سەنات توراعاسى ماۋلەن اشىمباەۆ 31-مامىر ساياسي قۋعىن-سۇرگىن جانە اشارشىلىق قۇرباندارىن ەسكە الۋ كۇنىنە وراي ءوزىنىڭ فەيسبۋك پاراقشاسىندا ارنايى جازبا قالدىردى. جازبادا ماۋلەن اشىمباەۆ قازاقتىڭ باستان كەشكەن قيىندىقتارىنا توقتالا كەلە، ەلىمىزگە جارقىن بولاشاق تىلەگەن.
"بۇگىن – تاريحىمىزداعى ەڭ قاسىرەتتى كەزەڭدەردىڭ ءبىرى ساياسي قۋعىن-سۇرگىن جانە اشارشىلىق قۇرباندارىن ەسكە الۋ كۇنى. وسى كۇنى ۇلتىمىزدىڭ بولاشاعى ءۇشىن باس كوتەرگەندەر مەن كۇشتەپ ۇجىمداستىرۋدىڭ سالدارىنان زارداپ شەككەندەردىڭ رۋحتارىنا تاعزىم ەتۋ – ءبىزدىڭ پەرزەنتتىك بورىشىمىز.
سول ءبىر زوبالاڭ جىلدار قازاقتىڭ ءوسىپ-وركەندەۋىنە وتە اۋىر سوققى بولىپ ءتيدى. ەلدىڭ ەرتەڭىنە الاڭداعان زيالىلارىمىز بەن قايراتكەرلەرىمىز قۋعىن-سۇرگىنگە ۇشىراپ، جازىقسىز جاپا شەكتى. ەركىندىككە ۇمتىلعان الاش ارىستارى دا توتاليتارلىق جۇيەنىڭ قۇرساۋىنان قۇتىلا المادى.
عاسىرلار بويى قالىپتاسقان ءداستۇرلى تۇرمىسىمىز ەش نەگىزسىز وزگەرتىلىپ، ۇلتىمىز الاپات ناۋبەتتى باستان وتكەردى. اشتىقتىڭ سالدارىنان حالقىمىزدىڭ جارتىسىنا جۋىعىنان ايىرىلدىق. تاعى كوپ بولىگى تۋعان جەرىن تاستاپ كەتۋگە ءماجبۇر بولدى.
ءبىز تاريحىمىزعا تاڭبا بولىپ باسىلعان مۇنداي قايعىلى كەزەڭدەردى ەشقاشان ۇمىتپاۋىمىز كەرەك. بۇل باعىتتا ەلباسىمىز نۇرسۇلتان ءابىشۇلى نازارباەۆتىڭ ساياساتى اياسىندا كوپتەگەن باستاما ىسكە اسىرىلدى. ارنايى ەسكە الۋ كۇنى بەلگىلەنىپ، مونۋمەنتتەر اشىلدى. قازاق حالقىنا العىس ايتۋ كۇنى دە وسى «تار جول، تايعاق كەشۋلەرمەن» تىكەلەي بايلانىستى ەكەنى انىق.قازىرگى تاڭدا مەملەكەت باسشىسى قاسىم-جومارت كەمەلۇلى توقاەۆتىڭ باستاماسىمەن ساياسي قۋعىن-سۇرگىن قۇرباندارىن تولىق اقتاۋ جۇمىستارى قولعا الىندى. سونداي-اق، پرەزيدەنتىمىز اشارشىلىق تاقىرىبىن كەڭىنەن زەرتتەۋدى تاپسىردى. سونىڭ اياسىندا جۇرگىزىلگەن العاشقى زەرتتەۋلەر ءوز ناتيجەسىن بەرە باستاعانىن بىلەمىز.
الداعى ۋاقىتتا ۇلتتىق سانامىزدى جاڭعىرتىپ، تاريحىمىزدى تانۋعا جول اشاتىن وسىنداي جۇمىستار جالعاسا بەرەدى. بۇگىنگى ەسكە الۋ كۇنىندە ۇلت مۇراتى جولىندا ءومىرىن قيعان جانە اشارشىلىقتىڭ قۇربانى بولعان جانداردىڭ جاتقان جەرلەرى جارىق بولسىن دەپ تىلەيمىز. ەندى ەشقاشان مۇنداي قايعىلى وقيعالار قايتالانباسىن.
تاۋەلسىز قازاق ەلى ماڭگى جاساي بەرسىن!" دەگەن جازبا قالدىرعان.
"ادىرنا" ۇلتتىق پورتالى
