فوتو: ANTONIO MASIELLO/GETTY IMAGES
ماۋسىم ايىنىڭ ەكىنشى جارتىسىندا باتىس ەۋروپادا تىركەلگەن رەكوردتىق ىستىق سالدارىنان كەمىندە 12 مىڭ ادام مەزگىلسىز قايتىس بولدى. مۇنداي دەرەكتى 16 شىلدەدە AFP اگەنتتىگى بەلگيا، گەرمانيا، يسپانيا، ليۋكسەمبۋرگ، نيدەرلاند، فرانتسيا جانە شۆەيتساريا ەلدەرىنىڭ مالىمەتتەرىن قورىتىندىلاي وتىرىپ جاريالادى، دەپ حابارلايدى “ادىرنا”.
تالداۋعا سايكەس، 22–28 ماۋسىم ارالىعىندا، اتالعان جەتى ەلدە وتكەن جىلدارداعى وسى كەزەڭمەن سالىستىرعاندا شامامەن 10 مىڭ ادامعا ارتىق ءولىم تىركەلگەن. ال ۇلىبريتانيانىڭ مەتەورولوگيالىق قىزمەتىنىڭ مالىمەتىنشە، 18–28 ماۋسىم ارالىعىندا انگليا مەن ۋەلستە تاعى 2200-گە جۋىق ءولىم تىركەلگەن. AFP زەرتتەۋى شىعىس ەۋروپا ەلدەرىن قامتىماعان.
دۇنيەجۇزىلىك دەنساۋلىق ساقتاۋ ۇيىمىنىڭ (ددۇ) ەۋروپالىق وڭىرلىك بيۋروسىنىڭ ديرەكتورى حانس كليۋگە مۇنداي ولىمدەردىڭ باسىم بولىگىنىڭ الدىن الۋعا بولاتىنىن ايتتى. ونىڭ سوزىنشە، قاجەتتى ۇسىنىمدار بۇرىننان جاريالانعانىنا قاراماستان، كوپتەگەن ۇكىمەتتەر اپتاپ ىستىقتى قوعامدىق دەنساۋلىق ساقتاۋ سالاسىنداعى توتەنشە جاعداي ەمەس، جاي عانا اۋا رايى قۇبىلىسى رەتىندە قابىلداپ كەلەدى.
«ۇكىمەتتىڭ بۇدان كەيىن قانداي ارەكەت جاسايتىنى – ءوز تاڭداۋى. بيىلعى جاز ماسەلەنىڭ قانشالىقتى ماڭىزدى ەكەنىن كورسەتتى»، – دەدى ول.
گەرمانيانىڭ فەدەرالدىق ستاتيستيكا باسقارماسىنىڭ مالىمەتىنشە، 22–28 ماۋسىم ارالىعىندا كەي وڭىرلەردە اۋا تەمپەراتۋراسى 41 گرادۋس تسەلسيدەن اسىپ، وسى كەزەڭدە شامامەن 23,9 مىڭ ادام قايتىس بولعان. بۇل ەكى اپتا بۇرىنعى كورسەتكىشتەن 7100 ادامعا كوپ.
ال بۇعان دەيىن روبەرت كوح ينستيتۋتى (RKI) ماۋسىمنىڭ اسا ىستىق اپتاسىندا 4310 ارتىق ءولىم، ال جالپى ماۋسىم ايىندا شامامەن 5100 ارتىق ءولىم بولعانىن باعالاعان.
بۇعان دەيىن ددۇ مەن ەۋروپالىق اۋرۋلاردىڭ الدىن الۋ جانە باقىلاۋ ورتالىعىنىڭ (ECDC) قولداۋىمەن جۇمىس ىستەيتىن EuroMOMO باعدارلاماسى ەۋروپادا اپتاپ ىستىقتان 10 مىڭنان استام ادامنىڭ قايتىس بولعانىن حابارلاعان ەدى. زەرتتەۋ 27 ەۋروپالىق ەلدىڭ ۇلتتىق ستاتيستيكاسىنا نەگىزدەلگەن.
مالىمەتتەرگە سايكەس، اپتاپ ىستىققا بايلانىستى قايتىس بولعانداردىڭ باسىم بولىگى 65 جاستان اسقان ادامدار. ويتكەنى اۋا تەمپەراتۋراسىنىڭ شامادان تىس كوتەرىلۋى كۇن ءوتۋدى عانا ەمەس، جۇرەك-قان تامىرلارى جانە تىنىس الۋ جۇيەسى اۋرۋلارىنىڭ اسقىنۋىن دا تۋىنداتادى. مۇنداي قاۋىپكە ەگدە جاستاعى ادامدار الدەقايدا وسال كەلەدى.
