Memleket basshysy Qasym-Jomart Toqaev Saıası qýǵyn-súrgin jáne asharshylyq qurbandaryn eske alý kúnine baılanysty úndeý jasady, dep habarlaıdy «Adyrna» tilshisi Aqordaǵa silteme jasap.
«Qurmetti otandastar!
Búgin, 31 mamyr – el tarıhyndaǵy eń azaly kezeńniń birin eske alý kúni.
Ótken ǵasyrdyń alǵashqy jartysyndaǵy saıası qýǵyn-súrgin Keńes Odaǵy dáýirindegi mıllıondaǵan azamattyń taǵdyryna tańba saldy. Qazaqstanda júz myńnan astam adam jazyqsyz sottalyp, onyń tórtten biri ólim jazasyna kesildi.
Elimizdiń aýmaǵynda on bir eńbekpen túzeý lageri boldy. Qazaqstan Respýblıkasynyń Tuńǵysh Prezıdenti Nursultan Nazarbaevtyń bastamasymen qasiret mekeni KARLAG pen ALJIR-de totalıtarlyq júıeniń sheksiz qatigezdigin únemi eske salyp turatyn tarıhı memorıaldy keshender ashyldy.
Zulmat zamanda tutas halyqtar qýdalaýǵa tústi. Týǵan jerinen zorlyqpen kóshirilgen bes mıllıonǵa jýyq adam qasıetti qazaq jerinen pana tapty. Qazaqstan olardyń qutty mekenine aınaldy.
Ultymyz alapat ashtyqtyń zardabyn tartyp, orny tolmas shyǵynǵa ushyrady. Shekten shyqqan ujymdastyrý naýqany Uly dalany buryn-sońdy bolmaǵan aýqymdy gýmanıtarlyq apatqa uryndyrdy.
Halqymyz nebir zobalańdy kórse de rýhyn alasartqan joq. Birligin bekemdep, yntymaǵyn arttyra tústi.
Táýelsizdik tańy atqannan keıin biz arystarymyzdy aqtaýǵa kiristik. Kezinde jazyqsyz jazalanǵan myńdaǵan azamattyń esimin el jadynda jańǵyrttyq.
Byltyr qýǵyn-súrgin qurbandaryn tolyq aqtaý úshin Memlekettik komıssııa quryldy. Komıssııa solaqaı saıasattan japa shekken qazaqstandyqtarǵa qatysty tarıhı ádildikti qalpyna keltirýge tıis. Bul – memlekettiń ǵana mindeti emes, búkil qoǵamnyń paryzy.
Tól shejiremizdegi qaıǵyly kezeńderdi ulttyq biregeıligimizden bóle-jara qaraý múmkin emes. Sondyqtan, biz saıası qýǵyn-súrgin jáne asharshylyq qurbandarynyń rýhyna taǵzym etip, esimderin máńgi este saqtaımyz.
Tarıhtan taǵylym alyp, mundaı taýqymet eshqashan qaıtalanbaýy úshin bárin jasaıtyn bolamyz»,—dedi Prezıdent.
«Adyrna» ulttyq portaly
