رەسمي دەرەكتەرگە سايكەس ناۋرىز ايىنىڭ باسىندا قىتايدىڭ سولتۇستىك-باتىسىنداعى شىڭجاڭ-ۇيعىر اۆتونوميالىق اۋدانىندا جوعالىپ كەتكەن 13 جاستاعى بالانىڭ دەنەسى تابىلعان. بەيرەسمي دەرەكتەر بويىنشا ادام ساۋداسىمەن اينالىساتىن قىلمىستىق توپ بالانىڭ اعزاسىن الىپ، ءوزىن ولۋگە دالاعا تاستاپ كەتكەن.
13 جاستاعى ابدۋللا راحمانجان ىلە-قازاق اۆتونوميالى وبلىسىنداعى قۇلجا قالاسىنىڭ ماڭىنداعى ۋچون اۋلىنداعى ورتا مەكتەپكە بارا جاتقان جولدا جوعالىپ كەتكەن. وقيعا 2-ناۋرىز كۇنى بولعان. بالانىڭ جوعالىپ كەتكەنى جايلى جەرگىلىكتى حالىق اراسىندا اقپارات تاراپ، الەۋمەتتىك جەلىلەردە حابارلاما بەرىلگەن.
بىرنەشە كۇننەن كەيىن قىتاي تىلىندەگى حابارلاما تاراتاتىن WeChat قوسىمشاسىندا بالانىڭ دەنەسى يەن دالادا تابىلعانى، ونىڭ اعزاسىن ادام ساۋداسىمەن اينالىساتىندار العانى جايلى اقپارات تارايدى. اقپاراتپەن بىرگە بالانىڭ وتباسى ونىڭ دەنەسىن تاپقان ءساتى بەينەلەنگەن ۆيدەو جارىققا شىعادى.
اقپاراتتىڭ راستىعىن تەكسەرۋ ءۇشىن RFA اگەنتتىگىنىڭ قىزمەتكەرلەرى ۋچون اۋىلىنىڭ بىرنەشە تۇرعىنىنان پىكىر الادى. ولار اتالمىش وقيعانىڭ بولعانىن راستاعان. قۇلجا پوليتسياسى اقپاراتتى راستاپ، اتالمىش وقيعا بويىنشا تەرگەۋ-تەكسەرۋ جۇمىستارى باستالعانىن جەتكىزگەن. بۇل وقيعادان كەيىن اتالمىش ايماقتا كۇزەت كۇشەيتىلىپ، بالالارعا ساق بولۋ تۋرالى ارنايى نۇسقاۋلىقتار ايتىلعان.
2017 جىلدان باستاپ قىتايدىڭ شىڭجاڭ ايماعىندا از ۇلتتارعا قىسىم ساياساتى ارتتى. ولاردىڭ ىشىندە قازاق، ۇيعىر، قىرعىز جانە باسقا دا ۇلتتار بار. بەيرەسمي دەرەكتەر بويىنشا 1.8 ملن ادام ساياسي تاربيلەۋ لاگەرلەرىندە وتىر. ال لاگەرگە قامالعانداردىڭ بالالارى كوپ جاعدايدا مەملەكەت باقىلاۋىنا وتەدى نەمەسە وتباسىنىڭ قارت مۇشەلەرىنە بەرىلەدى. سوندىقتان قايعىلى وقيعالار سانى ارتقان.
"ادىرنا" ۇلتتىق پورتالى
