بيىل الماتى وبلىسىندا «باستاۋ بيزنەس» وقىتۋ جوباسى اياسىندا كاسىپكەرلىك نەگىزدەرى بويىنشا 3 مىڭ ادامدى وقىتۋ جوسپارلانۋدا. ءبىرىنشى لەكتى وقىتۋ ءساۋىردىڭ 26-سىنان باستالدى. بۇل تۋرالى «JETISÝ MEDIA» اقپاراتتىق الاڭىندا وتكەن بريفينگ بارىسىندا وبلىستىق كاسىپكەرلەر پالاتاسىنىڭ كاسىپكەرلىكتى قارجىلاي ەمەس قولداۋ كورسەتۋ ءبولىمىنىڭ باسشىسى ءسانيا ناۋرىزباەۆا مالىمدەدى.
سپيكەردىڭ ايتۋىنشا، ناتيجەلى جۇمىسپەن قامتۋدى جانە جاپپاي كاسىپكەرلىكتى دامىتۋدىڭ 2017-2021 جىلدارعا ارنالعان «ەڭبەك» مەملەكەتتىك باعدارلاماسى اياسىندا جۇزەگە اسىرىلىپ جاتقان «باستاۋ بيزنەس» جوباسى ازاماتتاردى كاسىپكەرلىك داعدىلارعا ۇيرەتۋگە باعىتتالعان. وتكەن جىلى جوبا بويىنشا ءوڭىردىڭ 3022 جۇمىسسىز جانە ءىسىن جاڭا باستاعان كاسىپكەرى بيزنەستىڭ قىر-سىرىن ۇيرەنىپ، 2039 ادام جالپى سوماسى 1,8 ملرد.تەڭگە قارجىلاندىرۋعا قول جەتكىزدى.
– وقىتۋ 5 باعىت بويىنشا ۇيىمداستىرىلىپ، وسى جىلدىڭ قىركۇيەك ايىنا دەيىن جالعاسادى. كارانتيندىك شارالارعا بايلانىستى وقىتۋ ونلاين فورماتتا جۇرگىزىلىپ، 21 كۇن ىشىندە وتكىزىلەدى، – دەدى ءسانيا ناۋرىزباەۆا.
جوباعا حالىقتى جۇمىسپەن قامتۋ ورتالىعىندا تىركەلگەن جۇمىسسىزدار، سونداي-اق ەرەكشە قاجەتتىلىكتەرى بار ادامدار، زەينەتكەرلىككە جەتپەگەن 50 جاستان اسقان ادامدار، NEET ساناتىنداعى جاستار، از قامتىلعان نەمەسە كوپبالالى وتباسى مۇشەلەرى، اۋىل شارۋاشىلىعى كووپەراتيۆتەرىنىڭ مۇشەلەرى، قونىس اۋدارۋشىلار مەن قانداستار قاتىسا الادى. جازىلۋ ءۇشىن ۇمىتكەرلەر تۇرعىلىقتى جەرى بويىنشا حالىقتى جۇمىسپەن قامتۋ ورتالىقتارىنا جۇگىنۋ كەرەك. كەيىن بەرىلگەن جولداما بويىنشا «اتامەكەن» وڭىرلىك پالاتاسىنا نەمەسە ونىڭ فيليالىنا جۇگىنەدى نەمەسە atameken.co سايتى ارقىلى تىركەلەدى. ارى قاراي «اتامەكەن» قاتىسۋشىلار اراسىندا وقىتۋ جۇرگىزىپ، ونىڭ قورىتىندىسى بويىنشا سەرتيفيكات تاپسىرادى. وسى سەرتيفيكاتپەن جوبا تۇلەگى 200 اەك كولەمىندە قايتارىمسىز گرانت نەمەسە 6 پايىز جەڭىلدەتىلگەن نەسيە الۋعا مۇمكىندىگى بولادى.
ايتا كەتەيىك، 2017-2020 جىلدار ارالىعىندا وبلىستا «باستاۋ بيزنەس» جوباسى بويىنشا 13 505 ادام كاسىپكەرلىك نەگىزدەرىنە وقىپ، ونىڭ ىشىندە 5 137 جوبا 74,2 ملرد.تەڭگە سوماعا قارجىلاندىرىلدى. وبلىستىڭ جۇمىسپەن قامتۋدى ۇيلەستىرۋ جانە الەۋمەتتىك باعدارلامالار باسقارماسىنىڭ حالىقتى جۇمىسپەن قامتۋ ءبولىمىنىڭ باسشىسى ءاليا ەسىمجانوۆانىڭ ايتۋىنشا، بيىل 49 979 جۇمىس ورنىن، ونىڭ ىشىندە 26 258 تۇراقتى جۇمىس ورنىن قۇرۋ جوسپارلانعان. بۇگىندە 14 مىڭنان استام جۇمىس ورنى اشىلعان، ونىڭ ىشىندە 11,6 جۇمىس ورنى مەملەكەتتىك باعدارلامالار اياسىندا قۇرىلدى.
اعىمداعى جىلى «ەڭبەك» ناتيجەلى جۇمىسپەن قامتۋدى جانە جاپپاي كاسىپكەرلىكتى دامىتۋدىڭ 2017-2021 جىلدارعا ارنالعان مەملەكەتتىك باعدارلاماسىن ىسكە اسىرۋ ءۇشىن 17,8 ملرد.تەڭگە ءبولىندى. بۇل قاراجات كاسىپتىك وقىتۋعا، شاعىن نەسيەلەندىرۋگە، گرانتتارعا، الەۋمەتتىك جۇمىس ورىندارىن قۇرۋعا باعىتتالاتىن بولادى
