Shyǵys Qazaqstandaǵy Shilikti aýylynda irili-usaqty mal belgisiz aýrýdan qyrylyp jatyr. Keıingi eki aptanyń ishinde bir ǵana sharýashylyqtyń ózinde júzdegen qozy ólgen, dep habarlaıdy «Adyrna» ulttyq portaly 31 arnaǵa silteme jasap.
Aýyl turǵyndary belgisiz indet sáýir aıynyń sońynda bastalǵanyn aıtty. Sol ýaqyttan beri júzdegen bas sıyr qyrylyp qaldy. Qoradaǵy qozylar da ólip qalǵan. Aýyl halqy biletin em-domdaryn jasap jatyr. Bar maqsattary - qalǵan maldy aman alyp qalý.
«Jeke bir úıde emes. Barlyq úıde sol. Biraq kelip jatqan komıssııany kórgenimiz joq. Ana ólgen malǵa ótemaqy bere me, bermeı me? Myna zamanda bilmeımin. Soǵan kómek jasasa», – dedi Shilikti aýylynyń turǵyny Sáýle Ysqaqova.
Halyqtyń aıtýynsha, qyrylyp qalǵan malǵa eshqandaı akt da jasalmaǵan. Zaısan aýdany ákiminiń orynbasary mal ıelerimen kezdesken. Olardyń aıtýynsha, aýdan ákimdigi sońǵy úsh kún boıy synama alyp, aýrýdy anyqtap jatyr.
«Veterınarlyq basqarmanyń mamandary, arnaıy zerthananyń mamandary kelip, arnaıy synamalar alynyp, oblysqa aparyp saraptama jasatamyz», – dedi Zaısan aýdany ákiminiń orynbasary Rınat Taýasarov.
Irili-usaqty maldyń belgisiz aýrýdan qyrylyp jatqandyǵy rastaldy. Al aýyl halqy adamǵa juqpaı ma dep alańdap otyr.
"Adyrna" ulttyq portaly
