قوستانايدا ءبىر جارىم جاسار ءسابي ءۇيدىڭ اۋلاسىنداعى قۇدىققا قۇلاپ قازا بولدى، دەپ حابارلايدى «ادىرنا» ۇلتتىق پورتالى.
قارالى وقيعا 24 مامىردا فەدوروۆ اۋدانىنىڭ كوسترياكوۆ اۋىلىندا بولعان. وبلىستىق پوليتسيا دەپارتامەنتى ءسابيدى اكەسىنىڭ تاۋىپ العانىن حابارلادى. الايدا ونى قۇتقارىپ قالۋ مۇمكىن بولماپتى.
«اتالعان فاكت ادام ءولىمى رەتىندە قاراستىرىلىپ، قىلمىستىق قۇرام بەلگىلەرى بويىنشا تىركەۋگە الىندى»، - دەلىنگەن حابارلامادا.
ساراپتاما تاعايىندالىپ، وقيعانىڭ ءمان-جايى انىقتالۋدا.
«وتباسى تولىق، ەسەپكە تۇرماعان، بۇرىن-سوڭدى اكىمشىلىك نەمەسە قىلمىستىق جاۋاپقا تارتىلماعان. قايعىلى وقيعا بولعان كەزدە ءسابيدىڭ اتا-اناسى ءۇي شارۋالارىمەن اينالىسىپ جۇرگەن»، - دەيدى پوليتسيا دەپارتامەنتىنىڭ وكىلدەرى.
"ادىرنا" ۇلتتىق پورتالى
