قاراعاندى وبلىسىندا ءبىر اي بۇرىن جوعالىپ كەتكەن كاسىپكەردىڭ دەنەسى ونىڭ كولىگى انىقتالعان ماڭايدان ءتورت شاقىرىم قاشىقتان تابىلدى، دەپ حابارلايدى Sputnik.kz سايتى.
"5 مامىردا نۇرا اۋدانىنداعى تاسسۋات اۋىلىنىڭ ماڭىنان قاراعاندى وبلىستىق توتەنشە جاعدايلار دەپارتامەنتىنىڭ قۇتقارۋشىلارى 2021 جىلى 8 ساۋىردە جوعالىپ كەتكەن سۇلەيمەنوۆتىڭ دەنەسىن تاپتى", – دەدى توتەنشە جاعدايلار مينيسترلىگىنىڭ رەسمي وكىلى تالعات ءۋالي.
ول 10 ءساۋىر مەن 5 مامىر ارالىعىندا نۇرا وزەنى بويىنداعى ىزدەۋ جۇمىستارىنا ەحولوت، كۆادروكوپتەر جۇمىلدىرىلعانىن اتاپ ءوتتى."ىزدەستىرۋ جۇمىسىنا تىكۇشاق تا قاتىستىرىلدى. سونىمەن قاتار اەروۆيزۋالدى زەرتتەۋ ءۇشىن موتورلى پاراپلاندار قولدانىلدى. ولار شامامەن 30 شاقىرىم اۋماققا شولۋ جۇرگىزدى", – دەدى رەسمي وكىل.
وعان قوسا، مينيسترلىك وكىلى وزەن ارناسىنداعى سۋ دەڭگەيىنىڭ جوعارىلىعى مەن جاعالاۋدىڭ كۇردەلىلىگى، شۇڭقىرلار مەن سۋ استىنىڭ كورىنبەيتىندىگى جانە وسىمدىك جامىلعىسىنىڭ قالىڭدىعى ىزدەۋ جۇمىستارىنا ەداۋىر كەدەرگى بولدى دەپ ءتۇسىندىردى.
ءمايىتتىڭ جاعالاۋدان 50 مەتر، ال كولىك تابىلعان جەردەن ءتورت شاقىرىم قاشىقتا جاتقانى انىقتالدى.
قاراعاندى وبلىسى پوليتسيا باسقارماسى وكىلدەرىنىڭ ايتۋىنشا، تۋىستارى ءمايىتتى تانىعان جانە ءتيىستى ساراپتامالار تاعايىندالدى. سونىڭ ناتيجەسىندە، پروتسەسسۋالدىق شەشىم قابىلدانادى.
ايتا كەتەيىك، بۇعان دەيىن نۇرا وزەنىنەن جوعالىپ كەتكەن شارۋا قوجالىق باسشىسىنىڭ كولىگى تابىلعانى حابارلانعان. سۋعا باتقان كولىكتىڭ تەرەزەلەرى اشىق بولعان. وسىدان كەيىن قۇتقارۋشىلار جۇرگىزۋشى كولىكتەن شىعۋعا تىرىسقان دەپ بولجادى.
ال اۋىل تۇرعىندارى نۇرلان سۇلەيمەنوۆتىڭ كولىگى وزەن بەتىندەگى مۇز ۇستىمەن ءوتىپ بارا جاتقاندا سۋعا كەتكەن بولۋى مۇمكىن دەپ سانايدى.
جەرگىلىكتى بيلىك وكىلدەرى بولسا، مۇنداي ۋاقىتشا وتكەلدى پايدالانۋعا تىيىم سالىنعانىن ەسكە سالدى. ولار 30 شاقىرىم قاشىقتا ساپالى ءارى قاۋىپسىز كوپىر بەر ەكەندىگىن العا تارتادى.
