قاسىم-جومارت توقاەۆ «قازاقستاننىڭ 100 جاڭا ەسىمى» جوباسىنىڭ جەڭىمپازدارىن قۇتتىقتاپ، ولاردىڭ ءوز دارىنىمەن كوپشىلىكتى مويىنداتا بىلگەنىن، مەملەكەتىمىزدى وركەندەتۋگە ايىرىقشا ۇلەس قوسىپ كەلە جاتقانىن ايتتى. ولار ءبىزدىڭ حالقىمىزدىڭ ماقتانىشتارى، وزگە ەلدەر قازاقستاندى وسى ازاماتتار ارقىلى تانىپ، باعالايدى.
– قازاقتىڭ قانداي حالىق ەكەنىن جەر جۇزىنە تانىتىپ جۇرگەن بىرنەشە ازامات وسى جوبانىڭ جەڭىمپازى اتاندى. ءبىز ءتۇرلى سالادا جەتىستىككە جەتكەن وسىنداي وتانداستارىمىزدىڭ ەڭبەگىن دارىپتەۋىمىز كەرەك. ويتكەنى تابىستى جانداردىڭ تاجىريبەسى ءاردايىم باسقالارعا ۇلگى-ونەگە. وسكەلەڭ ۇرپاق وزدەرىڭىزگە قاراپ بوي تۇزەيدى، ۇقساۋعا تىرىسادى. مەن ەلىمىزدىڭ ءاربىر پەرزەنتى سىزدەر سياقتى ونەگەلى بولسىن دەپ تىلەيمىن، – دەدى پرەزيدەنت.
مەملەكەت باسشىسى تەرەڭ ءبىلىمىن وزىق تاجىريبەمەن ۇشتاستىرا بىلگەن ازاماتتاردىڭ ەلىمىزدى العا جەتەلەيتىنىنە سەنىمدى. پرەزيدەنت تاۋەلسىزدىك كەزەڭىندە ءوسىپ جەتىلگەن بۋىننىڭ قارىم-قابىلەتىن جوعارى باعالادى.
– ءبىلىمدى ءارى سانالى ۇرپاق تاربيەلەۋ – بۇل اسا ماڭىزدى مەملەكەتتىك مىندەت. ەلىمىزدىڭ بولاشاعى دارىندى، وتانشىل جاستاردىڭ قولىندا بولۋى كەرەك. سولاي بولارىنا كامىل سەنەمىن. وسى ستراتەگيالىق ماقساتقا قول جەتكىزۋ ءۇشىن جۇيەلى رەفورمالاردى مىندەتتى تۇردە جالعاستىرامىز، – دەدى مەملەكەت باسشىسى.
پرەزيدەنت قوعامداعى بىرلىك پەن كەلىسىمنىڭ، بارشا قازاقستاندىقتاردىڭ جاسامپاز ەڭبەگىنىڭ ارقاسىندا دامۋدا ايتارلىقتاي العا ىلگەرىلەگەنىمىزدى اتاپ ءوتتى.
– بۇل جەردە ءبىزدىڭ جەتىستىكتەرىمىزدى كورسەتەتىن كوپتەگەن ساندار مەن دەرەكتەردى مىسالعا كەلتىرۋگە بولادى. بىراق بارلىق تابىس ادامداردىڭ بەرەكەلى ومىرىمەن، جەتكەن جەتىستىگىمەن جانە كەمەل كەلەشەككە ۇمتىلىسىمەن ولشەنەتىنىن ەستە ۇستاۋىمىز كەرەك. سىزدەر ەلىمىزدىڭ بايلىعى ەكەندەرىڭىز ءسوزسىز. ءوسىپ-وركەندەگەن، ادىلەتتى، دامىعان قازاقستاندى قۇرۋ سىزدەرگە جۇكتەلەدى. سوندىقتان ادام كاپيتالىن جان-جاقتى دامىتۋ ءبىزدىڭ مەملەكەتىمىزدىڭ باستى باسىمدىعى بولعان جانە سولاي بولا بەرمەك، – دەدى قاسىم-جومارت توقاەۆ.
وسى ۋاقىتقا دەيىن «قازاقستاننىڭ 100 جاڭا ەسىمى» جوباسىنا 7,5 مىڭ ادام قاتىسىپ، ەلىمىز تالاي تالانتتى، تالاپتى قازاقستاندىقتاردىڭ اتىن تانىدى.
– وسى جوبانىڭ ارقاسىندا ءوزىنىڭ ەرەكشە ەمدەۋ تاسىلىمەن كوپتەگەن ادامعا پەرزەنت ءسۇيۋ باقىتىن سىيلاعان دارىگەر-رەپرودۋكتولوگ ايدوس يبراگيموۆتى بۇكىل ەلىمىز تانىدى. جوبانىڭ 2019 جىلعى قاتىسۋشىسى يمانبەك زەيكەنوۆ جاقىندا عانا «Grammy» سىيلىعىن جەڭىپ الىپ، ونىڭ اتى بۇكىل الەمگە جايىلدى. ونىڭ جەتىستىگى تەك قازاقستان ءۇشىن عانا ەمەس، تمد ءۇشىن دە تەڭدەسىز. جوبانىڭ ءتورتىنشى ماۋسىم جەڭىمپازدارىنىڭ جەتىستىكتەرى دە ەشكىمدى بەي-جاي قالدىرمايدى، – دەدى مەملەكەت باسشىسى.
جوبانىڭ ءاربىر قاتىسۋشىسىنا قاراتا ايتقان سوزىندە قاسىم-جومارت توقاەۆ ولاردىڭ جەتىستىگى قازاقستان تابىسىنىڭ كورىنىسى ەكەنىن، ولار وزدەرىنىڭ پاتريوتتىق ارەكەتى ارقىلى بارشا قازاقستاندىقتاردى ىنتالاندىراتىنىن اتاپ ءوتتى.
– سىزدەردىڭ جەتىستىكتەرىڭىز كەز-كەلگەن ستاتيستيكادان ارتىق. وسىناۋ كەرەمەت جوبا سىزدەردى ودان ءارى دامۋعا ەرەكشە تالپىندىرىپ، قوعام مەن ەل يگىلىگى ءۇشىن جاڭا يدەيالاردى ىسكە اسىرۋدىڭ كەڭ كوكجيەكتەرىن اشتى دەپ سەنەمىن. ەلىمىز ءوزىنىڭ دارىندى جاستارىنىڭ كوپتىگىمەن ماقتانا الادى جانە ماقتانۋعا ءتيىس. قازاقستاننىڭ بولاشاعى سىزدەردەي پروگرەسسيۆتى، تالانتتى، پاتريوت جاستاردىڭ قولىندا. سىزدەر مەملەكەتتىڭ باسقارۋ تىزگىنىن قولعا الۋعا دايىن بولۋلارىڭىز كەرەك. ال ءبىز، ياعني اعا تولقىن، وسى ايتقان ءسوزىمىزدىڭ شىندىققا اينالۋى ءۇشىن بارلىعىن جاسايمىز، – دەدى پرەزيدەنت.
مەملەكەت شىعارماشىلىققا، ءبىلىم مەن عىلىمعا، جاستاردى قولداۋعا باسا نازار اۋدارىپ وتىر. وسى جولدا ءتيىمدى الەۋمەتتىك ليفت قالىپتاستىرۋدىڭ ورنى بولەك. «بولاشاق» حالىقارالىق ستيپەندياسى، پرەزيدەنتتىك جاستار كادرلىق رەزەرۆى وسكەلەڭ ۇرپاقتىڭ ەل دامۋىنا ءوز ۇلەسىن قوسۋىنا مول مۇمكىندىك بەرىپ وتىر.
– ءبىزدىڭ ۇلتىمىزدىڭ بويىندا كرەاتيۆتى يندۋستريانى دامىتۋدىڭ اسا زور مۇمكىندىگى بار. ءدال قازىر كرەاتيۆتى ەكونوميكا ميللياردتاعان دوللار ينۆەستيتسيا تارتۋدىڭ، تۇراقتى ەكونوميكالىق ءوسۋدىڭ، الەۋمەتتىك وركەندەۋدىڭ بىردەن-ءبىر جولى. قازاقستان مادەنيەتىنىڭ وكىلدەرى وڭىرلىك جانە جاھاندىق دەڭگەيدە ءوز ورىندارىن ويىپ تۇرىپ الىپ جاتىر. ءبىز وسى مۇمكىندىكتى ەلىمىزدىڭ مادەنيەتىن الەمگە تانىتۋدىڭ جولى رەتىندە قاراستىرۋىمىز كەرەك. سوندىقتان مەن ۇكىمەتكە وسى ستراتەگيالىق ماڭىزدى سالانى قولداۋ ءۇشىن كەشەندى شارالار قابىلداۋدى تاپسىردىم، – دەدى قاسىم-جومارت توقاەۆ.
مەملەكەت باسشىسىنىڭ پىكىرىنشە، كرەاتيۆتى يندۋستريانى دامىتۋدىڭ ءتيىمدى ءبىر ءتاسىلى رەتىندە زاماناۋي قازاقستاندىق ايدەنتيكانى قالىپتاستىرۋ قاجەت.
پرەزيدەنت جوبا قاتىسۋشىلارىنىڭ يدەياسى مەن ۇسىنىستارىن ىسكە اسىرۋ ءۇشىن ولاردى ورتالىق مەملەكەتتىك ورگان باسشىلارىمەن جۇيەلى تۇردە كەزدەستىرىپ تۇرۋ قاجەت دەپ سانايدى.
– «ءجۇز جاڭا ەسىم» جوباسى قازاقستاندىق ارماننىڭ انىق ىسكە اسقانىن كورسەتەدى. ءاربىر تالانتتى، ەڭبەكقور، ماقساتشىل ادام وسى زاماننىڭ باتىرى جانە ۇلت ماقتانىشى بولا الادى. سىزدەر سياقتى تابىستى ازاماتتار نەعۇرلىم كوپ بولسا، ەلىمىزدىڭ باسەكەگە قابىلەتى سوعۇرلىم ارتا تۇسەدى. حالقىمىزدىڭ مەرەيى دە ۇستەم بولادى. «ءجۇز جاڭا ەسىم» جوباسىنىڭ ماقساتى دا – وسى. قازىرگى زامان – ءبىلىم مەن عىلىمنىڭ ءداۋىرى. ساناسى سەرگەك، ويى ۇشقىر جاستاردى ەل ءۇشىن ايانباي ەڭبەك ەتۋگە شاقىرامىن. بۇل سىزدەردىڭ قولدارىڭىزدان كەلەدى. مەن قازاق ەلىنىڭ جاستارىنا سەنەمىن! – دەدى مەملەكەت باسشىسى.
ونلاين فورماتتا وتكەن «قازاقستاننىڭ 100 جاڭا ەسىمى» جوباسى جەڭىمپازدارىنىڭ كەزدەسۋىندە ەرىكتى-ستۋدەنت دارىن ءابىلجانوۆ، عالىم، ادامدار مەن جانۋارلارعا ۆاكتسينا ازىرلەۋشى قايسار تابىنوۆ، ءىت-مامان، روبوت تەحنيكاسى مەكتەبىنىڭ نەگىزىن قالاۋشى دامير نۇركەجانوۆ، حيميا ءپانىنىڭ جاس وقىتۋشىسى ۇلان ۇسەنوۆ، سىزۋ ءپانىنىڭ مۇعالىمى، ءوز اۋىلىندا كوپىر سالۋ باستاماسىن كوتەرگەن احات راقىشەۆ، ينجەنەر-ونەرتاپقىش سانجار تايجان، اقش-تىڭ حوككەي كلۋبىنا باس باپكەر بولعان تۇڭعىش قازاقستاندىق قىز بۇلبۇل قارتانباي، ەكولوگ ەكاتەرينا ۆيبە، سونداي-اق، اقىن، الەم ادەبيەتىن قازاق تىلىنە اۋدارىپ جۇرگەن سەرىكجان قاجىتاي ءسوز سويلەدى.
