دۇيسەنبى كۇنى چادتىڭ پرەزيدەنتى يدريس دەبي كوتەرىلىسشىلەرمەن بولعان اتىس بارىسىندا اۋىر جاراقات الىپ، ارتىنشا كوز جۇمدى. ەلدى 30 جىل بيلەگەن پرەزيدەنتتىڭ ولىمىنە رەسەي جەندەتتەرىنىڭ تىكەلەي قاتىسى بار. بۇل تۋرالى The Times جازدى.
"وسى اپتادا چاد پرەزيدەنتى قازا تاپقاننان كەيىن كوتەرىلىسشىلەر ەلدى تولىق باسىپ الۋعا ۋادە بەرگەن بولاتىن. كوتەرىلىسشىلەردىڭ باسىم بولىگى ليۆيادا رەسەيلىك جەندەتتەردەن ۇرىس قيمىلدارىن ۇيرەنىپ كەلگەنى بەلگىلى بولدى. چاد پرەزيدەنتىن ولتىرگەن FACT ۇيىمىنىڭ جەندەتتەرىن رەسەيلىك ۆاگنەر جەكە اسكەري كومپانياسى ليۆياداعى اسكەري قيمىلدارعا قاتىسۋ ءۇشىن جالداعان. ولار گەنەرال حافتار جاعىندا سوعىسىپ، تاجىريبە جيناعان. رەسەيلىك جەندەتتەر FACT ۇيىمىنىڭ مۇشەلەرىنە سوعىسۋدىڭ جاڭا تاسىلدەرىن ۇيرەتكەن", - دەپ جازدى The Times.
چاد پرەزيدەنتى دەبي 68 جاسىندا FACT كوتەرىلىسشىلەرىمەن بولعان ۇرىستا قازا تاپتى. ۇرىسقا كوتەرىلىسشىلەرمەن بىرگە رەسەيلىك جەندەتتەر دە قاتىسۋى مۇمكىن دەيدى ساراپشىلار. كوتەرىلىسشىلەر پرەزيدەنتتى جەرلەۋ راسىمىندە ۇرىس قيمىلدارىن ۋاقىتشا توقتاتتى، سەبەبى بۇل ەجەلگى داستۇرگە بايلانىستى. ال جەرلەۋ ءراسىمى اياقتالعان سوڭ، بارلىق باعىت بويىنشا شابۋىلدى جالعاستىراتىنىن مالىمدەگەن ەدى. ولار تەز ارادا چادتىڭ استاناسى ندجامەنا قالاسىن باسىپ الۋدى جوسپارلاپ وتىر. چادتاعى كوتەرىلىسشىلەر ليۆيادان جاڭا اسكەري تەحنيكالار مەن قارۋلار اكەلگەن. سونىمەن قاتار ولاردىڭ سانى 2000 كوتەرىلىسشىمەن تولىققانى بەلگىلى بولدى. FACT ۇيىمىنىڭ كوتەرىلىسشىلەرى ليۆيادان چادقا 11 ساۋىردە قايتىپ ورالىپ، ەلدەگى ۇرىس قيمىلدارى جالعاسىن تاپتى.
رەسەي سوڭعى جىلدارى افريكا قۇرلىعىنداعى ءتۇرلى اسكەري قاقتىعىستارعا بەلسەنە قاتىسىپ كەلەدى. ليۆيادا زاڭسىز حافتار بيلىگىن قولداپ، جالدامالى جەندەتتەرى ارقىلى ۇرىس قيمىلدارىنا ارالاسۋدا. افريكانىڭ بىرنەشە ەلىندە اسكەري كەڭەسشىلەرى جۇمىس ىستەۋدە. ماسكەۋ افريكاداعى قاقتىعىستارعا ارالاسۋ ارقىلى تابيعي رەسۋرستى يەمدەنىپ، كەڭەستىك كەزەڭنەن كەيىن قۇلدىراپ كەتكەن كرەملدىڭ ىقپالىن اتالمىش ايماقتا قايتا قالپىنا كەلتىرۋدى جوسپارلاۋدا.
اسحات قاسەنعالي،
"ادىرنا" ۇلتتىق پورتالى
