اقتوبە وبلىستىق پوليتسيا دەپارتامەنتىنىڭ مۇراعاتىندا قۋعىن-سۇرگىنگە ۇشىراعان تۇلعالارعا، گەرمانيادان ورالعان جانە اسكەري تۇتقىندارعا، بۇرىنعى كەڭەستىك سوتسياليستىك رەسپۋبليكالار وداعى ازاماتتارىنا ارنالعان قۇجاتتار ساقتالۋدا دەپ حابارلايدى "ادىرنا" ۇلتتىق پورتالىنىڭ ءتىلشىسى.
بۇگىندە اتالعان مۇراعاتتا 13 مىڭنان استام قۇجات بار. اتاپ ايتساق، مۇندا "اقتالۋعا جاتپايتىن تۇلعالاردىڭ مۇراعاتتىق قىلمىستىق ىستەرى" بويىنشا - 617, "قۋعىن - سۇرگىنگە ۇشىراعان، سوت ورگاندارىمەن اقتالعان ازاماتتارعا قاتىستى مۇراعاتتىق قىلمىستىق ىستەر" بويىنشا - 9936 جانە "بۇرىنعى اسكەري تۇتقىندار مەن گەرمانيادان ورالعان بۇرىنعى كسرو ازاماتتارىنىڭ ماتەريالدارى" بويىنشا 2520 قۇجات ساقتالعان.
بيىل دەپارتامەنتتىڭ ارنايى مەملەكەتتىك مۇراعاتىنا قۋعىن-سۇرگىنگە ۇشىراعان تۇلعالاردىڭ تۋىستارىنان 76 ءوتىنىش پەن سۇراۋ تۇسكەن. ونىڭ بارلىعىنا وڭ جاۋاپ بەرىلگەن.
سونداي-اق تۇرعىندارعا 7 مۇراعاتتىق انىقتاما جانە 150 مۇراعاتتىق قۇجاتتىڭ كوشىرمەسى بەرىلىپتى. ونىڭ ىشىندە جاقىن جانە الىس شەتەلدەردەن جەكە جانە زاڭدى تۇلعالاردان 7 ءوتىنىش ءتۇستى، ونىڭ ىشىندە بەسەۋى —تمد ەلدەرىنەن.
مەملەكەتتىك قىزمەت كورسەتۋ شەڭبەرىندە اقتوبە وبلىستىق پوليتسيا دەپارتامەنتى ارنايى مەملەكەتتىك مۇراعاتى قۋعىن-سۇرگىنگە ۇشىراعان ادامداردىڭ مۇراعاتتىق انىقتامالارىن، قۇجاتتاردىڭ كوشىرمەلەرىن، قۇجاتتاردان ۇزىندىلەردى، سونداي-اق ولاردىڭ تۇپنۇسقا جەكە قۇجاتتارىن نە ولاردىڭ كوشىرمەلەرىن ءوتىنىش بەرۋشىلەرگە نەمەسە ولاردىڭ سەنىم بىلدىرىلگەن تۇلعالارىنا (سەنىم بىلدىرىلگەن ادامداردىڭ جەكە باسىن كۋالاندىراتىن قۇجاتتاردى، سونداي-اق نوتاريات كۋالاندىرعان سەنىمحاتتى ۇسىنعاننان كەيىن) بەرەدى. مۇراعاتتىق قىلمىستىق ىستەرمەن تانىسقان ادامداردان مىندەتتى تۇردە تانىستىرىلعانى جانە ىسكە قاتىسى بار ادامدار مەن ولاردىڭ جاقىندارىنىڭ قۇقىقتارى مەن زاڭدى مۇددەلەرىنە نۇقسان كەلتىرەتىن مالىمەتتەردى پايدالانۋعا تىيىم سالىنعانى تۋرالى قولحات الىنادى.
قۋعىن-سۇرگىنگە ۇشىراعان ادامداردى اتۋ جانە جەرلەۋ ورنى تۋرالى مالىمەتتەر مۇراعاتتىق قىلمىستىق ىستە جوق. الايدا 20-50 جىلدارى قۋعىن-سۇرگىنگە ۇشىراعان ازاماتتاردى جاپپاي جەرلەۋدىڭ رەسمي ورنى اقتوبە وبلىسىنىڭ اۋماعىندا رودنيكوۆكا اۋىلىنان ورسك تراسساسى بويىنشا 21 كم جەردە ورنالاسقان "تۇيە تاۋى" ("تۇيە توبە") شىڭىنىڭ ەتەگى بولىپ سانالادى.
ەكى جىل بۇرىن رەسەي فەدەراتسياسىنىڭ 28 جاستاعى تۇرعىنى رومان زاۆادوۆسكي وتباسىلىق اعاش جاساعىسى كەلىپتى. الايدا ول ءوزىنىڭ ۇلكەن اتاسى يۆان زاۆادوۆسكي تۋرالى ەشقانداي اقپارات تابا الماعان. كەيىن رومان "مەموريال" سايتىندا ىزدەۋدى باستاعان. بيىل 23 قاڭتاردا ول نوۆوسيبيرسكىدەن اقتوبە وبلىسىنىڭ پوليتسيا دەپارتامەنتىنە كەلىپ، وعان مۇراعات قۇجاتتارىن، اتاسىنىڭ فوتوسۋرەتتەرى بەرىلدى. مۇراعاتتا يۆان زاۆادوۆسكيدىڭ 20 فوتوسۋرەتى بار، ولاردىڭ ساپاسى شوبەرەنى تاڭ قالدىردى. بەلگىلى بولعانداي، 1989 جىلى كسرو جوعارعى كەڭەسىنىڭ جارلىعىمەن زاۆادوۆسكي يۆان ۆلاديميروۆيچ قايتىس بولعاننان كەيىن اقتالعان.
ايتا كەتۋ كەرەك، بۇل اقپاراتتار مىڭداعان ادامدارعا تۋىستارىنىڭ تاعدىرى تۋرالى اقپارات تابۋ ءۇشىن قاجەت. سوندىقتان قانداي دا ءبىر اقپارات قاجەت بولسا، اقتوبە وبلىستىق پوليتسيا دەپارتامەنتىنە حابارلاسۋلارىڭىزعا بولادى.
"ادىرنا" ۇلتتىق پورتالى.
