ءومىر مەن ءولىم ۇستىندەگى بالا جانىن اجالدان اراشالاپ قالعان تۇركيالىق دارىگەر ماراپاتتالدى، دەپ حابارلايدى azattyq-ruhy.kz "حابار 24"-كە سىلتەمە جاساپ.
وسىدان بىرنەشە اي بۇرىن بىشكەكتەن ىستامبۇلعا ۇشىپ كەلە جاتقان قازاقستاندىق نارەستەنىڭ جۇرەگى سىر بەرىپ، توقتاپ قالادى. مۇنى ەستىگەن بورتتاعى تۇرىك دەپۋتاتى ءارى دارىگەر رەجەپ شەكەر جاساندى تىنىس الدىرىپ، جۇرەگىنە ماسساج جاساپ، ءسابيدى امان الىپ قالادى.
وقيعامەن تانىس بولعان مەملەكەت باسشىسى قاسىم-جومارت توقاەۆ رەجەپ شەكەرگە «ەرەكشە باتىلدىعى ءۇشىن» العىس حاتىن جونەلتتى.
پرەزيدەنتتىڭ ماراپاتىن قازاقستاننىڭ تۇركياداعى توتەنشە جانە وكىلەتتى ەلشىسى ابزال ساپاربەكۇلى تۇرىك پارلامەنتىندە تابىستاپ، جۇرەكجاردى العىسىن ءبىلدىردى. سالتاناتتى شاراعا تۇركيا ۇلى ۇلتتىق ءماجىلىسىنىڭ دەپۋتاتتارى مەن قىزمەتكەرلەرى قاتىستى.
ءوز كەزەگىندە رەجەپ شەكەر «ءاربىر وقيعانىڭ وزىندىك ءمانى بار» دەپ، الداعى ۋاقىتتا ەكى ەل اراسىنداعى ىنتىماقتاستىقتى ارتتىرۋ ءۇشىن بار كۇش-جىگەرىن جۇمسايتىنىن جەتكىزدى.
«وقيعانىڭ بولعانى وكىنىشتى. دەگەنمەن، ناتيجەسى جاقسى. نارەستەلەردىڭ وتباسىمەن حابارلاسىپ تۇرامىز. ءتىپتى بىرنەشە كۇن بۇرىن بەينە جولداپتى. سالماق قوسىپتى. امان بولسىن. ەكى ەلدىڭ باۋىرلاستىق جانە دوستىق قاتىناسىنا سەبەپشى بولدى. ءىلتيپات بىلدىرگەن پرەزيدەنت قاسىم- جومارت توقاەۆقا العىسىمدى ءبىلدىرىپ، بىرەر كۇن بۇرىن وتكەن تۋعان كۇنىمەن قۇتتىقتايمىن»، - دەدى دەپۋتات، دارىگەر رەجەپ شەكەر.
