گۆاردەيسكي زاۋىتىندا كوروناۆيرۋسقا قارسى QazVac قازاقستاندىق ۆاكتسينانىڭ العاشقى 50 مىڭ دوزاسى وڭىرلەرگە جونەلتىلدى. ولار نۇر-سۇلتان، اقتوبە، الماتى جانە شىمكەنتكە جەتكىزىلەدى، سول جەردەن قازاقستاننىڭ باسقا وڭىرلەرىنە شىعادى. بۇل تۋرالى پرەمەر-ءمينيستردىڭ ورىنباسارى ەرالى توعجانوۆ مالىمدەدى، دەپ حابارلايدى "ادىرنا" ۇلتتىق پورتالى، Tengrinews.kz-كە سىلتەمە جاساپ.
"قازاقستاندىق ۆاكتسينانىڭ جاسالۋى ەلىمىزگە كوروناۆيرۋس ينفەكتسياسىنا قارسى ءوز ۆاكتسيناسىن ازىرلەگەن الەمنىڭ بەس ەلىنە كىرۋگە مۇمكىندىك بەردى. بۇل تەك حالىق دەنساۋلىعى ماسەلەسى ەمەس، وتاندىق عىلىمنىڭ الەۋەتى مەن بيوفارماتسەۆتيكادا زاماناۋي تەحنولوگيالاردى پراكتيكادا قولدانۋدىڭ، مەملەكەت بەدەلىنىڭ دالەلى", - دەدى ەرالى توعجانوۆ.
توعجانوۆتىڭ ايتۋىنشا، زاۋىت جىل سوڭىنا قاراي جۇمىسقا تولىق كۇشىن سالادى.
"ورتاشا ەسەپپەن ايىنا 500 مىڭ دوزادا شىعادى. ول كەزەڭ-كەزەڭمەن جۇرگىزىلەدى. بۇگىن 50 مىڭىن جونەلتتىك. مامىردا تاعى 50 مىڭ، سودان كەيىن 100 مىڭ، سوسىن 500 مىڭ جوسپارلانىپ وتىر. بۇل وتە كۇردەلى نىسان. حالىقارالىق تالاپتار، ستاندارتتار بار. ەڭ الدىمەن، عيماراتتىڭ ءوزى تەكسەرىلەدى، سودان كەيىن بارلىق جابدىق تەكسەرىلەدى، ودان ارى 28 ساۋىردە جەتكىزىلەتىن قۇيۋ جابدىقتارى ىسكە قوسىلادى. پايدالانۋعا بەرىلەتىن ءاربىر جابدىق حالىقارالىق ستاندارتتار بويىنشا ۆاليداتسيالانادى", - دەدى ۆيتسە-پرەمەر.
قازاقستانداعى زاۋىت تولىق ىسكە قوسىلعانشا، قازاقستاندىق ۆاكتسينا تۇركيادا قۇيىلادى.
قازاقستاندىق ۆاكتسينا دۇنيەجۇزىلىك دەنساۋلىق ساقتاۋ ۇيىمىنىڭ تىزىلىمىنە ەنگىزىلگەن. دەنساۋلىق ساقتاۋ مينيسترلىگىنىڭ مالىمەتىنشە، ونىڭ تولىق قاۋىپسىزدىگى دالەلدەندى، ۆاكتسينا كوروناۆيرۋس ينفەكتسياسىنا قارسى تۇراقتى يممۋنيتەتتى قالىپتاستىرادى.
"بەلسەندى ەمەس ۆاكتسينانىڭ ارتىقشىلىعى - ۆاكتسيناعا نەگىزدەلگەن اۋرۋلاردى تۋدىرمايدى. سونىمەن قاتار، QazVac ۆاكتسيناسىن جەتكىزۋ ءۇشىن كۇردەلى توڭازىتقىش قوندىرعىلاردى قاجەت ەمەس، ول توڭازىتقىشتا پليۋس 2-8 گرادۋس تەمپەراتۋرادا تاسىمالدانادى", - دەلىنگەن حابارلامادا.
"ادىرنا" ۇلتتىق پورتالى
