Dúısenbi kúni Chadtyń prezıdenti Idrıs Debı kóterilisshilermen bolǵan atys barysynda aýyr jaraqat alyp, artynsha kóz jumdy. Eldi 30 jyl bılegen prezıdenttiń ólimine Reseı jendetteriniń tikeleı qatysy bar. Bul týraly The Times jazdy.
"Osy aptada Chad prezıdenti qaza tapqannan keıin kóterilisshiler eldi tolyq basyp alýǵa ýáde bergen bolatyn. Kóterilisshilerdiń basym bóligi Lıvııada reseılik jendetterden urys qımyldaryn úırenip kelgeni belgili boldy. Chad prezıdentin óltirgen FACT uıymynyń jendetterin reseılik VAGNER jeke áskerı kompanııasy Lıvııadaǵy áskerı qımyldarǵa qatysý úshin jaldaǵan. Olar general Haftar jaǵynda soǵysyp, tájirıbe jınaǵan. Reseılik jendetter FACT uıymynyń múshelerine soǵysýdyń jańa tásilderin úıretken", - dep jazdy The Times.
Chad prezıdenti Debı 68 jasynda FACT kóterilisshilerimen bolǵan urysta qaza tapty. Urysqa kóterilisshilermen birge reseılik jendetter de qatysýy múmkin deıdi sarapshylar. Kóterilisshiler prezıdentti jerleý rásiminde urys qımyldaryn ýaqytsha toqtatty, sebebi bul ejelgi dástúrge baılanysty. Al jerleý rásimi aıaqtalǵan soń, barlyq baǵyt boıynsha shabýyldy jalǵastyratynyn málimdegen edi. Olar tez arada Chadtyń astanasy Ndjamena qalasyn basyp alýdy josparlap otyr. Chadtaǵy kóterilisshiler Lıvııadan jańa áskerı tehnıkalar men qarýlar ákelgen. Sonymen qatar olardyń sany 2000 kóterilisshimen tolyqqany belgili boldy. FACT uıymynyń kóterilisshileri Lıvııadan Chadqa 11 sáýirde qaıtyp oralyp, eldegi urys qımyldary jalǵasyn tapty.
Reseı sońǵy jyldary Afrıka qurlyǵyndaǵy túrli áskerı qaqtyǵystarǵa belsene qatysyp keledi. Lıvııada zańsyz Haftar bıligin qoldap, jaldamaly jendetteri arqyly urys qımyldaryna aralasýda. Afrıkanyń birneshe elinde áskerı keńesshileri jumys isteýde. Máskeý Afrıkadaǵy qaqtyǵystarǵa aralasý arqyly tabıǵı resýrsty ıemdenip, Keńestik kezeńnen keıin quldyrap ketken Kremldiń yqpalyn atalmysh aımaqta qaıta qalpyna keltirýdi josparlaýda.
Ashat QASENǴALI,
"Adyrna" ulttyq portaly
