(Qyshqyl satıra)
Sot tóraǵasy jábirlenýshige sóz berdi. Ótirikshi sheneýnik sóıleı jóneldi.
–Shyndyq Betkeaıtaruly ótken aıda meniń kóleńkemdi basyp ketti. Ol meniń namysmdy, ar–ojdanymdy qorlady. Meniń abyroıly kóleńkem sol jerde maıysyp, ózim de bir túrli bolyp kettim! Sondyqtan, Shyndyqty ómir boıyna sottaý kerek!
–Shyndyǵymyz joǵalsa, qaıtip memleket bolamyz? Kóleńkesin basqany úshin de sottaýǵa bola ma? –dep onyń qorǵaýshysynyń shyr–pyry shyqty.
–Shyndyqty darǵa asý kerek! –dep qaldy bir satqyn.
–Shyndyqsyz da ómir súremiz!
–Shyndyqtyń qolyna kisen salynsyn!
Sot tóraǵasy úzilis jarııalady. Úzilis kezinde memlekettik jaǵympaz Shyndyqqa jaqyndap, jaǵympazdana basý aıtyp jatty.
–Sabyr saqtańyz. Kóp bolsa, elý jyl túrmede otyrasyz. Men sizdi qatty qurmetteımin, degenmen, ótiriktiń ǵana emes, Jalǵanbaı Aqparatulynyń da aıaǵynan shalǵanyńyz jaramady, Jalmaýyz Jegenulynyń da qyr sońyna túsip aldyńyz. Sabyr etińiz, men sizdiń Ádilet, Aq, Taza, Peıil degen balalaryńyzǵa qamqor bolyp júremin.
Úzilis aıaqtalyp, sot úkim oqı bastady:
–Ótiriktiń kóleńkesin qasaqana basqany úshin, Shyndyq Betkeaıtaruly qylmystyq kódekstiń «ólá» babynyń «Masqara» tarmaǵy boıynsha, ómir baqı bas bostandyǵynan aıyrylady. Shyndyqtyń peıil, aq kóńilderi, jan tazalyǵy tárkilenip, Ótirikbaıǵa, Jemqorbekke júz mıllıard teńge aıyp tóleıdi.
Kúzetshiler Shyndyqtyń qolyna kisen saldy. Qorǵaýshysy kassaııalyq aryz jazatynyn málimdedi. Shyndyq jeńe me, jeńile me?
Muhtar ShERIM
