EKSPO. Tórtkúl dúnıe kóz tikken dúnıejúzilik kórme, dúbirli mereke. TMD jáne Shyǵys Eýropa elderi arasynda alǵash ret «EKSPO – 2017» kórmesin ótkizip jatqan elimizdiń Astanasy qaptaǵan halyq pen shetel týrısterine toldy. Alty Alashtyń Aqordasy án men jyrǵa bólendi.
Halyqaralyq «EKSPO – 2017» kórmesine oraı Almaty mádenıet kúnderi aıasynda «Alataý» dástúrli óner teatry da Astanaǵa gastroldik saparmen baryp, dúbirli merekege ún qosyp qaıtty.
16-17 maýsym kúnderi Astana Jastar teatrynda jáne Etnoaýylda teatrdyń konerttik baǵdarlamasyn qoıyp, «Injý-marjan», «Máńgilik murat» dástúrli mýzyka keshterin ótkizdi. Ulttyq ónerimizdi ulyqtap, rýhanı muramyzdy dáripteý maqsatynda ótken keshterge teatrymyzdyń qarasózdiń qaımaǵyn qalqyp, súbeli sózdi sarqyttaı saqtaǵan, semserin jyrǵa sýarǵan, ot aýyzdy, oraq tildi jyrshylary men termeshileri jáne kómeıine bulbul uıalaǵan jeztańdaı ánshileri óner kórsetti. Olardyń kóshin bastap dástúrli án óneriniń nasıhattaýshylary, halyqqa tanymal óner ıeleri Sáýle Janpeıisova, Erkin Shúkimanov, Jáken Omarov, Amanqos Sadyqov, Alma Amanjolova syndy sahna maıtalmandary tur. Sonymen qatar, Baǵdat Samedınova, Nurjan Janpeıisov, Murat Ábýǵazy, Talǵat Ábýǵazy, Bolat Bókenov, Saıat Medeýov jáne «Qońyr» toby men «Sazgen sazy» folklorlyq-etnografııalyq ansambliniń qatysýy dástúrli mýzyka keshiniń sánin keltirip, kórkin qyzdyra tústi.
Jandy daýysta, ulttyq mýzykalyq aspaptardyń súıemeldeýimen ótken konerttik is-sharany Arqa jurty jáne Astana qalasynyń qonaqtary jyly qabyldady. Ony zal toly kórermen men olardyń ystyq yqylasqa toly qoshemetinen baıqadyq.
Elbasymyz N.Á.Nazarbaev «Mádenı mura» baǵdarlamasynda: «adamzat tarıhynyń kúretamyry – mádenıet. Mádenıet – ulttyń bet-beınesi, rýhanı bolmysy, jany, aqyl-oıy, parasaty» dep ataı otyryp, «maqsatymyz – halqymyzdyń óskeleń rýhanı-mádenı suranysyn qanaǵattandyrý» degen bolatyn. Endeshe, ata-babamyzdan muraǵa qalǵan ulttyq ónerimizge qamqorlyq kórsetý, ony jan-jaqty nasıhattaý maqsatynda shańyraq kótergen «Alataý» dástúrli óner teatrynyń atqarar qyzmeti zor.
Álemniń alty qurylyǵynan, dúnıejúziniń alpaýyt memleketteri bas qosqan «EKSPO – 2017» dúnıejúzilik kórmesinde óner kórsetken teatr ónerpazdary Astana aspanynda án shalqytyp, Saryarqanyń saıyn dalasyn sazdy áýenmen terbetti. Artylǵan isti abyroımen atqardy. Alaıda, úmit aqtaldy, is tyndy dep arqany keńge salatyn teatr ujymy emes, olar búginde keń tynys, jańa leppen «Uly dala rýhy» kóshpendiler festıvalinde qoıylatyn konerttik baǵdarlamaǵa daıyndyq ústinde. Festıval «Alataý» aýdany «Boraldaı saq qorǵanynda» ótedi. Kelińizder! Isi qazaqtyń ıisi ańqyǵan kóshpendiler órkenıeti festıvalinde kezdeseıik!
Móldir JAMIHAN
