ءبىر اپتا ىشىندە نۇر-سۇلتان اۋەجايىندا «سارى» ستاتۋستى 36 جانە «قىزىل» ستاتۋسى بار 39 جولاۋشى انىقتالدى، دەپ حابارلايدى "ادىرنا" ۇلتتىق پورتالى.
الگوريتم بويىنشا «قىزىل» مارتەبەسى بار جولاۋشىلار جەدەل جاردەم كەلگەنگە دەيىن وقشاۋلانعان، سودان كەيىن ولار اۋرۋحاناعا جاتقىزىلدى.
جولاۋشىلار اۋەجايعا كەلمەس بۇرىن Ashyq قوسىمشاسىن جۇكتەپ الىپ، ءوز ستاتۋسىن الدىن-الا تەكسەرىپ الۋى كەرەك.
ۇشۋعا رۇقسات جوق بولعان جاعدايدا اقشانى قايتارۋعا قاتىستى سۇراقتار اۋە كومپانياسىنا جىبەرىلۋى ءتيىس.
"عيمارات كىرەبەرىسىندەگى اۋەجاي قىزمەتكەرلەرىندە ارنايى پلانشەتتەر بار. سمارتفوندارى جوق جولاۋشىلار جسن-ءىن قىزمەتكەرلەردىڭ پلانشەتى ارقىلى ەنگىزىپ، ولار تۋرالى مالىمەت بىلە الادى. جسن-ءى جوق شەتەلدىك جولاۋشىلارعا كەلەتىن بولساق، ولار ءوز ستاتۋسىن اۋەجاي قىزمەتكەرلەرىنىڭ پلانشەتىندەگى تولقۇجات ءنومىرى ارقىلى تەكسەرە الادى", دەپ حابارلادى اۋەجايدىڭ ءباسپاسوز قىزمەتى.
12 مامىردا Ashyq جوباسى نۇرسۇلتان نازارباەۆ اتىنداعى حالىقارالىق اۋەجايىندا تولىعىمەن ىسكە قوسىلدى.
Ashyq قوسىمشاسىنداعى اقپارات دەنساۋلىق ساقتاۋ مينيسترلىگىنىڭ جالپى مالىمەتتەر بازاسىمەن ينتەگراتسيالانۋ ارقىلى جەتكىزىلەدى جانە ول قازىرگى ۋاقىتتا ۆيرۋستىڭ تاسىمالداۋشىسى بولىپ تابىلا ما، جوق پا، سوعان بايلانىستى جولاۋشىنىڭ ستاتۋسىن انىقتايدى.
"ادىرنا" ۇلتتىق پورتالى
