شىمكەنت قالاسىنىڭ اكىمى مۇرات ايتەنوۆ قالاداعى بىرقاتار اۋرۋحانالاردى ارالاپ، جاي-كۇيىمەن تانىستى. الدىمەن اسار شاعىن اۋدانىندا ورنالاسقان قالالىق كلينيكالىق بالالار اۋرۋحاناسىنا باردى.
مەديتسينالىق مەكەمە ەپيدەميالوگيالىق جاعداي ۋشىقسا 18 جاسقا دەيىنگى بالالاردى قابىلداۋعا دايىن. بۇل ءۇشىن اۋرۋحانادا 60 توسەك ورىنعا دايىندالعان جۇقپالى اۋرۋلار بولىمشەسى اشىلدى. ينفەكتسياعا شالدىققان بالالاردى ەمدەۋ ءۇشىن اۋرۋحانادا مەديتسينا ماماندارى جەتكىلىكتى. سونداي-اق ەمدەۋ مەكەمەسى زاماناۋي تەحنيكالىق قۇرىلعىلارمەن جابدىقتالعان.
ينفەكتسيالىق اۋرۋعا شالدىققان بالالاردى اۋرۋحانادا قابىلداۋ ءۇشىن ارنايى جوسپار دايىندالعان. مۇنداي ناۋقاس بالالار بولەك بوكستاردا قابىلدانىپ، ەمدەۋ شارالارى ءتيىستى تارتىپپەن جۇرگىزىلەدى.
ايتا كەتەيىك «اسار» شاعىن اۋدانىنداعى بالالار اۋرۋحاناسىندا بىلتىر كوپبەيىندى پروۆيزورلىق ورتالىق اشىلعان بولاتىن. مۇندا ينفەكتسياعا شالدىققان 100-دەن اسا بالا دەرتىنەن ساۋىعىپ شىقتى.
شاھار باسشىسى كەيىننەن نۇرساتتاعى پەريناتالدىق ورتالىقتى ارالادى.
شىمكەنت قالاسىنداعى پەريناتالدىق ورتالىق كوروناۆيرۋسكە شالدىققان جۇكتى ايەلدەردى قابىلدايدى. بۇل ءۇشىن ورتالىقتا 30 ورىنعا لايىقتالعان پروۆيزورلىق بولىمشە اشىلدى.
اۋرۋ ورشىگەن جاعدايدا مۇنداعى دارىگەرلەر ينفەكتسياعا شالدىققان جۇكتى ايەلدەردى قابىلداپ، مەديتسينالىق كومەك كورسەتەتىن بولادى. ورتالىقتاعى پروۆيزورلىق بولىمشە 100 پايىز وتتەگى نۇكتەسى مەن يۆل اپپاراتتارىمەن جابدىقتالعان.
كوروناۆيرۋسكە شالدىققان جۇكتى ايەلدەردى ەمدەۋ ءۇشىن ورتالىقتاعى 200-دەن اسا مەديتسينا مامانى ارنايى وقىتۋدان ءوتىپ، بىلىكتىلىگىن ارتتىردى. ورتالىقتاعى قابىلداۋ ءبولىمىنىڭ ماماندارى ەپيدەمياعا بايلانىستى ناۋقاستاردى تازا جانە لاس ايماقتار بويىنشا قابىلداپ، ارنايى تارتىپپەن مەديتسينالىق كومەك كورسەتەدى.
قالا اكىمى وتكەن جىلداعى قاتەلىكتەردى بولدىرماۋ ءۇشىن بارىنشا دايىندىقتى كۇشەيتە ءتۇسۋ كەرەكتىگى جونىندە سالا باسشىسىنا تاپسىرما بەردى.
"مەديتسينا سالاسى قاتەلىكتى كەشىرمەيتىن، ادام ومىرىمەن تىكەلەي بايلانىستى سالا. سوندىقتان اۋرۋحانالار مەن ەمحانالارداعى ءاربىر جاعداي قاتاڭ باقىلاۋعا الىنسىن" دەدى مۇرات ايتەنوۆ.
شىمكەنت قالاسى اكىمدىگىنىڭ ءباسپاسوز قىزمەتى
