قىرعىز-تاجىك شەكاراسىندا باستالعان جانجالعا نۇكتە قويىلدى. «ادىرنا» ۇلتتىق پورتالىنىڭ ءتىلشىسى ەكى ەل اراسىنداعى قاقتىعىستىڭ نەدەن باستالىپ، وقيعانىڭ قالاي وربىگەنىن باياندايدى.
اتىس نەدەن باستالدى؟
28 ساۋىردە قىرعىز-تاجىك شەكاراسىندا قاقتىعىس بولدى. قاقتىعىس كەشكى ۋاقىتتا تاجىك تاراپى قىرعىزستاننىڭ كوك-تاش اۋىلىنا جاقىن جەردەگى باعاناعا بەينەباقىلاۋ كامەراسىن قويماق بولعانىنان باستالعان. تاجىكستاندىقتار كامەرانى سۋدى ادىلەتتى ءبولۋ پروتسەسىن باقىلاۋ ءۇشىن قويعان. جەرگىلىكتى تۇرعىندار باقىلاۋ كامەراسىن الىپ تاستاۋدى تالاپ ەتىپ، ىزىنشە كەلىسپەي قالعان. ناتيجەسىندە قوس تاراپتان 100-150 ادام ءبىر-بىرىنە تاس لاقتىرعان.
ال 29 ساۋىردە ەكى ەل اراسىنداعى جاعداي ۋشىعىپ، اتىس باستالعان. ولار اتىس بارىسىندا اۆتومات جانە پۋلەمەت قولدانعان دەگەن فاكتىلەر بار.
قارۋلى قاقتىعىستى قاي ەلدىڭ باستاعانى بەلگىسىز. قىرعىز ەلىنىڭ وكىلدەرى تاجىكستاندىقتار جانجالدى ءبىرىنشى باستادى دەسە، تاجىكستان تاراپى قىرعىز ەلىنىڭ تاجىك شەكاراشىلارىنا وق اتىپ باستاعانىن ايتتى.
قانشا ادام زارداپ شەكتى؟
بۇگىنگى مالىمەت بويىنشا قاقتىعىس سالدارىنان قىرعىزستاننان جالپى 183 ادام زارداپ شەككەن. بۇل تۋرالى ەلدىڭ دەنساۋلىق ساقتاۋ ءمينيسترىنىڭ ورىنباسارى اليزا سولتونبەكوۆا حابارلادى. زارداپ شەگۋشى 99 ادامنىڭ 56-سى بىشكەك مەديتسينالىق مەكەمەلەرىندە ەمدەلىپ جاتىر. ال قايتىس بولعاندار سانى 35-كە جەتكەن.
ال تاجىكستان ۇكىمەتى رەسمي مالىمدەمە جاساعان جوق. دەسە دە Sputnik تاجىكستان سەكىلدى جەرگىلىكتى باسىلىمدار ازىرگە راستالماعان اقپارات بويىنشا، قازا تاپقاندار سانى 20-عا جەتۋى، ال جاراقات العاندار 160 بولۋى مۇمكىن دەيدى.
قىرعىز-تاجىك قاقتىعىسى اياقتالدى ما؟
قوس تاراپ اتىستى تولىعىمەن توقتاتىپ، اسكەرلەردى شىعارۋعا كەلىستى. ەكى ەلدىڭ ۇلتتىق قاۋىپسىزدىك مەملەكەتتىك كوميتەتتەرىنىڭ باسشىلارى وسى اقپارات توڭىرەگىندە مالىمدەمە جاسادى.
1 مامىر كۇنى قىرعىزستاننىڭ باتكەن وبلىسىندا كەلىسسوزدەر ءوتتى. جيىنعا تاجىكستان مۇقك باسشىسى سايمۋمين ياتيموۆ پەن قىرعىزستان مۇقك باسشىسى قامشىبەك تاشيەۆ قاتىستى. ولار ەكى مەملەكەتتىڭ شەكاراسىنداعى اتىستى تولىق توقتاتۋ تۋرالى كەلىسىمگە كەلدى.
كەزدەسۋ كەزىندە قوس تاراپ شەكاراداعى جانجالدى شەشۋگە بايلانىستى ءىس-شارالار تۋرالى پىكىر الماستى. ياتيموۆ بارلىق ماسەلەلەردى تەز ارادا شەشۋگە جۇمىس جاسايتىندىعىن، حالىقتىڭ دوستىق پەن تۇسىنىكتە ءومىر سۇرەتىندىگىن ايتتى. ال تاشيەۆ ەكى ەلدىڭ مۇددەسى ءۇشىن ءتورت تارماقتان تۇراتىن حاتتاما قابىلدانعانىن تىلگە تيەك ەتتى.
توقاەۆ قاقتىعىسقا قاتىستى پىكىر ءبىلدىردى
مەملەكەت باسشىسى قاسىم-جومارت توقاەۆ قىرعىز-تاجىك شەكاراسىنداعى وقيعاعا بايلانىستى مالىمدەمە جاسادى.
«قىرعىزستان مەن تاجىكستاننىڭ مەملەكەتتىك شەكاراسىنداعى قارۋلى قاقتىعىس تۋرالى اقپاراتتى اسقان الاڭداۋشىلىقپەن قابىلدادىم. قىرعىز بەن تاجىك حالىقتارى ءبىزدىڭ باۋىرلارىمىز، تاريحىمىز بەن مادەني قۇندىلىقتارىمىز ورتاق»، - دەلىنگەن مالىمدەمەسىندە.
سونىمەن قاتار پرەزيدەنت قىرعىزستان مەن تاجىكستان باسشىلىعى دانالىق تانىتىپ، داۋلى ماسەلەلەردى بەيبىت جولمەن شەشەتىنىنە سەنەتىنىن ايتتى.
«ءوز تاراپىمنان ماسەلەنى شەشۋدىڭ ءتيىمدى جولدارىن قاراستىرۋعا جانە ءوزارا سەنىمدى قايتا قالپىنا كەلتىرۋگە كۇش سالۋعا دايىنمىن. ورتالىق ازيا مەملەكەتتەرى باسشىلارىنىڭ كەزەكتى كونسۋلتاتيۆتىك كەزدەسۋى اياسىندا مۇنداي شەكارالىق قاقتىعىستاردى رەتتەۋدىڭ تەتىكتەرىن قاراستىرۋ قاجەت دەپ سانايمىن»، - دەدى توقاەۆ.
"ادىرنا" ۇلتتىق پورتالى
