اقش مەملەكەتتىك دەپارتامەنتىنىڭ باسشىسى ەنتوني بلينكەن ءبىر سوزىندە الداعى 2022 جىلى پەكيندە وتەتىن قىسقى وليمپيادا ويىندارىنا اقش بويكوت جاريالاۋى مۇمكىن دەگەندى ايتىپ قالدى. بۇل، بىلايشا ايتقاندا، ءبىزدىڭ ەلگە بەرىلگەن ىم، يشارا سياقتى بولىپ كورىندى ماعان. نەگە؟
بىرىنشىدەن، سونداي جوعارى دەڭگەيدەگى باسشى جايدان-جاي ىم جاسامايدى، ول ونىڭ ستاتۋسىنا ساي ەمەس جانە سپورت ساياساتتان تىس دەگەن حالىقارالىق جازىلماعان زاڭدى ەلەمەۋشىلىك بولىپ تابىلادى. ەندەشە ونداي ويدى مەملەكەت باسشىلارى ەمەس، ازاماتتىق قوعام وكىلدەرى كوتەرگەنى قيسىندى بولماق.
ەكىنشىدەن، قىتاي ەكسپانسياسىنان شىن قورلىق كورىپ وتىرعان قاي ەل؟ شىڭجاڭداعى قازاقتاردى گەنوتسيدكە ۇشىراتىپ وتىرعان قىتاي ساياساتىنان جاپا شەگىپ وتىرعان ءبىزدىڭ ەل ەمەس پە؟ قىتاي ەلشىلىگىنىڭ الدىندا نەشەمە كۇندەردەن بەرى ادامدارىن بوساتۋدى سۇراپ زارلاعان انالاردىڭ داۋسىن ەستي تۇرا ەلشىلىكتەن ءبىر ادام شىعىپ جاۋاپ بەرمەۋىن قالاي تۇسىنۋگە بولادى؟ بۇل تەك استامشىلىق قانا ەمەس، ءتىپتى ەشقانداي مورالعا سىيمايتىن، ادامگەرشىلىكتەن جۇرداي، ناعىز يتتىك قوي؟ سوعان شىداپ ءۇن قاتپاي وتىرعان ءبىزدىڭ مەملەكەتتى قازاققا جاناشىر مەملەكەت دەۋگە كىمنىڭ اۋزى بارادى؟
تالاي قورلىقتى قازاقپەن بىردەي كورىپ كەلە جاتقان ۇيعىردا ءتىپتى مەملەكەت تە جوق. ەندەشە بىزدەر، ازاماتتىق قوعام وكىلدەرى، نەگە وسى ماسەلەنى كوتەرمەيمىز؟ ينيتسياتيۆا تومەننەن باستالعانى دۇرىس ەمەس پە؟ ايتالىق، پەكيندە وتكەلى وتىرعان قىسقى وليمپيادا ويىندارىنا بويكوت جاريالايىق! مۇنى باتىس ەلدەرى قولداسا، ەگەر اقش قولداسا باسقالارى دا قوسىلادى دەپ ويلايمىن، بۇل قىتايعا ابىروي اكەلە قويماس. ەڭ بولماعاندا ءوشىمىزدى سولاي الساق؟ ءبارىبىر باسقاشا قولىمىزدان نە كەلەدى؟
جالپى وسى وليمپيادانىڭ وتۋىنە 2014 جىلى الماتى مەن پەكين داۋىسقا ءتۇسىپ، نەبارى ءتورت داۋىسپەن پەكين جەڭىپ كەتىپتى. ال كوپتەگەن ەلدەر باستاپقىدا قاتىسقانمەن دە ارتىنان ءوز كانديداتۋرالارىن قايتىپ الىپتى. مىسالى پولشا، ۋكراينا، نورۆەگيا، شۆەتسيا قارجىلىق قيىنشىلىقتار تۋدىرادى دەگەن ەسەپپەن جارىستان باس تارتقان. ال شۆەيتساريا، يسپانيا، گەرمانيا ءوز ەلدەرىندە رەفەرەندۋم وتكىزىپ، ناتيجەسىندە حالقى قارسى شىققان.
سوندا اقشاسى كوپ، رەفەرەندۋم وتكىزۋ ويلارىنا دا كەلمەگەن، حالقىنان سۇراۋدى دا قاجەت دەپ تاپپاعان اقىماق ۇكىمەت - ەكى اۆتوريتارلىق ەلدىڭ ۇكىمەتى بولىپ وتىر. ءتىپتى باسقالار ولاردى ادەيى ارانداتىپ، ارتىنان جورتا جارىس جولىنان شىعىپ قالدى ما، كىم ءبىلىپتى؟ قالاي بولعاندا دا ءبىزدى قۇداي ساقتاپتى، ايتپەسە ناعىز كوررۋپتسيانىڭ كوكەسى، اقشا جەۋ وسى كەزدەردە ءجۇرىپ جاتار ەدى.
قۋانىش ەدىلحانتەگى
"ادىرنا" ۇلتتىق پورتالى
