnaiy rejimdegı tüzeu koloniiasynda 8 jylǧa bas bostandyǧynan aiyru jazasy taǧaiyndaldy. Artynşa 2020 jyly Qaraǧandy oblysy Abai audanynyŋ sot būiryǧymen şartty türde merzımınen būryn bosatylǧan. Şartty türde bosap şyqqan qandyqol qylmysker, bostandyqqa şyqqanan keiın taǧy da bırneşe qylmystar jasaǧan», – deidı Dina Taŋsärı. Kiknadze 2020 jyldyŋ 22 qazanynda taǧy bır äielge şabuyldap, zorlyq-zombylyq körsetıp, onyŋ ämiiany men aqşasyn tartyp alǧan. Al 27 qazanda Liudmilanyŋ jienın zorlap, öltırıp tastaǧan. Kelınşek ädıldık ızdep «Nemolchi.kz» qoryna jügınedı.
«Būl äreketterge polisiianyŋ nemqūraily qaraǧany sonşalyq, eger Liudmila dabyl qaǧyp, qylmyskerdı jazalauǧa tyryspasa, baspasözde aqparat taramasa, bızdıŋ qor atsalyspasa, būl qylmys turaly eşkım de bılmes edı. Bız Natalianyŋ ısıne qatysty eşqandai äreket bolmaǧanyna taŋ qaldyq. Marqūmnyŋ tuystarynyŋ aituy boiynşa, bırınşı moiyndau aiǧaqtarynda Kiknadze özınıŋ sybailasy bolǧanyn, ol Natalianyŋ süiıktısı bolǧanyn jäne ol kısı öltırgennen keiın eden juyp, qylmystyŋ ızderın jasyruǧa tyrysqanyn, sodan keiın barlyq kınänı öz moinyna alǧanyn körsetken. Bıraq qyzdyŋ tuystary qylmysqa qatysy bar ekı adam da jazasyz qalady dep qorqyp, bızge jügındı. Bız dereu Jambyl oblysynyŋ polisiiasyna jügındık jäne Liudmilaǧa habarlamasyn jetkızdık», – deidı Dina Taŋsärı.4 qaraşa künı qyz özınıŋ jeke päterınde ölı küiınde tabylǧan. Körşılerı dälızden ölıktıŋ isı şyǧa bastaǧanda tötenşe jaǧdailar qyzmetın şaqyryp, esıktı būzdyrǧan.
«Üidıŋ ışınde qyzdıŋ denesı jalaŋaş küiınde jatqan. Tıptı ış kiımderı şeşılgen bolyp şyqty. Tıntu jūmystary kezınde päterdıŋ kıltı bolmaǧan, qyzdy bıreu syrtynan jauyp ketkenı anyqtaldy. Oǧan qosa päterdegı tösek jabdyqtary da bolmai şyqty. Soǧan qaraǧanda qylmysker qyzdy zorlap, artynşa öltırgenın jasyrmaq bolǧan. Jäne päterden Natalianyŋ ūialy telefony da tabylmady. Polisiia bastapqyda qyz özı qatty ışıp, maskünemdıkke salynu nätijesınde köz jūmǧan degen boljam jasaǧan. Bırden oqiǧany adam öltıru jaǧdaiy retınde tırkemegen. Nätijesınde Nataliadan keiın taǧy da ekı äiel däl osy qandyqol qylmyskerdıŋ qolynan köz jūmdy», – dep tüsındırdı Dina Taŋsärı.Kiknadze 29 qazan künı keşke ol er adamdy tonap ketedı. 16 qaraşada 77 jastaǧy zeinetkerdıŋ közınşe 1978 jyly tuǧan äieldı zorlap, sodan keiın ekeuın de öltırgen. Qazaqstan Respublikasynyŋ prokurory men auyr qylmys ısterı jönındegı soty Kiknadzenı ömır boiyna bas bostandyǧynan aiyrudy sūrady, bıraq sot 25 jylǧa bas bostandyǧynan aiyruǧa şeşım şyǧardy. Ötelmegen uaqyty üşın taǧy bır jyl berdı. Alaida Dina Taŋsärı mūndai şeşımmen kelıspeitının aitty.
«Kiknadze ömırbaqiǧa bas bostandyǧynan aiyryluy kerek. Qazaqstanda äielder men qyzdardyŋ ömırı tükke tūrǧysyz, bızdıŋ elde zorlauşylar parlamentke baryp, balalardyŋ qūqyqtary turaly zaŋ qabyldaidy. Bızdıŋ polisiia qyzmetkerın öltırgenı üşın ömır boiyna bas bostandyǧynan aiyrady da, äiel adamdarǧa mūndai qorlyq körsetkenderdı merzımınen būryn bosatady. Būl äielderge qatysty genderlık diskriminasiia, bız ükımmen kelıspeimız jäne şartty türde merzımınen būryn bosatu qūqyǧynsyz ömır baqiǧa bas bostandyǧynan aiyrudy sūraimyz», – deidı Dina Taŋsärı.
"Adyrna" ūlttyq portaly
