قىتاي قازاقستانعا تارتىلعان شەتەلدىك ينۆەستيتسيا بويىنشا ءتورتىنشى ورىندا. كورشىلەس ەل جالپى 20 ميلليارد دوللارعا جۋىق كاپيتال سالعان دەپ حابارلايدى «ادىرنا» ءتىلشىسى «حابار 24»-كە سىلتەمە جاساپ.
بۇل تۋرالى قازاقستان مەن قىتايدىڭ ينۆەستيتسيالىق ىنتىماقتاستىعىنا ارنالعان دوڭگەلەك ۇستەلدە ەلىمىزدىڭ قىتايداعى ەلشىسى عابيت قويشىباەۆ مالىمدەدى. كەزدەسۋ سىچۋان پروۆينتسياسىنىڭ اكىمشىلىك ورتالىعى چەندۋ قالاسىندا ءوتتى. فورۋمعا قىتايدىڭ 20-دان استام كاسىپورىن باسشىسى قاتىسقان.
قازاقستاندىق «Kazakh Invest»، «سامۇرىق-قازىنا» جانە «استانا» حالىقارالىق قارجى ورتالىعىنىڭ وكىلدەرى جەرگىلىكتى بيزنەسمەندەرگە قازاقستاننىڭ ينۆەستيتسيالىق كليماتىن تانىستىردى. قىتاي كاسىپكەرلەرىنە قازاقستاندا جەڭىلدىك بەرۋ ساياساتى جانە ينۆەستيتسيالىق ىنتىماقتاستىقتىڭ بولاشاعى زور باعىتتارى، ەكونوميكانىڭ ءوندىرىس جانە شيكىزاتتىق ەمەس سالالارى بويىنشا اقپارات بەرىلدى. قىتاي بيزنەسمەندەرى ەكى ەل اراسىنداعى، ونىڭ ىشىندە قازاقستاننىڭ سىچۋان پروۆينتسياسىمەن ءوزارا ساۋدا-ەكونوميكالىق ءىس-ارەكەتتى دامىتۋ جوسپارىن جاريا ەتتى.
"سىچۋان پروۆينتسياسىنىڭ ورنالاسقان جەرى قولايلى، ەۋروپا مەن ازيانى جالعاپ تۇر. بۇدان باسقا ايماقتا اقپاراتتىق تەحنولوگيالار، تسيفرلىق ەكونوميكا، چيپتەر، جارتىلاي وتكىزگىشتەر وندىرىسىنە جانە جاڭا ەنەرگەتيكاعا ينۆەستيتسيا سالىنىپ جاتىر. قازاقستان دا ەكونوميكالىق ترانسفورماتسيا جاساعالى جاتقانىن ەستىدىم. ءوز تاراپىمىزدان قولداۋ كورسەتسەك دەيمىز. بولاشاقتا قازاقستاندىق عىلىمي-تەحنيكالىق وندىرىستىك پارك اشۋدى جوسپارلاپ وتىرمىز",–دەپ مالىمدەدى ەۋرازيالىق ەكونوميكالىق ىنتىماقتاستىق ۇيىمى كوميتەتىنىڭ توراعاسى لي پەي.
«ادىرنا» ۇلتتىق پورتالى
