8 مامىردا كوروناۆيرۋسقا قارسى ۆاكتسينا العان الماتىلىق اۋرۋحاناعا ءتۇستى. رىمتاي اليمپياەۆ «سپۋتنيك V» ۆاكتسيناسىنىڭ ەكىنشى كومپونەنتىن الىپ ۇيىنە كەلگەن سوڭ، ءوزىن جايسىز سەزىنگەن. ول 9 مامىر كۇنى تاڭعا جۋىق قالشىلداپ اۋىرىپ، ەسىنەن تانىپ قالعان. بۇل تۋرالى Azattyq Rýhy تىلشىسىنە ناۋقاستىڭ تۋىستارى مالىمدەدى، دەپ حابارلايدى «ادىرنا» ۇلتتىق پورتالى.
جەدەل جاردەم قىزمەتى 44 جاستاعى ازاماتتى قالالىق №4 كلينيكالىق اۋرۋحاناسىنا جەتكىزىپ، بىردەن جانساقتاۋ بولىمىنە جاتقىزىلىپتى. ناۋقاستىڭ اپكەسى گۇلزيرا اليمپياەۆانىڭ ايتۋىنشا، ءىنىسى اۋرۋحاناعا تۇسەردەن ءبىر كۇن بۇرىن №5 قالالىق ەمحانادا «سپۋتنيك V» ۆاكتسينانىڭ ەكىنشى كومپونەنتىن سالدىرعان.
«ءىنىم وسى كۇنگە دەيىن ارنايى اسكەري جاساقتا ىستەپ، زەينەتكە شىققان. ونداي اسكەري ادامدار ىلعي دارىگەرلەردىڭ باقىلاۋىندا بولادى. جىل سايىن تەكسەرىلىپ وتىرادى. دەنساۋلىعىنا قاتىستى شاعىم ايتقان ەمەس. زەينەت دەمالىسىنا شىققان سوڭ ءبىر مەديتسينالىق مەكەمەدە جۇرگىزۋشى بولىپ جۇمىس ىستەپ جۇرگەن. سول جەرە ۆاكتسينا الۋعا ماجبۇرلەگەنى بەلگىلى بولدى. جۇمىستان شىعاسىڭ دەپ قورقىتۋ بولعان. بالا-شاعاسى بار، كىم جۇمىسىنان ايىرىلعىسى كەلەدى. سوندىقتان امالسىز بارعان. ۆاكتسينانىڭ 1-ءشى كومپونەنتىن الماتىداعى №5 ەمحانادان العان. بىراق ول ازاماتتا اللەرگيالىق اۋرۋ بەلگىلەرى بولاتىن. كەز-كەلگەن پرەپاراتقا، انتيبيوتيكتەرگە اللەرگياسى بولعان. ەمحانادا مەدوتۆود (ۆاكتسينادان باس تارتۋ جاعدايى - رەد.) جاساماعان بولىپ تۇر. اۋىزشا سۇراعان دا، سالا سالعان»، - دەيدى گۇلزيرا اليمپياەۆا.
ۆاكتسينانىڭ ءبىرىنشى كومپونەنتىن العان سوڭ باس اۋرۋى باستالعان. اۋىرعانىن باسۋ ءۇشىن ۇنەمى ءدارى ىشكەن. ارادا 21 كۇن وتكەن سوڭ رىمتاي اليمپياەۆقا حابارلاما كەلىپ، ەكىنشى كومپونەنتىن الۋعا ءماجبۇر بولعان. 8 مامىردا ەكىنشى كومپونەنتىن العاننىڭ ەرتەڭىنە ۇيقىدان تۇرعاندا، كيىنىپ جاتىپ دىرىلدەپ قۇلاعان. سوسىن ونى جەدەل جاردەم قىزمەتى №4 كلينيكالىق اۋرۋحاناعا جەتكىزىلگەن.
«جارايدى، ول كۇنى مەرەكە. كەزەكشى دارىگەرلەر قاراعانىمەن، ناقتى دياگنوزىن ايتپايدى. بىرەۋلەر ىسىك بار دەيدى، بىرەۋى گەموتوما بار دەيدى. مرت تۇسىرىڭدەر دەدى. مەرەكە كۇندەرى ول جەرلەر جابىق بولدى. بىرەسە نەۆرولوگياعا، بىرەسە، رەانيماتسياعا جاتقىزدى. ءىنىم جاقىندا عانا سكرينينگتەن وتكەن، دەنى ساۋ بولىپ شىققان. سوندىقتان بىزدە كۇمان تۋىپ وتىر. ءبىز بۇل ساۋ ادامنىڭ ەكپەدەن سوڭ، اۋرۋحاناعا اۋىر جاعدايدا تۇسكەنىنەن سوڭ، وسىلاي دابىل قاعىپ، دەنساۋلىق ساقتاۋ باسقارماسىنا كەلىپ تۇرمىز. ەندى وسىدان سوڭ قالاي ۆاكتسينا الۋعا بولادى؟ تولىق تەكسەرۋدەن وتكىزىپ، ونىڭ قانداي دارىلەرگە قارسى كورسەتىلىمى بار، سونى ءبىلىپ بارىپ سالۋى كەرەك ەدى. ءبىرىنىش كومپونەنتتەن سوڭ ول باسىنىڭ اۋىرعانىن ايتقان سوڭ، ەكىنشىسىن تولىق تەكسەرىپ بارىپ سالماي ما؟! قان قىسىمىن ولشەگەن دە، سالا سالعان. ناتيجەسى وسى»، - دەيدى ناۋقاستىڭ تۋىسى.
ناۋقاستىڭ جاقىندارىنىڭ تالابى - ۆاكتسينادان سوڭ اۋرۋحاناعا تۇسكەن ازاماتتىڭ دەنساۋلىعىنا نەمقۇرايلى قاراماۋ. بىلىكتى دارىگەرلەردى جيناپ، دۇرىستاپ كەڭەسىپ، ونىڭ ايىعىپ كەتۋىنە جاعداي جاساپ بەرۋىن سۇرايدى.
الماتى قالالىق قوعامدىق دەنساۋلىق ساقتاۋ باسقارماسى وكىلدەرى رىمتاي اليمپياەۆتىڭ تۋىستارىنىڭ شاعىمىنان سوڭ، №4 كلينيكالىق اۋرۋحانادا بىلىكتى مامانداردىڭ كەڭەسى بولاتىنىن ايتتى. بۇگىن تۇستەن كەيىن ناۋقاستىڭ ناقتى دياگنوزى ايتىلماق. باسقارما باسشىسىنىڭ ورىنباسارى سۆەتلانا سۇلتانعازيەۆا ناۋقاستىڭ اۋرۋحاناعا ءتۇسۋى كوروناۆيرۋسقا قارسى ەكپەمەن بايلانىستى بولماۋى مۇمكىن ەكەنىن دە ايتادى.
«ءبىز ونىڭ ۆاكتسيناتسيامەن بايلانىسى بولماۋى مۇمكىن دەگەن بولجامدى دا قاراستىرىپ وتىرمىز. ونىڭ نەۆرولوگيالىق جۇيەسىندە باسقا اۋرۋلارى بولۋى مۇمكىن دەپ بولجاپ وتىرمىز. قازىر كونسيليۋم جيناپ جاتىرمىز. سونىڭ قورىتىندىسىنا قاراپ، ءبىز سىزدەرگە ناقتى جاۋاپ ايتامىز. ول جەردە باس دارىگەر پروفەسسورلىق-وقىتۋشىلىق قۇرامدى جيناپ، وسى ناۋقاستىڭ جاعدايىن سارالاپ جاتىر. ناۋقاستىڭ تۋىستارىنا قاجەتتى اقپاراتتاردى بەرەمىز. ءيا، بۇگىن ءۇشىنشى تاۋلىك بولدى. ءبىز ناتيجەسىن الىپ، ءتيىستى جەرلەرگە، سونىڭ ىشىندە باق-قا اقپارات بەرەمىز. ناۋقاس قازىر نەۆرولوگيا بولىمىندە جاتىر. كەشە رەانيماتسياعا تۇسكەن، قايتادان نەۆرولوگياعا اۋىستىرىلدى»، - دەيدى قالالىق قوعامدىق دەنساۋلىق ساقتاۋ باسقارماسى باسشىسىنىڭ ورىنباسارى.
ايتا كەتۋ كەرەك، الماتىدا 6 مامىردا وسىعان ۇقساس جاعداي بولدى. الەۋمەتتىك جەلىلەردە الماتى تۇرعىنى باقىتجان ءنۇرتازيننىڭ ۆاكتسينا العاننان كەيىن قايتىس بولعانى جايلى اقپارات تارادى. ب. نۇرتازين ەسىمدى 42 جاستاعى ازامات 12 ساۋىردە كوروناۆيرۋس ينفەكتسياسىنا قارسى ۆاكتسينانىڭ العاشقى دوزاسىن الۋ ءۇشىن ەمحاناعا جۇگىنگەن. ول 21 كۇننەن كەيىن ۆاكتسينانىڭ ەكىنشى كومپونەنتىن العان. بىراق جاعدايى ۇيىندە ناشارلاعان. جەدەل جاردەم كەلگەنگە دەيىن قايتىس بولعان ەدى.
الدىن الا بولجامعا سايكەس، مارقۇم جەدەل جۇرەك-قانتامىر جەتىسپەۋشىلىگىنەن قايتىس بولعان. قازىر ءولىم سەبەپتەرىن انىقتاۋ ءۇشىن تەرگەۋ جۇرگىزىلىپ جاتىر، سوت-مەديتسينالىق ساراپتاما باستالدى، دەلىنگەن حابارلامادا.
"ادىرنا" ۇلتتىق پورتالى
