شىعىس قازاقستانداعى شىلىكتى اۋىلىندا ءىرىلى-ۇساقتى مال بەلگىسىز اۋرۋدان قىرىلىپ جاتىر. كەيىنگى ەكى اپتانىڭ ىشىندە ءبىر عانا شارۋاشىلىقتىڭ وزىندە جۇزدەگەن قوزى ولگەن، دەپ حابارلايدى «ادىرنا» ۇلتتىق پورتالى 31 ارناعا سىلتەمە جاساپ.
اۋىل تۇرعىندارى بەلگىسىز ىندەت ءساۋىر ايىنىڭ سوڭىندا باستالعانىن ايتتى. سول ۋاقىتتان بەرى جۇزدەگەن باس سيىر قىرىلىپ قالدى. قوراداعى قوزىلار دا ءولىپ قالعان. اۋىل حالقى بىلەتىن ەم-دومدارىن جاساپ جاتىر. بار ماقساتتارى - قالعان مالدى امان الىپ قالۋ.
«جەكە ءبىر ۇيدە ەمەس. بارلىق ۇيدە سول. بىراق كەلىپ جاتقان كوميسسيانى كورگەنىمىز جوق. انا ولگەن مالعا وتەماقى بەرە مە، بەرمەي مە؟ مىنا زاماندا بىلمەيمىن. سوعان كومەك جاساسا»، – دەدى شىلىكتى اۋىلىنىڭ تۇرعىنى ساۋلە ىسقاقوۆا.
حالىقتىڭ ايتۋىنشا، قىرىلىپ قالعان مالعا ەشقانداي اكت دا جاسالماعان. زايسان اۋدانى اكىمىنىڭ ورىنباسارى مال يەلەرىمەن كەزدەسكەن. ولاردىڭ ايتۋىنشا، اۋدان اكىمدىگى سوڭعى ءۇش كۇن بويى سىناما الىپ، اۋرۋدى انىقتاپ جاتىر.
«ۆەتەرينارلىق باسقارمانىڭ ماماندارى، ارنايى زەرتحانانىڭ ماماندارى كەلىپ، ارنايى سىنامالار الىنىپ، وبلىسقا اپارىپ ساراپتاما جاساتامىز»، – دەدى زايسان اۋدانى اكىمىنىڭ ورىنباسارى رينات تاۋاساروۆ.
ءىرىلى-ۇساقتى مالدىڭ بەلگىسىز اۋرۋدان قىرىلىپ جاتقاندىعى راستالدى. ال اۋىل حالقى ادامعا جۇقپاي ما دەپ الاڭداپ وتىر.
"ادىرنا" ۇلتتىق پورتالى
