"ادىرنا" ۇلتتىق پورتالىنىڭ وقىرماندارىنىڭ كىشكەنتاي بۇلدىرشىندەرىنە ارنالعان قۋانىشتى جاڭالىعىمىز بار. الداعى ۋاقىتتا بەلگىلى جازۋشى-دراماتۋرگ، ادەبيەتتانۋشى، سىنشى الىبەك بايبول اۋدارعان ءارتۇرلى حالىق ەرتەگىلەرىن نازارلارىڭىزعا تۇراقتى ۇسىنىپ وتىرامىز. عيبراتى مول ەرتەگىلەردەن بالالارىڭىز قۇر قالىپ قويماسىن.
سايرامپاز قۇس (تاي ەرتەگىسى)
«ازيا حالىقتارىنىڭ ەرتەگىلەرى» تسيكلىنان
ەرتەدە داۋسى زور كىشكەنە عانا قۇس بولىپتى. ەل-جۇرت وعان «بۇل – مەنىكى» دەپ ات قويىپ، ايدار تاعىپتى، سەبەبى ول اركەز ەگىستىك پەن وزەندەر ۇستىنەن ۇشىپ وتەردە:
– بۇل – مەنىكى، بۇل – مەنىكى! – دەپ ساڭق ەتە قالاتىن ۇقسايدى.
بىردە الگى قۇس پىسكەن جەمىس اعاشىن تاۋىپ الادى. جەمىستىڭ كوپتىگى سونشالىق، ول ءبىر جىلدا دا تاۋىسىپ بىتىرە الماس ەدى. اعاش ماڭىندا بىردە-ءبىر قاناتتى بولعان جوق.
تۇرقى شاعىنداۋ قۇس تابان استىنداعى ولجاسىنا تاڭىرقاپ، اعاشقا قونا كەتىپ، بۇتاقتان بۇتاققا سەكىرىپ، وڭدى-سولدى، الدى-ارتىنداعىنىڭ ءبارىن تەگىس شوقىپ، شامالى ۋاقىتتان كەيىن توياتى قانادى. الايدا، ول وزگە دە قۇستار ءبىلىپ قويادى دەپ سەزىكتەنسە كەرەك:
– بۇل – مەنىكى، بۇل – مەنىكى، – دەپ جان-جاقتى جاڭعىرتا ساڭقىلدايدى كەپ.
داۋسىنىڭ قاتتى ەستىلگەنى سونداي، بۇكىل قۇس اتاۋلى نە بولعانىن ءبىلۋ مۇراتىندا سول جەرگە جيىلادى. الگىلەرىڭ عاجايىپ، شىرىندى، ءارى ءنارلى جەمىستەردى كورگەن بويدا-اق كوزدەرى ويناقشىپ، جازداي جادىراپ، شوقىپ-شوقىپ، پىر-پىرلاپ ۇشا جونەلەدى.
اعاشتى اينالشىقتاعان بايقۇس قۇس باعاناعى اۋەنگە باستى دەيسىڭ:
– بۇل – مەنىكى، بۇل – مەنىكى!
فوتو اشىق دەرەككوزدەن الىندى
اۋدارعان: قازاقستان جازۋشىلار وداعىنىڭ
مۇشەسى، جازۋشى-دراماتۋرگ،
ادەبيەتتانۋشى، سىنشى الىبەك بايبول.
ەرتەگى اۋدارماشىنىڭ رۇقساتىمەن جاريالاندى.
اۆتورلىق قۇقىق ساقتالعاندىقتان كوشىرىپ باسۋعا بولمايدى!
