«ايشا ءبيبى» شيپاجايى: دەرتكە – داۋا، جانعا – تىنىس

6683
Adyrna.kz Telegram

سارىاعاش كۋرورتتىق ايماعىندا ەم الۋدى كوپتەن بەرى ارمانداعان جايىمىز بار ەدى. بۇل نيەتىمىز «ايشا ءبيبى» شيپاجايىنىڭ قاسيەتتى رامازان ايىنىڭ كۇندەرىنە سايكەس كەلىپتى. ءبىز دە كورمەي-بىلمەي تۇرىپ-اق شيپاجايدىڭ «ايشا ءبيبى» دەپ اتالۋى ىقىلاسىمىزدى اۋداردى. كەيىنگى جىلدارى ەلىمىزدە كەلىسسە دە، كەلىسپەسە دە شەتەلدىك اتاۋلارعا ۇيىرسەكتەگىش، ەلىكتەگىش، ءوزىمىزدىڭ ءتول دۇنيەمىزدى مىسە تۇتپاي، جاتتىڭ ءبارىن كەرەمەت كورەتىن دەرتكە شالدىقتىق. ال مىنا مەكەمەنىڭ اتاۋى قازاقشا عانا ەمەس، تاريحي باستاۋلاردان نەگىز الاتىن، ايشا بيبىدەي بۇكىل تۇرىك حالىقتارىنا ورتاق تۇلعانىڭ ەسىمى بەرىلۋى – ەلگە دەگەن ماحابباتتىڭ، وتانعا ۇلكەن جۇرەكتىڭ نىشانى دەرسىز.

سارىاعاش – كورىكتى مەكەن

سارىاعاش – وڭتۇستىك قازاقستانداعى ەڭ كوكوراي شالعىنعا بولەنگەن، اعاشى مەن سۋى مول ولكە. مۇندا جىلدىڭ كەز كەلگەن ماۋسىمىندا ەم الۋعا بولادى. ادەتتەگىدەي قىرۋار حالىق ەم الۋعا ەڭ قولايلى مەزگىل كۇز بەن كوكتەم ايلارىندا كەلەدى. قىستا دا اۋا-رايى جىلى. سونىمەن قاتار، قىستا كەلۋشىلەرگە، ناقتىراق ايتقاندا، «ايشا ءبيبى» شيپاجايىندا ايتارلىقتاي جەڭىلدىكتەر قاراستىرعان.

massagepiavki
سارىاعاشتىڭ سۇلۋ كورىنىسى – الىستان قول بۇلعاعان تاۋىمەن، جازيرالى جايىلىمدارىمەن ايقىندالا تۇسەدى. قۇرامى مينيرالدى زاتتارمەن باي سارىاعاش بار دەمالۋشىعا تانىمال. ەندى ونى بار الەمگە ايگىلى ەتىپ، دۇنيەنىڭ تۇكپىر-تۇكپىرىنەن كەلەتىندەي ەتىپ ناسيحاتتاۋ ءىسى الدىمىزدا تۇر. سارىاعاشتىڭ شيپاجايلارى جايىندا اعىلشىن تىلىندە ينتەرنەت سايتتار، ماقالالار، ۆيدەو-روليكتەر كوپتەپ ازىرلەسەك، تاڭسىق دۇنيە ىزدەگەن شەتەلدىكتەر جاۋىننان كەيىنگى ساڭىراۋقۇلاقتاي قاپتاپ كەلە باستار ەدى. وندا ولارعا قىزمەت كورسەتەتىن اعىلشىن ءتىلدى ماماندارعا دا سۇرانىس تۋادى. ەلدىڭ باسەكەگە قابىلەتتى بولىپ قالىپتاسۋى وسىلاي باستالماقشى.

img_0964 img_1256
«ايشا ءبيبى» ءساناتوريى ءوزىنىڭ گەوگرافيالىق ورنالاسۋ جاعىنان جانە كوپ ميلليوندى حالقى بار تاشكەنت شاھارىنا 20 شاقىرىم جەردە ورنالاسۋى تۋريستەردىڭ جولاۋشىلاپ قايتۋىنا ىڭعايلى. ۇلتىمىزدىڭ ارعى-بەرگى تاريحىنداعى ارىس ازاماتتاردىڭ ماڭگىلىك مەكەنى بولعان كيەلى توپىراق ارىستانباب پەن قوجا احمەت ياسساۋي كەسەنەلەرىنە، قاسيەتتى تۇركىستانعا ساپار شەگۋگە، شىمكەنتكە، تاشكەنتكە، ءامىر تەمىر ساعاناسى بار ساماردقاندتى كورىپ قايتۋعا مۇمكىندىك مول.

ءجۇزى جىلى قىزمەتكەرلەر

الماتىدان شارشاپ-شالدىعىپ سارىاعاشتاعى «ايشا ءبيبى» كەشەنىنە جەتكەنىمىزدە شيپاجاي قىزمەتكەرلەرى ءبىزدى جىلى قارسى الدى. جايما شۋاق جايدارى كەيىپتە قارسى العان كەزدە مەكەمە قىزمەتكەرلەرى رياسىز كوڭىلى بارلىق جول اۋىرتپالىعىن دا ۇمىتتىرىپ جىبەرگەندەي بولدى.

lechenie_1
مۇندا بارشا مەيىربيكەلەر، اسحانا قىزمەتكەرلەرى ۇنەمى كۇلىمسىرەپ، ەمالۋشىلارعا ايرىقشا ىقىلاس تانىتۋعا تىرىسىپ تۇرادى. بىلمەگەن دۇنيەڭىزدى ءتۇسىندىرىپ، باعىت-باعدار، ماعلۇمات بەرۋدەن ەش جالىقپايدى. ەم الۋشى جۇرت تا باس قوسا قالسا بولدى، داياشىلاردىڭ سىپايىلىعىن، قىزمەتكەرلەردىڭ ءىلتيپاتىن، دارىگەرلەردىڭ بىلىمدىلىگىن، سابىرلى، ساليحالى مىنەزىن ايتىپ قاۋقىلداسىپ جاتقانى.

img_0991img_1057
كۇندەلىكتى شيپاجايدىڭ كەشكىلىك بي الاڭىندا جاسى ەگدە دەمالۋشىلارمەن جاس بالاعا دەيىن قازاقتىڭ اندەرىنە بي بيلەپ كوڭىل كوتەرەدى. بۇل ءبىر جاعىنان دەمالۋشىلارعا، ەمدەلۋشىلەرگە دەنە جاتتىعۋى دەسە دە بولادى.
pitanie_4814img_1177

ءاربىر ۇلىستىڭ ۇلى كۇنى – ناۋرىز، اۋىزاشار، ورازا ايت، قۇربان ايت جانە تاعى باسقا مەرەكەلەرگە شيپاجاي داستارحان جايىپ، 200 ادامدىق باس قوسۋلار ۇيىمداستىرىپ تۇرادى. ورازا ايتقا ارنالعان مەركەلىك داستارحاننىڭ بىرىنە ءوزىمىز قاتىسىپ، جومارتتىقتىڭ كۋاسى بولدىق. وسى شيپاجايعا ءومىرىن ارناعان مەكەمە باسشىلارى، دارىگەرلەر، جاس ماماندار ءسوز سويلەپ، قۇتتىقتاۋ سوزدەرىن ارنادى. ال ەمدەلۋشىلەر شيپاجاي باسشىلارى مەن قىزمەتكەرلەرىنە ارنالعان العىستارىن ايتىپ جاتتى.

img_1150img_1159

 

سارىاعاش سۋىنىڭ قاسيەتى

سارىاعاش سۋى – سارىاعاش مينەرالدى سۋى، كەلەس ارتەزيان الابى وڭىرىنەن 1946-48 جىلدارى تابىلدى. شيپالى-تەرمالدى سۋى سەنومان يارۋسىندا، 800-1170 مەتر تەرەڭدىكتە، ارقايسىسىنىڭ قالىڭدىعى 150-200 مەتر. ول قۇمتاس، قيىرشىقتاس، ساز قاباتتارىندا كەزدەسەدى. سۋى ازوتتى، مينەرالدىلىعى 0,5-0,8 گ/ل، گيدروكاربوناتتى-ءناتريلى، ءسىلتىلى بولىپ كەلەدى. كرەمني قىشقىلىنىڭ (30-40 مگ/ل), فتور (1,5-4,4 مگ/ل) مولشەرى كوپ.

img_1132

سۋىنىڭ تەمپەراتۋراسى – 48-51°س. ۇڭعىمالاردان سەكۋندىنا 5 ليتر سۋ ارىنداپ شىعادى. سارىاعاش قالاسى تاۋلىگىنە 354 م3 سۋ الادى. سارىاعاشتىڭ شيپالى سۋى ءدامىنىڭ وزگەشەلىگىمەن، ەمدىك قاسيەتتەرىمەن، ساپاسىنىڭ جوعارىلىلىعىمەن ۇلكەن سۇرانىسقا يە. وسى مينەرالدى سۋ كەنى نەگىزىندە «ايشا ءبيبى» شيپاجايى جۇمىس ىستەيدى. سۋدىڭ تابيعي ەمدىك فاكتورلارىن (مينەرالدى سۋى، ەمدىك بالشىعى، كليماتى) نەگىزىنەن اس قورىتۋ جۇيەسىنىڭ، بۇيرەكتىڭ سوزىلمالى قابىنۋلارىن، بۋىن اۋرۋلارىن ەمدەۋگە، ءوت تازالايتىن، ءىش-قۇرىلىس تازالايتىن،قانت تۇسىرەتىن، ۇيقى بەزىن ەمدەۋگە نەگىزدەلگەن.

img_1139img_1141

كوپ سالالى ەم-دوم

مۇندا سان سالالى ەم جۇرگىزىلەدى. فيتوتەراپيا، ياعني ءتورت مەزگىل ءشوپ دارىلەر قايناتىلىپ بەرىلەدى. وسىندا ارنايى تابيعي بيولوگيالىق ءدارى-دارمەكتەر ساتىلاتىن ارنايى ءدارىحانا دا بار.

lecenie_3img_1100

بۇل جەردەن ءتىپتى ەمدىك، فيزيو-تەراپيالىق، ماسساجدىق قۇرال-جابدىقتاردى دا ساتىپ الۋعا بولادى. شيپاجاي باسشىلارى مەكەمەگە جاڭاقورعاننان ەمدىك ساز بالشىقتى دا الدىرىپ، بۋىن اۋرۋلارى مەن سۋىق تيگەن دەمالۋشىلاردىڭ العىستارىن ارقالاپ، ريزاشىلىقتارىن الىپ وتىر. قان قىسىمى جوعارى دەمالۋشى ءۇشىن قولدانىلاتىن سۇلىكپەن ەمدەۋ تەراپەياسى ەل-جۇرتتىڭ ءاردايىم كوڭىلىنەن شىعىپ كەلەدى. شيپاجايدا سان سالالى ەم تۇرلەرى قولدانىلادى. مىسالى، پارافين-وزەكەريت، ەلەكتروفورەز، امپليپۋلس، ۋفو، ينگالياتسيا، دارسەنۆال، الماگ 02, تەپلون، ءارتۇرلى دارىلىك شوپتەرمەن، پانتامەن دايىندالاتىن مينەرالدى ۆاننا مەن دۋش، بالقاراعاي مەن پانتا بوشكەسى، ماسساج جانە تاعى باسقالار.

img_1280

اركىم ءوز قالاۋى بويىنشا ءوز دەنساۋلىعىنا قاجەتتى ەمىن-ەركىن تاڭداۋعا قۇقىلى. قان قىسىمى جوعارى كىسىلەرگە ىستىق ەم تۇرلەرىن الۋعا بولمايتىندىعى ەسكەرتىلەدى. ۇنەمى ەمدەلۋشىلەردىڭ قان قىسىمى ولشەنىپ، تەكسەرىلىپ تۇرادى.
img_1126

مەكەمە باسشىلارى ۇنەمى ەمدەلۋشىلەرمەن كەزدەسىپ، ولاردىڭ وتىنىشتەرىن، ەسكەرپەلەرىن ەسكەرۋگە، جىلى شىراي تانىتىپ، دەمالۋشىلاردىڭ حال-جاعدايىن سۇراپ جۇرەدى. بۇل – ەڭ ءبىرىنشى ەل الدىنداعى جاۋاپكەرشىلىكتى سەزىنۋ بولسا، ەكىنشىدەن، ەمدەلۋشىلەر ءۇشىن جىلى قارىم-قاتىناستىڭ ءوزى ءبىر ەم-دوم بولىپ تابىلادى. «ايشا ءبيبى» شيپاجايىنىڭ قىزمەتكەرلەرى «كوبىنە ىستىق ەم قولدانىلاتىن مەزگىلدە، سۋىق سۋعا تۇسۋگە، باسسەينگە تۇسۋگە بولمايتىندىعى جايىندا كەڭەستەر ءجيى ايتىلادى. ەمدەلۋشى دەمالۋشى سۋىقتاپ قالسا، بارلىق ەم دالاعا كەتەدى. ەمدەلۋ كەزىندە دەمالۋشىلاردىڭ سۋىقتاپ قالۋ قاۋىپى جوعارى بولادى» دەيدى. راسىندا، ەمدەلۋشىلەردىڭ دۇرىستاپ تولىقتاي ەم الىپ، ولاردىڭ شيپاجايدان كەتكەننەن كەيىن دە اۋىرماۋىن ويلايتىن شيپاجاي باسشىلارى كەمدە-كەم بولار.
luks-nomer-1024x683luks-1024x683

«ايشا بيبىدە» ءبارى دە جاڭا، ساپالى جيھازدار، سوڭعى تەحنولوگيا، بىلىكتى، ىسكەر ماماندار ۇيىمداستىرىلعان. مۇندا كەلگەن دەمالۋشىلاردىڭ ءبارى ساپالى ەم الىپ، العىس ايتىپ اۋىرعان اعزاسىنا شيپا بولعانىنا قۋانىپ، تاعى دا كەلەمىز، اللا بۇيىرتسا دەپ قوشتاسۋدا.

img_1041

نۇرسۇلۋ ەرمەكباەۆا،
«ايشا ءبيبى» شيپاجايىنىڭ مەڭگەرۋشىسى:
- «ايشا ءبيبى» شيپاجايى 2013 جىلى اشىلدى. مەن وسىنداعى قىزمەتكە مەكەمە اشىلماستان بۇرىن العاشقىلاردىڭ ءبىرى بولىپ كەلگەن ەدىم. سودان بەرى وسى مەكەمەدە تۇراقتى قىزمەت ەتىپ كەلەمىن. مەكەمە باسشىلارى جۇمابەك اعا مەن تۇرسىنحان اپاي ەمگە قاتتى كوڭىل بولەدى. سول سەبەپتى، بىزدە ەمنىڭ تۇرلەرى وتە كوپ. ەمدەلۋشىلەر سىرتقا شىقپاي ءبىر عيماراتتىڭ ىشىندە ەم الادى. مۇنىڭ ءوزى ۇلكەن ارتىقشىلىق. كوپتەگەن شيپاجايلاردا اسحانا ءبىر جاقتا، جاتىن بولمەلەر ءبىر جاقتا، ەم الۋ بولىمدەرى باسقا جاقتا ورنالاسقان. مۇنداي جاعدايدا ەمدەلۋشىلەر سىرتقا شىعىپ، جەلدەن تەرى قاتىپ جاتادى. سارىاعاشتا نەگىزىنەن دەمالۋشىلار تەرلەۋ ارقىلى ەم الادى. ال تەر قاتىپ قالسا، ەم بولا قويماس. ءتىپتى اۋرۋدى اسقىندىرىپ الۋى دا ىقتيمال. سول سەبەپتى، ەمدەلۋشىلەر كوبىنە ءبىزدى تاڭداپ جاتادى. اسىرەسە، ەمنىڭ قادىرىن تۇسىنەتىن ۇلكەن جاستاعى دەمالۋشىلار پىكىرى وسىعان تۇيىسەدى.
الدىڭعى جىلدارى 300 زاعيپ دەمالىپ-ەمدەلۋشى جاندارمەن دە جۇمىس جاسادىق. زاعيپتارمەن جۇمىس جاساپ، ولارعا قىزمەت كورسەتۋ وڭاي ەمەس ەكەنىن وزدەرىڭىز دە توپشىلاپ وتىرعان بولارسىزدار. ايتسە دە، ءبىزدىڭ قىزمەتكەرلەر ولاردىڭ دا كوڭىلىنەن شىعا ءبىلدى. ولار شيپاجايدى قيماي قوشتاستى.
ءبىزدىڭ شيپاجايدا 65 قىزمەتكەر تۇراقتى جۇمىسپەن قامتىلعان. ولاردىڭ ساپالى جۇمىس ىستەۋىنە بارىنشا جاعداي جاسالعان. ءار بالا سانىنا بايلانىستى جالاقىعا قوسىمشا ۇستەمە قوسىلادى. سونىمەن قاتار، قىزمەتكەرلەر مەن جۇمىسشىلارعا ءۇي الۋعا نەمەسە ءۇي سالۋعا بايلانىستى قارجىلاي كومەك تە كورسەتىلەدى. كەيىن ول قاراجات ايلىقتان ۇستالىپ وتىرادى. قىزمەتكەرلەرىمىزدىڭ باسىم بولىگى – جاستار. وسىندا ءجۇرىپ ءبىر-بىرىمەن تانىسىپ وتاۋ قۇرىپ جاتقاندارى دا بار. قانشاما جاستار باسشىلاردىڭ قامقورلىعى ارقاسىندا ءۇيلى بولىپ، تۇرمىستارىن تۇزەپ كەلەدى.
بۇگىندە شيپاجايدا 200 ادامدىق ورىن بار. قازىر قوسىمشا عيمارات سالىنىپ جاتىر. از كۇندە ول بىتسە، تاعى 60-70 ادامدىق ورىن اشىلادى. تيىسىنشە، شيپاجايدىڭ اۋقىمى كەڭىپ، وركەندەي تۇسپەكشى. زاماناۋي جاڭا ەمدىك اپپاراتتار جانە ەمدەر قوسىلۋدا.

img_1174

قۇرالاي وردابايقىزى،
«ايشا ءبيبى» شيپاجايىنىڭ باس دارىگەرى:
- دەمالۋشىلار مەن ەمدەلۋشىلەر ەڭ اۋەلى قابىلداۋ بولمەسىنەن كەيىن مەكەمەمىزدىڭ دارىگەرلەرىنە قارالادى. ارنايى دياگنوز قويىلعاننان كەيىن عانا ەمدەۋ پروتسەسى باستالادى. مۇندا ەڭ مىقتى زامانۋي تەحنولوگيالار نەگىزىندە دياگنوزدار قويىلادى. شيپاجاي باسشىلارى جىلما جىل زاماناۋي جاڭا تەحنولوگياعا ساي ءارتۇرلى اپاراتتاردى ساتىپ الىپ وتىرادى. سونىڭ نەگىزىندە ساپالى ەم جۇرگىزىلەدى. زاماناۋي ءارى جاڭا ساپاداعى اپاراتتارىمىز بار. ماسەلەن، ۆلوك (ۆنۋتريسوسۋديستايا لازەرنايا وچيششەنيا كروۆي) – قان تامىرلاردى لازەرلىك جولمەن تازالاۋعا ارنالعان اپارات.
ەمنىڭ ەڭ نەگىزگى ءتۇرى – شيپالى سۋ. ءارتۇرلى اپاراتتاردى كورگەن ەل شيپالى سۋدى ءىشۋدى ۇمىتىپ كەتەتىن جاعدايلار كەزدەسەدى. ءار جولى تاماققا دەيىن 100 گرامم مينەرالدى سۋ ءىشۋ كەرەك جانە 5-10 مينۋت وتكەن سوڭ فيتو-شاي ىشىلەدى، ال 30 مينۋتتان كەيىن تاماققا بارعان ابزال. بىزدە كوپ سالالى ەم تۇرلەرى قولدانىلادى. ءاربىر ەمنىڭ اراسىندا 15-30 مينۋتتاي ءۇزىلىس جاساپ، دەم الىپ بارىپ ەمدى جالعاستىرعان ءجون.

img_1039

الماس جۇسىپبەكوۆ،
دارىگەر، حيرۋرگ، ۋرولوگ، گاستروەنتولوگ:
- شيپاجايدا دەمالۋشىلارعا بارلىق جاعداي جاسالعان. ءبىر مەزگىلدە دەم الىپ، ءبىر مەزگىلدە قاجەتتى ەم الىپ كەتۋگە تولىقتاي مۇمكىندىكتەر قاراستىرىلعان. ارنايى ستاتسيونارلىق ەمدەۋ بولىمىندە ۋرولوگيالىق جانە گينەكولوگيالىق، اسقازان، باۋىر، بۇيرەك جانە تاعى باسقا دەرتتەرگە قارسى جامباسقا، قان تامىرلارعا دارىلىك ەگۋلەر جۇرگىزىلەدى. قوسىمشا ءارتۇرلى دارۋمەندەر الدىرتۋعا دا بولادى. قان تازارتۋ، سۇلىك سالۋ سياقتى ەم-دوم الۋعا دا مۇمكىندىكتەر بار. مۇنداي جان-جاقتى ەم الۋعا جاعداي جاسالعان شيپاجايلار كەمدە-كەم. پارافين-وزەكەريت، ەلەكتروفورەز، امپليپۋلس، ۋفو، ينگالياتسيا، دارسەنۆال، الماگ 02, تەپلون، جاڭاقورعاننان اكەلىنگەن شيپالى بالشىق، ءارتۇرلى دارىلىك شوپتەرمەن، پانتامەن دايىندالاتىن مينەرالدى ۆاننا مەن دۋش، بالقاراعاي مەن پانتا بۋىمەن بۋلايتىن بوشكە، ءتورت مەزگىل فيتو شايلەر، ماسساج جانە كورشى بەلارۋس مەكەنىنەن كەلەتىن بيشوفيت ماگنيلى مينەرالى – 4 ءتۇرى، انتيسترەسس، بۋىندارعا، ۆاننالارعا ، ءوت شىعارۋعا ىشەتىن جانە بالشىق قۇيۋ، مارالدىڭ ءمۇيىزىنىڭ قانى تاعى باسقا ەم تۇرلەرىمەن «ايشا ءبيبى» شيپاجايىنا كەلۋشىلەرگە ساپالى قىزمەت كورسەتەمىز.

img_1034

قارلىعاش قوسپانوۆا،
«ايشا ءبيبى» شيپاجايىنىڭ اسحانا ءبولىمىنىڭ مەڭگەرۋشىسى:
- بۇل مينەرالدى سۋ ادام اعزاسىنىڭ بارلىق بولىكتەرىنە پايدالى. قۇرامىندا كوپتەگەن پايدالى ەلەمەنتتەر بار. قۇرامى وتە باي. جوعارى مينەرالدى زاتتار كەزدەسەدى. بىراق، بۇل سۋعا بارلىق تاماق سايكەس كەلە بەرمەيدى. سارىاعاش سۋى دۇرىس ادام تاماقتانعان جاعدايدا عانا ەم بولادى. سونى ەم الۋشىلار ەسكەرسە ەكەن دەيمىز. ءبىز تاماقتى ەممەن سايكەس كەلۋىن قاداعالايىز. ماسەلەنكەي، ءداندى-داقىلداردان ازىرلەنەتىن تاماق ءىش-قۇرىلىستى تازالاۋعا كومەكتەسەدى. وزدەرىڭىز بىلەسىزدەر، مينەرالدى سۋدىڭ ەڭ پايدالى تۇسى – ادامنىڭ اس قورىتۋ جولدارى. كەلگەن دەمالۋشى سارىاعاشقا ىشكى اعزا، اس قورىتۋ، ىشەك جولدارىن، ءوتىن تازالاتۋعا كەلەدى. اراسىندا دەمالۋشىلار بىلمەستىكپەن قۇنارلى تاماقتار، دامدەۋىشتەرمەن ازىرلەنگەن اس سۇراپ جاتادى. ءبىز بارىنشا اس ءمازىرىنىڭ ديەتالىق نەگىزدە ازىرلەنەتىندىگىن، تويىپ تاماق جەۋدى ءار دەمالۋشى قاتاڭ قاداعالاعانى دۇرىستىعىن تۇسىندىرۋگە تىرىسامىز. «اۋرۋ – استان...» دەپ اتام قازاق بەكەر ايتپاعان. كوپتەگەن دەرت دۇرىس تاماقتانباۋدىڭ سالدارىنان تۋادى.
سونىمەن قاتار، داياشىلاردىڭ ىزەتتىلىگىنە، ەمدەلۋشى دەمالۋشىلاردىڭ قىزمەت كورسەتۋىنە ايرىقشا كوڭىلدەرى اۋىپ جاتادى. ولار ۇنەمى كۇلىپ، جايدارى بولىپ ءجۇرۋى كەرەك. بۇل ەمدەلۋشىلەردىڭ كوڭىل-كۇيىنە اسەر ەتەتىن ءبىرىنشى شارت. باسشىلار بارلىق قىزمەتكەرلەردەن سىپايى، بيازى بولۋدى تالاپ ەتەدى. بۇل ءبىزدىڭ شيپاجايدا ءداستۇر رەتىندە قالىپتاسقان جاعداي. داياشىلار ءتورت مەزگىل ەم الۋشىلارعا جۇگىرىپ ءجۇرىپ قىزمەت جاسايدى. بارلىق ەم الۋشىلار داياشىلارعا ريزا. جاقسى كوڭىل-كۇيمەن ازىرلەنىپ، ۇسىنىلعان تاماقتىڭ ءوزى ەم بولادى. ەمنىڭ باستى كەپىلى – دۇرىس تاماقتانۋ. ءار اپتانىڭ ءار تاۋلىگىنە، ءار ءتۇرلى ديەتالىق تاعامدار مەن قوسا قازاقي جۇما كۇنى قازاقتىڭ ەتى، تارى، باۋىرساق، سارى ىرىمشىك بەرىلەدى.

img_1061

ءاليا سارسەنباەۆا، اعا مەدبيكە:
- «ايشا ءبيبى» شيپاجايىندا پارافينمەن، بالشىقپەن ەم-دوم جاسالادى. پارافين بويداعى بۋىنداردان سۋىقتى شىعارادى، دەنەدەگى تۇزداردى ەرىتەدى. ول تىزەگە، بەلگە، جەلكەگە جانە تاعى باسقا بۋىندارعا قويىلادى. بالقاراعاي بۋىمەن، پانتا بۋىمەن بۋلاندىرۋ ارقىلى ەم جۇرگىزىلەتىن بوشكەلەر دە بار. دەمالىسسىز، مەيرامسىز، تاڭعى 05-تەن كەشكى 18-00 عا دەيىن ەم ءۇزىلىسىز جىبەرىلەدى.
img_1105

ەلميرا قۇرمانباەۆا، مەدبيكە:
- مەن شيپاجايدا ەلەكتروفورەز، امپليپۋلس، ۋفو ءتارىزدى اپاراتتارمەن جۇمىس جاسايمىن. بۇدان وزگە دە بىزدە ەمدىك قۇرىلعىلار جەتكىلىكتى. دارىلىك شوپتەرمەن ينگالياتسيا، دارسەنۆال، الماگ 02, تەپلون، مينەرالدى سۋمەن اۋىز قۋىستارىن جۋ تاعى باسقا ەم تۇرلەرى جۇزەگە اسىرىلادى. ەلەكتروفورەز جۇيكە جۇيە سىرقاتىنا مىڭ دا ءبىر ەم بولسا، امپليپۋلس تۇز جينالعانعا قارسى تاپتىرمايتىن داۋا. ۋفو – ۋلترا كۇلگىن ساۋلەلەر ارقىلى اۋىز، مۇرىن، تاماق جولدارىنا ەم جۇرگىزەتىن قۇرىلعى. بۇل ەمدىك قۇرىلعى ارقىلى كوپتەگەن ەل-جۇرتقا قىزمەت كورسەتىپ كەلەمىز.

حالىق ىقىلاسى

img_1036

جانبولات ەسەنعاليۇلى، مۇعالىم:
- مەن وتباسىممەن بىرگە باتىس قازاقستان وبلىسى، تەرەكتى اۋدانى، اباي اۋىلىنان «ايشا ءبيبى» شيپاجايىنا ارنايى كەلدىم. «ايشا ءبيبى» شيپاجايى كوڭىلىمىزدەن شىقتى. قىزمەت كورسەتۋ ساپاسى وتە جوعارى ەكەن. قىزمەتكەرلەرىنىڭ ءبارى دە ۇنەمى جىميىپ، ىزەت كورسەتىپ جۇرەدى. مەدبيكەلەر مەن داياشىلاردىڭ بارلىعى شەتىنەن سىپايى، يناباتتى. وسىنداي جوعارى دەڭگەيدەگى ۇجىمدى ۇيىمداستىرا بىلگەن مەكەمە باسشىلارىنا دا العىسىمىز شەكسىز.

img_0999
گۇلباقىت مومىنوۆا، اسپازشى:
- مەن اقمولا وبلىسىنداعى ستەپنوگورسك قالاسىنان كەلدىم. سول قالاداعى بىردەن-ءبىر كورنەكتى سپورت-ينتەرنات مەكتەبىنىڭ اسحانا مەڭگەرۋشىسى رەتىندە قىزمەت جاسايمىن. تاماق دايىنداۋ، اس ازىرلەۋ بويىنشا كاسىبي مامانمىن دەپ ايتۋىما بولاتىن شىعار. سول سەبەپتى، بارعان جەرىمدە اسحاناداعى ولقىلىقتار مەن ارتىقشىلىقتاردى بىردەن اڭعارىپ وتىرامىن. «ايشا ءبيبى» شيپاجايىنداعى اس ءمازىرى ماعان قاتتى ۇنادى. مۇنداعى اسپازشىلار تاماقتى ءدامدى ەتىپ ازىرلەپ قانا قويمايدى، بار ىقىلاس-پەيىلىمەن، تازا كوڭىلمەن، شىن نيەتپەن ۇسىنادى. شيپاجايداعى اسپازشىلاردىڭ كاسىبي دەڭگەيى وتە جوعارى ەكەندىگىن ايتقىم كەلەدى.

img_1027
جۇماگۇل قالدىروۆا، دەمالۋشى:
- مەن وسى شيپاجايعا رەسەيدىڭ نوۆوترويتسك قالاسىنان «ايشا ءبيبى» شيپاجايىنا ارنايى كەلدىم. سارىاعاش شيپاجايىنا كەلۋدى كوپتەن ارمانداپ ءجۇر ەدىم. اقتوبەنىڭ حرومتاۋ قالاسىندا تۇراتىن جادگەر ۋجانوۆا ەسىمدى اپكەم ەكەۋمىز اقىلداسا وتىرىپ وسى «ايشا ءبيبى» شيپاجايىن تاڭداعان ەدىك. اپكەم ەكەۋمىز وسىندا بىرگە دەمالىپ ءجۇرمىز. تاڭداۋىمىزعا وكىنگەن جوقپىز، قايتا وتە قۋانىشتىمىز. بىزگە مۇندا ماسساج قىزمەتى وتە قاتتى ۇنادى. مينەرالدى سۋى دا تاماشا ەكەن! ال كەشكىسىن ۇيىمداستىرىلاتىن بي مەن ويىن-ساۋىق بارلىق ۋايىم-قايعىنى ۇمىتتىرادى، بويعا قوزعالىس اكەلىپ، جاتتىعۋ بولادى، ەڭ باستىسى، كوڭىل-كۇيدى كوتەرەدى. شيپاجايدىڭ باعىندىرار اسۋى ءالى الدا دەپ ويلايمىن.
مارۋسيا تاجيباەۆا، دەمالۋشى:
- بيىل 2017 جىلدىڭ ماۋسىم ايىنىڭ ەكىنشى ونكۇندىگىنىڭ سوڭىندا مۇنايلى ماڭعىستاۋ وبلىسى، اقتاۋ قالاسى «ماڭعىستاۋمۇنايگاز» اق بىرلەستىگىنە قاراستى «جەتىبايمۇنايگاز» وڭدىرىستىك باسقارماسىنىڭ كاسىپوداق جولداماسىمەن ارنايى وڭتۇستىك وڭىردەگى «ايشا ءبيبى» ساۋىقتىرۋ كەشەنىنە دەمالۋعا كەلدىم.
ءبىزدىڭ كاسىپوداق مۇنايشىلارعا جىل سايىن جان-جاققا دەمالۋعا جولداما بەرىپ وتىرادى. دەگەمەن دە، بۇل كەشەندە مەنىڭ ءبىرىنشى رەت بولۋىم. «ايشا ءبيبى» كەشەنىنىڭ ەم-دومى، قىزمەت كورسەتۋ ساپاسى، تازالىعى وتە جوعارى دەڭگەيدە. ماسساج، پارافين، سۇلەكپەن ەمدەۋ، ءىش قۇرىلىستارىن جۋ بولىمدەرىندەگى جىگىتتەر مەن قىزدار ماشىقتانعان ماماندار، بارلىعى وتە كىشىپەيىل، ەمدەلۋشىلەرگە قۇراق ۇشىپ قىزمەت كورسەتەدى. كەشەن باسشىسى جۇمابەك ءنۇسىپۇلى المابەكوۆ دەمالۋشىلارمەن ءجيى كەزدەسىپ جۇرەدى. بىزگە مۇندا قاسيەتتى رامازان ايىندا دەمالۋعا بۇيىرعان ەكەن. كەشەندە ارنايى مال سويىلىپ، ايت مەرەكەسىنە وراي اس بەرىلدى. مەكەمە باسشىسى تاراپىنان جاسالعان بۇل يگى ىسكە كوپشىلىك ريزاشىلىعىن ءبىلدىردى. دەمالۋشىلارعا بۇل دا ءبىر قازاقتىڭ دارحاندىعى مەن كەڭپەيىلدىگىن كورسەتكەندەي ءىس بولدى. «ايشا ءبيبى» ساۋىقتىرۋ كەشەنى باسشىلىعى مەن قىزمەتكەرلەرىنە جانە ءوزىمىزدىڭ «جەتىبايمۇنايگاز»-داعى لاۋازىمدى تۇلعالار ت. ايدىنوۆ، ت.نىسامباەۆ مىرزالارعا العىس ايتامىن.


دايىنداعان ارمان سەرىكۇلى

پىكىرلەر