Senat tóraǵasy Máýlen Áshimbaev 31-mamyr Saıası qýǵyn-súrgin jáne asharshylyq qurbandaryn eske alý kúnine oraı óziniń Feısbýk paraqshasynda arnaıy jazba qaldyrdy. Jazbada Máýlen Áshimbaev qazaqtyń bastan keshken qıyndyqtaryna toqtala kele, elimizge jarqyn bolashaq tilegen.
"Búgin – tarıhymyzdaǵy eń qasiretti kezeńderdiń biri Saıası qýǵyn-súrgin jáne asharshylyq qurbandaryn eske alý kúni. Osy kúni ultymyzdyń bolashaǵy úshin bas kótergender men kúshtep ujymdastyrýdyń saldarynan zardap shekkenderdiń rýhtaryna taǵzym etý – bizdiń perzenttik boryshymyz.
Sol bir zobalań jyldar qazaqtyń ósip-órkendeýine óte aýyr soqqy bolyp tıdi. Eldiń erteńine alańdaǵan zııalylarymyz ben qaıratkerlerimiz qýǵyn-súrginge ushyrap, jazyqsyz japa shekti. Erkindikke umtylǵan Alash arystary da totalıtarlyq júıeniń qursaýynan qutyla almady.
Ǵasyrlar boıy qalyptasqan dástúrli turmysymyz esh negizsiz ózgertilip, ultymyz alapat náýbetti bastan ótkerdi. Ashtyqtyń saldarynan halqymyzdyń jartysyna jýyǵynan aıyryldyq. Taǵy kóp bóligi týǵan jerin tastap ketýge májbúr boldy.
Biz tarıhymyzǵa tańba bolyp basylǵan mundaı qaıǵyly kezeńderdi eshqashan umytpaýymyz kerek. Bul baǵytta Elbasymyz Nursultan Ábishuly Nazarbaevtyń saıasaty aıasynda kóptegen bastama iske asyryldy. Arnaıy eske alý kúni belgilenip, monýmentter ashyldy. Qazaq halqyna alǵys aıtý kúni de osy «tar jol, taıǵaq keshýlermen» tikeleı baılanysty ekeni anyq.Qazirgi tańda Memleket basshysy Qasym-Jomart Kemeluly Toqaevtyń bastamasymen saıası qýǵyn-súrgin qurbandaryn tolyq aqtaý jumystary qolǵa alyndy. Sondaı-aq, Prezıdentimiz asharshylyq taqyrybyn keńinen zertteýdi tapsyrdy. Sonyń aıasynda júrgizilgen alǵashqy zertteýler óz nátıjesin bere bastaǵanyn bilemiz.
Aldaǵy ýaqytta ulttyq sanamyzdy jańǵyrtyp, tarıhymyzdy tanýǵa jol ashatyn osyndaı jumystar jalǵasa beredi. Búgingi eske alý kúninde ult muraty jolynda ómirin qıǵan jáne asharshylyqtyń qurbany bolǵan jandardyń jatqan jerleri jaryq bolsyn dep tileımiz. Endi eshqashan mundaı qaıǵyly oqıǵalar qaıtalanbasyn.
Táýelsiz Qazaq eli máńgi jasaı bersin!" degen jazba qaldyrǵan.
"Adyrna" ulttyq portaly
