مەملەكەت باسشىسى قاسىم-جومارت توقاەۆ ساياسي قۋعىن-سۇرگىن جانە اشارشىلىق قۇرباندارىن ەسكە الۋ كۇنىنە بايلانىستى ۇندەۋ جاسادى، دەپ حابارلايدى «ادىرنا» ءتىلشىسى اقورداعا سىلتەمە جاساپ.
«قۇرمەتتى وتانداستار!
بۇگىن، 31 مامىر – ەل تاريحىنداعى ەڭ ازالى كەزەڭنىڭ ءبىرىن ەسكە الۋ كۇنى.
وتكەن عاسىردىڭ العاشقى جارتىسىنداعى ساياسي قۋعىن-سۇرگىن كەڭەس وداعى داۋىرىندەگى ميلليونداعان ازاماتتىڭ تاعدىرىنا تاڭبا سالدى. قازاقستاندا ءجۇز مىڭنان استام ادام جازىقسىز سوتتالىپ، ونىڭ تورتتەن ءبىرى ءولىم جازاسىنا كەسىلدى.
ەلىمىزدىڭ اۋماعىندا ون ءبىر ەڭبەكپەن تۇزەۋ لاگەرى بولدى. قازاقستان رەسپۋبليكاسىنىڭ تۇڭعىش پرەزيدەنتى نۇرسۇلتان نازارباەۆتىڭ باستاماسىمەن قاسىرەت مەكەنى كارلاگ پەن الجير-دە توتاليتارلىق جۇيەنىڭ شەكسىز قاتىگەزدىگىن ۇنەمى ەسكە سالىپ تۇراتىن تاريحي مەموريالدى كەشەندەر اشىلدى.
زۇلمات زاماندا تۇتاس حالىقتار قۋدالاۋعا ءتۇستى. تۋعان جەرىنەن زورلىقپەن كوشىرىلگەن بەس ميلليونعا جۋىق ادام قاسيەتتى قازاق جەرىنەن پانا تاپتى. قازاقستان ولاردىڭ قۇتتى مەكەنىنە اينالدى.
ۇلتىمىز الاپات اشتىقتىڭ زاردابىن تارتىپ، ورنى تولماس شىعىنعا ۇشىرادى. شەكتەن شىققان ۇجىمداستىرۋ ناۋقانى ۇلى دالانى بۇرىن-سوڭدى بولماعان اۋقىمدى گۋمانيتارلىق اپاتقا ۇرىندىردى.
حالقىمىز نەبىر زوبالاڭدى كورسە دە رۋحىن الاسارتقان جوق. بىرلىگىن بەكەمدەپ، ىنتىماعىن ارتتىرا ءتۇستى.
تاۋەلسىزدىك تاڭى اتقاننان كەيىن ءبىز ارىستارىمىزدى اقتاۋعا كىرىستىك. كەزىندە جازىقسىز جازالانعان مىڭداعان ازاماتتىڭ ەسىمىن ەل جادىندا جاڭعىرتتىق.
بىلتىر قۋعىن-سۇرگىن قۇرباندارىن تولىق اقتاۋ ءۇشىن مەملەكەتتىك كوميسسيا قۇرىلدى. كوميسسيا سولاقاي ساياساتتان جاپا شەككەن قازاقستاندىقتارعا قاتىستى تاريحي ادىلدىكتى قالپىنا كەلتىرۋگە ءتيىس. بۇل – مەملەكەتتىڭ عانا مىندەتى ەمەس، بۇكىل قوعامنىڭ پارىزى.
ءتول شەجىرەمىزدەگى قايعىلى كەزەڭدەردى ۇلتتىق بىرەگەيلىگىمىزدەن بولە-جارا قاراۋ مۇمكىن ەمەس. سوندىقتان، ءبىز ساياسي قۋعىن-سۇرگىن جانە اشارشىلىق قۇرباندارىنىڭ رۋحىنا تاعزىم ەتىپ، ەسىمدەرىن ماڭگى ەستە ساقتايمىز.
تاريحتان تاعىلىم الىپ، مۇنداي تاۋقىمەت ەشقاشان قايتالانباۋى ءۇشىن ءبارىن جاسايتىن بولامىز»،—دەدى پرەزيدەنت.
«ادىرنا» ۇلتتىق پورتالى
