سوڭعى قوڭىراۋدا مۇعالىمدەرگە سىيلىق الۋعا تىيىم سالىندى

607

سوڭعى قوڭىراۋدا مۇعالىمدەرگە سىيلىق الۋعا تىيىم سالىنعانىن ءبىلىم جانە عىلىم ۆيتسە-ءمينيسترى شولپان كارينوۆا مالىمدەدى، دەپ حابارلايدى «ادىرنا» ۇلتتىق پورتالى inbusiness.kz سايتىنا سىلتەمە جاساپ.

«بيىلعى شەكتەۋ شارالارىن ەسكەرىپ، 25 مامىردا وتەتىن سوڭعى قوڭىراۋعا بىرنەشە فورمات ۇسىنىلدى. ءبىرىنشىسى، ءداستۇرلى تۇردە تازا اۋادا 9-11-سىنىپ وقۋشىلارى مەن 300-گە دەيىن وقۋشىسى بار ءارى وسى ۋاقىتقا دەيىن شتاتتىق رەجيمدە ءبىلىم بەرگەن مەكتەپتەرگە ارنالعان سوڭعى قوڭىراۋ. بۇدان بولەك ەكى نۇسقا بار. ونىڭ ءبىرى سوڭعى قوڭىراۋدى سىنىپ ىشىندە، ەكىنشىسى ونلاين وتكىزۋ. قاجەت دەپ سانالسا، سىنىپ ىشىندە وتكىزۋ نۇسقاسى ۇسىنىلادى. ال قاشىقتان وقىتىپ جاتقاندار ءۇشىن سوڭعى قوڭىراۋ مەرەكەسى ونلاين رەجيمدە بولادى»، – دەدى شولپان كارينوۆا.

سونىمەن قاتار ۆيتسە-مينيستر سوڭعى قوڭىراۋدا مۇعالىمدەرگە سىيلىق الۋعا تىيىم سالىنعانى تۋرالى دا ايتتى.

«سوڭعى قوڭىراۋ وتكىزۋدىڭ نەگىزگى ماقساتى – بارلىق مەكتەپ وقۋشىلارى ءۇشىن بەلگىلى ءبىر سىنىپتى اياقتاپ، كەلەسى سىنىپقا ءوتۋ جانە جازعى دەمالىستىڭ باستالۋى. 9-11 سىنىپتار ءۇشىن سوڭعى قوڭىراۋ مەكتەپ ءبىتىرۋ ءىس-شاراسى بولىپ سانالادى. بارلىق سانيتارلىق تالاپتىڭ قاتاڭ ساقتالۋىن مەكتەپ اكىمشىلىگى نازارعا الۋعا ءتيىس. ءار وقۋشىمەن، ءار مەكتەپ بىتىرۋشىمەن كەلەتىن اتا-انانىڭ سانى بىردەن اسپاۋى كەرەك. سوڭعى قوڭىراۋدا مۇعالىمدەرگە سىيلىق الۋعا تىيىم سالىندى»، – دەدى ول.

"ادىرنا" ۇلتتىق پورتالى

پىكىرلەر
رەداكتسيا تاڭداۋى