«جاڭا تولقىن» (نوۆايا ۆولنا) حالىقارالىق ۆوكالدىق بايقاۋىندا قازاقستاندى Mezzo توبى ۇسىناتىن بولادى، دەپ حابارلايدى "ادىرنا" ۇلتتىق پورتالى.
جارتىلاي فينالدىق ىرىكتەۋ بىرنەشە كۇن بويى ماسكەۋدە ءوتتى. وعان رەسەي، بەلارۋسسيا، ۋكراينا، قىرعىزستان، ارمەنيا، گرۋزيا، يزرايل، اۆستريا، اۆستراليا، نيدەرلاندىدان 80 مۋزىكانت قاتىستى. Mezzo ABBA رەپەرتۋارىنداعى، Westside story ميۋزيكلىندەگى اندەرمەن جانە وزدەرىنىڭ جەكە اندەرىمەن ونەر كورسەتتى. 19-25 تامىز ارالىعىندا سوچيدە وتەتىن بايقاۋدىڭ فينالىنا 20 ءارتىس ءوتتى.
ء"بىز جىگىتتەرمەن بۇعان وتە ۇزاق ۋاقىت دايىندالدىق. بۇل ءبىزدىڭ ءۇشىنشى رەت باق سىناۋىمىز جانە ول ءساتتى بولىپ شىقتى. بۇل ءبىز ءۇشىن كەرەمەت جانە قۋانىشتى ءسات. ءبىز وسىنداي بەدەلدى حالىقارالىق جارىستا قازاقستاننىڭ اتىنان قاتىسۋدى ارماندادىق. ءبىز بۇعان تولىقتاي دايىنبىز. ءبىزدىڭ كوماندادا سوچيدە لايىقتى ونەر كورسەتەتىن بارلىق قاسيەت بار. ءبىزدى قولداڭىزدار!", دەپ ءبولىستى توپتىڭ پروديۋسەرى ابدەل مۇحتاروۆ.
Mezzo - بۇل كلاسسيكالىق جانە تانىمال مۋزىكا ەلەمەنتتەرىنىڭ سينتەزىندەگى كلاسسيكالىق كروسسوۆەر باعىتىندا جۇمىس ىستەيتىن قازاقستانداعى العاشقى ۆوكالدىق توپ. توپ 2012 جىلى قۇرىلدى. قۇرامىندا: جاسۇلان سىدىقوۆ، جانىبەك سەيداحمەتوۆ، اسان نۇربەرگەنوۆ جانە مەيىرحان جانتۋرعانوۆ بار. كوماندا 2012 جىلى X Factor Kazakhstan بايقاۋىندا 2 ورىن الىپ، تانىمالدىلىققا يە بولدى.
«دەتسكايا نوۆايا ۆولنا» ىرىكتەۋى بولعانىن دا اتاپ وتەيىك. وعان 11 جاستاعى جان ماكيم قازاقستان اتىنان ونەر كورسەتپەك. ىرىكتەۋ ءۇش كەزەڭنەن تۇردى. مىڭنان استام قاتىسۋشىنىڭ اراسىنان قازىلار القاسى جاس تالانت جاندى تاڭدادى. جان شامامەن ءتورت جىل بۇرىن مۋزىكامەن اينالا باستادى. فورتەپيانو، ەلەكترو گيتارا، ۋكۋلەلە، بارابانداردا وينايدى. 2019 جىلى جان ماكيم رەسەيدەگى «گولوس.دەتي» جوباسىنا قاتىسىپ، سودان كەيىن ۆالەري مەلادزەنىڭ كومانداسىنا قوسىلدى. 2020 جىلى ول Junior Eurovision ءان بايقاۋىنىڭ ءفيناليستى بولدى.
"ادىرنا" ۇلتتىق پورتالى
