«100 جاڭا ەسىمى» جاستارعا جاڭا كوكجيەكتەر اشادى – شاحتەر دانيەل ديل

2196
Adyrna.kz Telegram

«قازاقستاننىڭ 100 جاڭا ەسىمى» جوباسىنىڭ جەڭىمپازى دانيەل ديل جوبانىڭ جاستار ءۇشىن جاڭا شەكارالار مەن كوكجيەكتەر اشاتىنىنا سەنىمدى، دەپ حابارلايدى «ادىرنا» ۇلتتىق پورتالى قازاقپاراتقا سىلتەمە جاساپ.

شاحتەرلىك پەن سپورتتى بىرىكتىرگەن جىگىت جۋىقتا عانا بولگاريادا سپورتتىق اكروباتيكادان وتكەن الەم كۋبوگىندا 3-ورىنعا يە بولدى.

دانيەل ديل كوستەنكو اتىنداعى شاحتادا جەراستى تاۋ-كەن جۇمىسشىسى بولىپ جۇمىس ىستەيدى. اناسى دا وسى سالادا ەڭبەكتەنىپ ءجۇر.

«شاحتاداعى جۇمىس پەن سپورتتى بىرىكتىرۋ وڭاي ەمەس. بىراق بىرتىندەپ بۇل ءومىر سالتىنا اينالادى. انام دا شاحتادا جۇمىس ىستەيدى. شاحتانىڭ اۋىر جۇمىسى مەنىڭ حوببيىمە كەدەرگى بولعان جوق. كەرىسىنشە، شىڭداي ءتۇستى» - دەدى دانيەل ديل.

بىرنەشە كۇن بۇرىن سپورتشى بولگارياداعى جارىستان ورالعان ەكەن. سپورتتىق اكروباتيكادان وتكەن الەم كۋبوگىنىڭ كەزەڭىندە 3-ورىن العان.

«سپورت فەدەراتسياسى «100 جاڭا ەسىم» جوباسىنا قاتىسۋعا مەنىڭ كانديداتۋرامدى ۇسىندى. ءار جۇمىستىڭ قيىندىعى بار. ال سپورت مىنەزىمدى شىڭدادى. مەن ءۇشىن «قازاقستاننىڭ 100 جاڭا ەسىمى» بەدەلدى جوباسىنىڭ فيناليستەر قاتارىنا كىرۋ – كۇتپەگەن جاعداي بولدى. قالاي بولعاندا دا، جوبا جاستار ءۇشىن جاڭا كوكجيەكتەر اشادى»، - دەدى سپورتشى شاحتەر.

پىكىرلەر