تاعى ءبىر التىن ادامنىڭ تابىلۋى بۇگىنگى كۇننىڭ باستى جاڭالىعى بولدى. قر ۇلتتىق مۋزەيى «قاسيەتتى قازاقستان» عىلىمي-زەرتتەۋ ورتالىعىنىڭ جەتەكشىسى بەرىك ابدىعاليۇلى شىعىس قازاقستان وبلىسىنا ىسساپارعا بارعان بولاتىن. اتالعان ساپار بارىسىندا كاتونقاراعاي اۋدانىنداعى بەرەل قورىمىنا جۇرگىزىلىپ جاتقان قازبا جۇمىسىنا ارنايى باس سۇعىپ، ولجا تابىلعان وڭتايلى ساتكە كۋا بولىپتى. قازىنانى كوزبەن كورگەن بەرىك ابدىعاليۇلى بىردەن حالىقتان ءسۇيىنشى سۇراپ، تىڭ جاڭالىقپەن «جار سالىپ» ءبولىسۋدى ءجون كوردى.
«قازىرشە بارلىعى بولجام عانا. سەبەبى زەينوللا ساماشەۆتىڭ جەتەكشىلىك ەتۋىمەن جۇمىس ىستەپ جاتقان ەكسپەديتسيالىق توپ قازبا جۇمىسىن جالعاستىرۋدا. ال تابىلعان التىن اداممەن بىرگە ەكى جىلقىنىڭ قاڭقاسى جانە التىن پلاستينالار ەكسپەرتيزاعا جىبەرىلىپ، ساراپتاما جاسالادى. التىنمەن قاپتالعان كىسى – ايەل ادام دەگەن بولجام بار. سەبەبى ونداعى باس كيىمنىڭ نوبايى ساۋكەلەگە ۇقسايدى. جانە تەرىدەن جاسالعان بەلبەۋ جاقسى ساقتالىپتى، ونى ايەل ادامنىڭ بۇيىمى دەۋگە تولىق نەگىز بار. ال التىن پلاستينالاردا قازاقتىڭ ويۋ-ورنەكتەرى بەينەلەنگەن»، – دەپ بەرىك ابدىعاليۇلى كورگەن-بىلگەنىمەن ءبولىستى.
قازبا جۇمىستارى شىعىس قازاقستان وبلىسى اكىمدىگىنىڭ قارجىلاندىرۋمەن ءجۇرىپ جاتىر. جالپى بەرەل قورىمىنىنىڭ زەرتتەلىپ جاتقاندىعىنا جيىرما جىلعا جۋىق ۋاقىت بولدى.
بۇل – قاسيەتتى قازاق جەرىنىڭ تالاي تاريح قاتتالىپ، قۇندى مۇرالار ساقتالعان كيەلى توپىراق ەكەندىگىنىڭ تاعى ءبىر ايشىقتى ايعاعى. ءالى دە كوپ قازىنا تابىلار، قازىلىپ الىنار. از ۋاقىتتا بۇل جادىگەرلەر قالپىنا كەلتىرىلىپ، عاسىرلار قويناۋىنان ورالعان قۇرمەتتى قوناقتاي تاريحتان سىر شەرتىپ، مۋزەيلەردىڭ تورىنەن ورىن الارى ءسوزسىز. التىنمەن اپتالعان ادامدار باعالى مۇرا عانا ەمەس، بابالارىمىز ءومىر سۇرگەن كونە ءداۋىردىڭ ايقىن دالەلى رەتىندە دە قۇندى بولارى انىق.
سونىمەن قاتار، بەرىك ابدىعاليۇلى قازبا جۇمىستارى اياقتالعاننان كەيىن التىن ادامعا، جالپى تابىلعان دۇنيەلەر تۋرالى تولىقتاي تۇسىنىك بەرىلەتىنىن، ال بۇگىن توسىن جاڭالىقپەن بارشا قازاق جۇرتىن قۋانتقىسى كەلگەندىگىن اتاپ ايتتى. ەكپەديتسيا جۇمىستارى اياقتالعاننان سوڭ، توپ جەتەكشىسىمەن ارنايى سۇقبات جاسالىپ، تولىعىراق اقپارات بەرىلەتىنىن حابارلايمىز.
قر ۇلتتىق مۋزەيىنىڭ ءباسپاسوز قىزمەتى
