حالىقتى ۆاكتسينا الماۋعا شاقىرىپ جۇرگەن ايتىسكەر بالعىنبەك يماشەۆ كوروناۆيرۋسقا قارسى ەكپە ماسەلەسىنە قاتىستى تاعى دا جازبا جاريالادى. بۇل جازباسىندا اقىن ۆاكتسيناتسيانىڭ ءماجبۇرلى تۇردە سالىنىپ جاتقانىن ايتتى.
«ۆاكتسينا سالدىرۋ ەرىكتى تۇردە دەگەن بوس ءسوز بولعانى ما؟ ءبىزدىڭ بيلىكتىڭ سوزىنە سەنۋگە بولمايتىن سياقتى. «مەكتەپ ديرەكتورلارىن «قامشىلاۋ» كەرەك» دەگەن نە ماسقارا؟ قايداسىڭدار، باتىر قازاقتىڭ ەرلەرى مەن قىزدارى؟ ەلدىڭ كوز-جاسىنا قالۋدان قورقاتىن باسشى قالماعان با؟ مەكەمە باسشىلارى! ءار ءتۇرلى دەڭگەيدەگى اكىم-قارا، شەنەۋنىك، ديرەكتور، رەكتور، ت.ب قىزمەتتەگى ازاماتتار! اللانىڭ الدىندا قول استىلارىڭداعى ءار ادامنىڭ حاقىنان سۇرالاسىڭدار!
ۆاكتسينا الدىم دەپ جاھانعا جار سالعان جەلىدەگى جارناماشىلار! نە ءۇشىن؟ ەشكىم قىستاماسا، وتىنبەسە، سۇراماسا، تالاپ ەتپەسە، بەلگىسىز ەكپەنى نە ءۇشىن، كىم ءۇشىن ناسيحاتتاپ جاتىرسىڭدار؟ رامازان ايى عوي. وتىرىك اقتالماڭدار! اللا جۇرەكتەرىڭدەگى سىردى بىلەدى. كوبىڭ كرەسلو ءۇشىن، باسشىعا جاعۋ ءۇشىن سالدىردىڭدار! دەنساۋلىق ءۇشىن ەمەس! ءبارىڭنىڭ جۇرەكتەرىڭدە كۇمان بار! كوبىڭ تاۋەكەلگە باردىڭدار. ءوزىڭنىڭ ارتىڭ شىدامادى، ماقۇل. ەندى باسقالاردى زورلاماساڭدارشى! ماعان دايرەكتكە جازىپ جاتقاندار جەتەدى. «امال جوق، جوعارىنىڭ بۇيرىعىمەن، قوقان-لوققىسىمەن سالدىرۋعا ءماجبۇرمىز» دەيدى. ءوز ەركىمەن سالدىرعاندارعا قارسى ايتارىم جوق. بىراق ولاردىڭ سانى از عوي. كوبى امالسىز سالدىرۋدا. مەن ەكپەگە قارسىمىن! بۇگىن «حالىق جاۋى» قىلساڭدار دا وسى پىكىردە قالامىن. قايدا مەنىڭ اتا زاڭىممەن كەپىلدىك بەرىلگەن قۇقىعىم؟»، - دەپ جازدى ول.
"ادىرنا" ۇلتتىق پورتالى
