جۇمابەك باجاسىنىڭ كەسىرىنەن قىزمەتىنەن ايىرىلدى ما؟

834

ناۋرىز ايىندا الەۋمەتتىك جەلىدە تاراعان «جۇمابەكتىڭ باجاسى» دەگەن ۆيدەودان كەيىن قىزۋ تالقىعا تۇسكەن جۇمابەك تولەگەننىڭ لاۋازىمى تومەندەگەن بولاتىن. بۇل تۋرالى تۇركىستان وبلىستىق پوليتسيا دەپارتامەنتىنىڭ رەسمي وكىلى سالتانات قاراكوزوۆا ايتتى، دەپ حابارلايدى «ادىرنا» ۇلتتىق پورتالى.

«جۇمابەك تولەگەن ەكى اپتا بۇرىن ينسپەكتور لاۋازىمىنا تومەندەدى. قازىرگى ۋاقىتتا وتىرار اۋداندىق پوليتسيا بولىمىندە جۇمىس ىستەيدى. ءوزى بۇرىننان وتباسىمەن سوندا تۇرادى. ينسپەكتور بولعانعا دەيىن ءبىر اي رەزەرۆتە تۇردى»، - دەدى قاراكوزوۆا.

ايتا كەتەيىك، بۇعان دەيىن جەلىلەردە ۆيدەو تاراعان. وندا قارسى جولمەن كەلە جاتقان كولىكتى پوليتسەيلەر توقتاتقان. الايدا جۇرگىزۋشى ءتارتىپ ساقشىسىنىڭ ءسوزىن ەلەمەي، «جۇمابەككە حابارلاس» دەپ وقيعا ورنىنان كەتىپ قالعان كورىنەدى.

تۇركىستان وبلىستىق پد وكىلدەرى جۇرگىزۋشىنى ۇستاعان. ال ونى جىبەرە سالعان قىزمەتكەرگە قاتىستى تەكسەرىس جۇرگەن بولاتىن.

بۇدان ەيىن جۇمابەك دەگەننىڭ كىم ەكەنى انىقتالعان ەدى. وڭىرلىك پوليتسياداعىلار وتىرار اۋداندىق پب-دا شىن مانىندە جۇمابەك تولەگەن دەگەن پوليتسيا مايورى جۇمىس ىستەيتىنىن مالىمدەگەن. ول اكىمشىلىك پوليتسيا بولىمشەسىنىڭ باستىعى، ونىڭ قولاستىندا ەكى قىزمەتكەر بولعان.

ىزىنشە «جۇمابەك جۇمىستان شىقتى» دەگەن اقپارات تاراعان. بىراق پوليتسياداعىلار بۇل اقپاراتتى جوققا شىعارىپ، جۇمابەك تولەگەن بولىمشە باسشىسى لاۋازىمىنان ايىرىلعانى راس، بىراق ىشكى ىستەر ورگاندارىندا قالاتىنىن ايتقان بولاتىن.

"ادىرنا" ۇلتتىق پورتالى

(فوتو inbusiness.kz سايتىنان)

پىكىرلەر
رەداكتسيا تاڭداۋى