قازاقستاندىقتاردىڭ ايلىعى 300 مىڭ تەڭگەدەن اساتىن بولادى

6003
Adyrna.kz Telegram

قازاقستاندىقتاردىڭ ورتاشا ايلىعى 5 جىلدان كەيىن 300 مىڭ تەڭگەدەن اسادى. بۇل بولجامدى ۇلتتىق ەكونوميكا مينيسترلىگى مالىمدەدى، دەپ حابارلايدى «ادىرنا» ۇلتتىق پورتالى.

جوسپارعا سايكەس، بيىلعى ورتاشا ايلىق جالاقى 225,5 مىڭ تەڭگە بولسا، 2026 جىلعا قاراي ول 313 مىڭ تەنگە دەيىن كوتەرىلەدى.

سونىمەن قاتار جۇمىس كۇشىنىڭ سانى 2021 جىلعى 9,3 ملن ادامنان 2026 جىلى 9,8 ملن ادامعا دەيىن وسەدى (بارلىعى 19,9 ملن ادام بولادى). ونىڭ ىشىندە بەس جىلدان كەيىن 9,3 ملن ادام جۇمىسپەن قامتىلادى.

ال جۇمىسسىز ادامدار سانى 455,7 مىڭ ادامنان 459,7 مىڭ ادامعا دەيىن ارتادى. بۇل جۇمىسسىزدىقتىڭ جالپى دەڭگەيى 4,7%-عا دەيىن تومەندەيدى دەگەندى بىلدىرەدى.

سونداي-اق بولجامعا سايكەس، ەڭ تومەنگى بازالىق زەينەتاقى بيىلعى 18,5 مىڭ تەڭگەدەن 2026 جىلى 22,7 مىڭ تەڭگەگە دەيىن ۇلعايۋعا ءتيىس. ەڭ تومەنگى زەينەتاقى 43,3 مىڭ تەڭگەدەن 58,4 مىڭ تەڭگەگە دەيىن ارتادى.

ەڭ تومەنگى كۇنكورىس دەڭگەيى 2026 جىلى 42,1 مىڭ تەڭگە (2021 جىلى 34,3 مىڭ تەڭگە) دەڭگەيىندە بولادى دەپ بولجانىپ وتىر. تابىسى وسى دەڭگەيدەن تومەن حالىقتىڭ ۇلەسى قازىرگى ۋاقىتتا 5,4%-دان 5,2%-عا دەيىن ازايادى.

"ادىرنا" ۇلتتىق پورتالى

پىكىرلەر