جەلىدەگى اقپارات: «قىتايلىق ۆاكتسينا قازاقستاندىق دەپ ۇسىنىلادى»

2508
Adyrna.kz Telegram

Telegram-چاتتاردا COVID-19 قارسى قىتايلىق Sinovac ۆاكتسيناسىن قازاقستاندىق ازىرلەمە رەتىندە ۇسىنادى دەگەن تەوريا تالقىلانۋدا. پايدالانۋشىلاردىڭ ايتۋىنشا، پرەپاراتتى ەلىمىزگە قىتايدان اكەلىپ، ونىڭ جاپسىرمالارىن اۋىستىرادى ەكەن. قر دەنساۋلىق ساقتاۋ مينيسترلىگى بۇل تۇجىرىمداردى جوققا شىعاردى، دەپ حابارلايدى «ادىرنا» ۇلتتىق پورتالى Stopfake.kz سايتىنا سىلتەمە جاساپ.

تەوريا تەلەديداردا شىققان جاڭالىقتاردىڭ بىرىندە قازاقستاندىق ۆاكتسينانى بىردەن QazVac جانە Qazسovid-in دەپ ەكى اتالۋىنا نەگىزدەلگەن. شىن مانىندە، بۇل ەكەۋى ءبىر پرەپارات. باستاپقىدا ونى Qazسovid-in دەپ اتاعان، بىراق كەيىن QazVac دەپ وزگەرتكەن. بۇل تۋرالى قر ءبىلىم جانە عىلىم مينيسترلىگىنىڭ سايتىندا ايتىلدى.

QazVac ۆاكتسيناسى بەلسەندى ەمەس ۆيرۋس پلاتفورماسىندا جاسالعان. بۇل تەحنولوگيا بۇرىننان بەلگىلى جانە تۇماۋ، وبا، تىرىسقاق، پوليوميەليت، ديفتەريا جانە باسقا دا قاۋىپتى اۋرۋلارعا قارسى ۆاكتسينالاردى ازىرلەۋدە قولدانىلادى.

قازىر وتاندىق پرەپارات كلينيكالىق سىناقتاردىڭ سوڭعى، ءۇشىنشى كەزەڭىنەن وتۋدە. وعان ءۇش مىڭنان استام ەرىكتى قاتىسۋدا. ارالىق سىناق ناتيجەلەرىنى وڭ ناتيجە بەردى. قازاقستاندىق ۆاكتسينامەن ەگىلگەن ەرىكتىلەردە انتيدەنەلەر ءتيترىنىڭ ءوسۋى بايقالادى، ءبىرىنشى ۆاكتسيناتسيادان كەيىن 16-دان 128-گە دەيىن (سگت=32.0), ەكىنشى ۆاكتسيناتسيادان كەيىن 128-دەن 2048-گە دەيىن (سگت=618.5).

قىتايلىق ۆاكتسينانى قازاقستاندىق ازىرلەمە دەپ ۇسىنۋ مۇمكىن ەمەس، ويتكەنى Sinovac پرەپاراتى ءبىزدىڭ ەلگە جەتكىزىلمەيدى.

«ەلىمىزدە Sinovac ۆاكتسيناسى ءالى جوق، بىردە-ءبىر جەتكىزىلىم جۇزەگە اسىرىلعان جوق. تيىسىنشە، قازاقستاندىقتار ونىمەن ەگىلمەيدى. قازىرگى كەزدە قازاقستاندا «سپۋتنيك-V» ۆاكتسيناسى قولدانىلۋدا. 26 ساۋىردەن باستاپ وتاندىق QazVac پرەپاراتىمەن ۆاكتسيناتسيالاۋ باستالادى»، – دەپ حابارلادى قر دەنساۋلىق ساقتاۋ مينيسترلىگىنەن.

دەمەك قىتاي وندىرىلگەن پرەپارات وتاندىق ۆاكتسينا دەپ ۇسىنىلاتىنى تۋرالى تۇجىرىمدار جالعان. ەلىمىزدە قىتايلىق Sinovac پرەپاراتى جوق، ال وتاندىق ۆاكتسينانىڭ ازىرلەنۋى مەن كلينيكالىق سىناقتارى تۋرالى سوڭعى مالىمەتتەر قر ءبىلىم جانە عىلىم مينيسترلىگىنىڭ سايتىندا ۇنەمى جاريالانىپ تۇرادى.

پىكىرلەر