تۇركيا ازاماتى اقتوبەلىك پوليتسەيلەرگە العىسىن ءبىلدىردى

2207
Adyrna.kz Telegram

اقتوبە وبلىسىنداعى وبلىستىق ماڭىزى بار «اقتوبە-بولگاركا-شۇبارقۇدىق» تاس جولىنىڭ 29 شاقىرىمىندا اقساي اۋىلىنىڭ ماڭىندا جول-كولىك وقيعاسى بولدى. شەتەل ازاماتى باسقارعان جۇك كولىگىنىڭ دوڭگەلەگى جارىلىپ، كيۋۆەتكە قاراي اۋدارىلعان. كولىك  جۇرگىزۋشىسى ەكرەم الپتەكين تۇركيادان قىرعىزستانعا ءدارى-دارمەك تاسىمالداۋ ءۇشىن جولعا شىققان. جۇرگىزۋشى ءرۋلدى يگەرە الماي، اۋىر جۇك كولىگى شۇڭقىرعا قاراي اۋدارىلعان، دەپ حابارلايدى اقتوبە وبلىسى پوليتسيا دەپارتامەنتىنىڭ ءباسپاسوز قىزمەتى.

ءدال وسىنداي جۇك كولىگى ياعني، ەكرەم الپتەكيننىڭ سەرىكتەسى ودان بۇرىن قىرعىزستانعا كەتكەن. ال ەكرەم سەرىكتەسىنىڭ كەرى قايتۋىن كۇتىپ دالادا قالعان. سەرىكتەسىن كۇتكەن تۇرىك ازاماتىنا تەمىر اۋدانى اقساي اۋىلىنىڭ ۋچاسكەلىك پوليتسيا ينسپەكتورى، پوليتسيا اعا لەيتەنانتى ابىلاي ءتاجين كومەك كورسەتكەن. جۇرگىزۋشىگە قاجەتتىنىڭ ءبارىن — سۋ، تاماق الىپ بەرگەن. تۇسكى اسقا ۇيىنە اپارىپ، تۇندە دەمالاتىن ورىنمەن قامتاماسىز ەتكەن.

وقيعا ورنىنا تەمىر اۋدانى پوليتسيا ءبولىمىنىڭ باستىعى، پوليتسيا پولكوۆنيگى نۇسقابەك زاۋلانباەۆ بارىپ، جاعدايلارىن سۇراپ، جەكە ءوزىنىڭ قاداعالاۋىنا الدى.

14 كۇننەن كەيىن ەكىنشى جۇك كولىگىندەگى سەرىكتەسى تاۋارلاردى تاپسىرىپ، بىشكەكتەن ورالدى. جۇرگىزۋشىلەر تاۋارعا تاپسىرىس بەرۋشىنىڭ قاتىسۋىمەن ءدارى-دارمەكتەردى باسقا كولىككە تيەپ، بىشكەككە جىبەردى.

وسىدان كەيىن ۋچاسكەلىك پوليتسيا قىزمەتكەرى كراندى بەكىتىپ، جۇك كولىگىن كيۋۆەتتەن الىپ شىعۋعا كومەكتەستى. اۆتوكولىكتى بىردەن سول ۋاقىتتا كوتەرۋ مۇمكىن بولماپتى، ويتكەنى تاپسىرىس بەرۋشى تاۋاردى قابىلدامايتىن ەدى.

ەكرەم الپتەكين تۇركياعا كەتتى، ۋچاسكەلىك پوليتسيا ينسپەكتورى ا.تاجينگە ءوزىنىڭ العىسىن ءبىلدىرىپ، بەينەجازبا جولداعان.

«اقتوبەلىك پوليتسەيلەرگە العىسىمىز شەكسىز. ءبىز ولاردىڭ كومەگىن ەشقاشان ۇمىتپايمىز. اسىرەسە ابىلايعا كورسەتكەن كومەگى ءۇشىن ريزامىز»، — دەپتى بەينەجازباسىندا ەكرەم الپتەكين.

"ادىرنا" ۇلتتىق پورتالى

پىكىرلەر