شىمكەنت قالاسىنىڭ اكىمى مۇرات ايتەنوۆ جانە ب. نارىمبەتوۆ باستاعان قالالىق ءماسليحات دەپۋتاتتارى 137 ورتا مەكتەپتىڭ جاي-كۇيىمەن تانىستى.
سامال-3 شاعىن اۋدانىندا ورنالاسقان ءبىلىم ورداسى 1200 ورىنعا لايىقتالعان. قۇرىلىسى 2018 جىلدىڭ سوڭىندا باستالعان بولاتىن. باس مەردىگەر - «اتامەكەن كورپاراتسياسى» جشس-ى. ءبىلىم وشاعى ارنايى ۇلدار جانە قىزدارعا ارنالعان شەبەرحانامەن، STEM كابينەتى، سپورتزال، اسحانامەن قامتىلعان.
قالا اكىمى سىنىپتاردى ارالاپ، «وقۋعا قۇشتار مەكتەپ - وقۋعا قۇشتار ۇلت» اتتى كىتاپ كورمەسىمەن تانىستى. سونىمەن بىرگە، شاحمات ويناۋشىلاردى تاماشالاپ، سپورت سەكتسيالارىنا دا ات باسىن بۇردى.
- بالالاردىڭ دەنساۋلىعىن نىعايتۋدى، بۇقارالىق سپورتتى دامىتۋدى قولعا الۋ قاجەت. ول ءۇشىن وقۋشىلاردى سپورت ۇيىرمەلەرىنە كوپتەپ تارتۋ ماڭىزدى. زاماناۋي مەكتەپتەردە ءبىلىم العان بالالار ءبىزدىڭ جارقىن بولاشاعىمىزدىڭ كەپىلى. ءبىلىم ساپاسىمەن قاتار بالالار قاۋىپسىزدىگى نازاردان تىس قالماسىن، -دەگەن شاھار باسشىسى ارالاۋ سوڭىندا مەكتەپتەگى ەستەلىك كىتاپقا جازبا قالدىردى.
شىمكەنت قالاسى اكىمدىگىنىڭ ءباسپاسوز قىزمەتى
