ەكسپو. تورتكۇل دۇنيە كوز تىككەن دۇنيەجۇزىلىك كورمە، ءدۇبىرلى مەرەكە. تمد جانە شىعىس ەۋروپا ەلدەرى اراسىندا العاش رەت «ەكسپو – 2017» كورمەسىن وتكىزىپ جاتقان ەلىمىزدىڭ استاناسى قاپتاعان حالىق پەن شەتەل تۋريستەرىنە تولدى. التى الاشتىڭ اقورداسى ءان مەن جىرعا بولەندى.
حالىقارالىق «ەكسپو – 2017» كورمەسىنە وراي الماتى مادەنيەت كۇندەرى اياسىندا «الاتاۋ» ءداستۇرلى ونەر تەاترى دا استاناعا گاسترولدىك ساپارمەن بارىپ، ءدۇبىرلى مەرەكەگە ءۇن قوسىپ قايتتى.
16-17 ماۋسىم كۇندەرى استانا جاستار تەاترىندا جانە ەتنواۋىلدا تەاتردىڭ كونتسەرتتىك باعدارلاماسىن قويىپ، «ءىنجۋ-مارجان»، «ماڭگىلىك مۇرات» ءداستۇرلى مۋزىكا كەشتەرىن وتكىزدى. ۇلتتىق ونەرىمىزدى ۇلىقتاپ، رۋحاني مۇرامىزدى دارىپتەۋ ماقساتىندا وتكەن كەشتەرگە تەاترىمىزدىڭ قاراسوزدىڭ قايماعىن قالقىپ، سۇبەلى ءسوزدى سارقىتتاي ساقتاعان، سەمسەرىن جىرعا سۋارعان، وت اۋىزدى، وراق ءتىلدى جىرشىلارى مەن تەرمەشىلەرى جانە كومەيىنە بۇلبۇل ۇيالاعان جەزتاڭداي انشىلەرى ونەر كورسەتتى. ولاردىڭ كوشىن باستاپ ءداستۇرلى ءان ونەرىنىڭ ناسيحاتتاۋشىلارى، حالىققا تانىمال ونەر يەلەرى ساۋلە جانپەيىسوۆا، ەركىن شۇكىمانوۆ، جاكەن وماروۆ، امانقوس سادىقوۆ، الما امانجولوۆا سىندى ساحنا مايتالماندارى تۇر. سونىمەن قاتار، باعدات سامەدينوۆا، نۇرجان جانپەيىسوۆ، مۇرات ابۋعازى، تالعات ابۋعازى، بولات بوكەنوۆ، سايات مەدەۋوۆ جانە «قوڭىر» توبى مەن «سازگەن سازى» فولكلورلىق-ەتنوگرافيالىق ءانسامبلىنىڭ قاتىسۋى ءداستۇرلى مۋزىكا كەشىنىڭ ءسانىن كەلتىرىپ، كوركىن قىزدىرا ءتۇستى.
جاندى داۋىستا، ۇلتتىق مۋزىكالىق اسپاپتاردىڭ سۇيەمەلدەۋىمەن وتكەن كونتسەرتتىك ءىس-شارانى ارقا جۇرتى جانە استانا قالاسىنىڭ قوناقتارى جىلى قابىلدادى. ونى زال تولى كورەرمەن مەن ولاردىڭ ىستىق ىقىلاسقا تولى قوشەمەتىنەن بايقادىق.
ەلباسىمىز ن.ءا.نازارباەۆ «مادەني مۇرا» باعدارلاماسىندا: «ادامزات تاريحىنىڭ كۇرەتامىرى – مادەنيەت. مادەنيەت – ۇلتتىڭ بەت-بەينەسى، رۋحاني بولمىسى، جانى، اقىل-ويى، پاراساتى» دەپ اتاي وتىرىپ، «ماقساتىمىز – حالقىمىزدىڭ وسكەلەڭ رۋحاني-مادەني سۇرانىسىن قاناعاتتاندىرۋ» دەگەن بولاتىن. ەندەشە، اتا-بابامىزدان مۇراعا قالعان ۇلتتىق ونەرىمىزگە قامقورلىق كورسەتۋ، ونى جان-جاقتى ناسيحاتتاۋ ماقساتىندا شاڭىراق كوتەرگەن «الاتاۋ» ءداستۇرلى ونەر تەاترىنىڭ اتقارار قىزمەتى زور.
الەمنىڭ التى قۇرىلىعىنان، دۇنيەجۇزىنىڭ الپاۋىت مەملەكەتتەرى باس قوسقان «ەكسپو – 2017» دۇنيەجۇزىلىك كورمەسىندە ونەر كورسەتكەن تەاتر ونەرپازدارى استانا اسپانىندا ءان شالقىتىپ، سارىارقانىڭ سايىن دالاسىن سازدى اۋەنمەن تەربەتتى. ارتىلعان ءىستى ابىرويمەن اتقاردى. الايدا، ءۇمىت اقتالدى، ءىس تىندى دەپ ارقانى كەڭگە سالاتىن تەاتر ۇجىمى ەمەس، ولار بۇگىندە كەڭ تىنىس، جاڭا لەپپەن «ۇلى دالا رۋحى» كوشپەندىلەر فەستيۆالىندە قويىلاتىن كونتسەرتتىك باعدارلاماعا دايىندىق ۇستىندە. فەستيۆال «الاتاۋ» اۋدانى «بورالداي ساق قورعانىندا» وتەدى. كەلىڭىزدەر! ءيسى قازاقتىڭ ءيىسى اڭقىعان كوشپەندىلەر وركەنيەتى فەستيۆالىندە كەزدەسەيىك!
ءمولدىر جاميحان
