(قىشقىل ساتيرا)
سوت توراعاسى جابىرلەنۋشىگە ءسوز بەردى. وتىرىكشى شەنەۋنىك سويلەي جونەلدى.
–شىندىق بەتكەايتارۇلى وتكەن ايدا مەنىڭ كولەڭكەمدى باسىپ كەتتى. ول مەنىڭ نامىسمدى، ار–وجدانىمدى قورلادى. مەنىڭ ابىرويلى كولەڭكەم سول جەردە مايىسىپ، ءوزىم دە ءبىر ءتۇرلى بولىپ كەتتىم! سوندىقتان، شىندىقتى ءومىر بويىنا سوتتاۋ كەرەك!
–شىندىعىمىز جوعالسا، قايتىپ مەملەكەت بولامىز؟ كولەڭكەسىن باسقانى ءۇشىن دە سوتتاۋعا بولا ما؟ –دەپ ونىڭ قورعاۋشىسىنىڭ شىر–پىرى شىقتى.
–شىندىقتى دارعا اسۋ كەرەك! –دەپ قالدى ءبىر ساتقىن.
–شىندىقسىز دا ءومىر سۇرەمىز!
–شىندىقتىڭ قولىنا كىسەن سالىنسىن!
سوت توراعاسى ءۇزىلىس جاريالادى. ءۇزىلىس كەزىندە مەملەكەتتىك جاعىمپاز شىندىققا جاقىنداپ، جاعىمپازدانا باسۋ ايتىپ جاتتى.
–سابىر ساقتاڭىز. كوپ بولسا، ەلۋ جىل تۇرمەدە وتىراسىز. مەن ءسىزدى قاتتى قۇرمەتتەيمىن، دەگەنمەن، وتىرىكتىڭ عانا ەمەس، جالعانباي اقپاراتۇلىنىڭ دا اياعىنان شالعانىڭىز جارامادى، جالماۋىز جەگەنۇلىنىڭ دا قىر سوڭىنا ءتۇسىپ الدىڭىز. سابىر ەتىڭىز، مەن ءسىزدىڭ ادىلەت، اق، تازا، پەيىل دەگەن بالالارىڭىزعا قامقور بولىپ جۇرەمىن.
ءۇزىلىس اياقتالىپ، سوت ۇكىم وقي باستادى:
–وتىرىكتىڭ كولەڭكەسىن قاساقانا باسقانى ءۇشىن، شىندىق بەتكەايتارۇلى قىلمىستىق كودەكستىڭ «ءولا» بابىنىڭ «ماسقارا» تارماعى بويىنشا، ءومىر باقي باس بوستاندىعىنان ايىرىلادى. شىندىقتىڭ پەيىل، اق كوڭىلدەرى، جان تازالىعى تاركىلەنىپ، وتىرىكبايعا، جەمقوربەككە ءجۇز ميلليارد تەڭگە ايىپ تولەيدى.
كۇزەتشىلەر شىندىقتىڭ قولىنا كىسەن سالدى. قورعاۋشىسى كاسساتسيالىق ارىز جازاتىنىن مالىمدەدى. شىندىق جەڭە مە، جەڭىلە مە؟
مۇحتار شەرىم
