كەزىندە 66 ملن تەڭگەگە سالىنعان ماڭعىستاۋ وبلىسىنىڭ ءۇش بىردەي اۋىلىنداعى مەديتسينالىق پۋنكت جابىلىپ قالدى. دالىرەك ايتقاندا، 2007 جىلى قولدانىسقا بەرىلگەن عيماراتتاردىڭ يگىلىگىن اۋىلداعى اعايىن مۇلدە كورمەگەن. بۇل تۋرالى “ادىرنا” ۇلتتىق پورتالى ەۋرازيا ءبىرىنشى ارناسىنا سىلتەمە جاساپ حابارلايدى.
بۇل – 100 شاقتى حالقى بار جارما اۋىلى. وسىنداعى مەدپۋنكتتىڭ بۇگىنگى جاعدايى مىنە، وتە ايانىشتى كۇيگە تۇسكەن. عيمارات قاراۋىلسىز، قاراۋسىز قالعان. ەدەنى وپىرىلىپ، قابىرعاسى قاقىراپ، ەسىكتەرى قيراپ جاتىر. ال، ونىڭ قۇرىلىسىنا 2007 جىلى جەرگىلىكتى قازىنادان 22 ملن تەڭگە جۇمسالىپتى. سازدى جانە قياقتى ەلدى مەكەندەرىندە دە دال وسىعان ۇقساس جاعداي. ول جەردەگى عيماراتتار دا جابىلىپ، تىندى. بۇل كۇندە اۋىل جۇرتى ەمدەلۋ ءۇشىن 90 شاقىرىم قاشىقتىقتا جاتقان اۋدان ورتالىعىنا بارۋعا ءماجبۇر. الىسقا قاتىناۋ اسىرەسە، قارت كىسىلەر مەن جۇكتى كەلىنشەكتەرگە قيىن.
تيىن بالمۇرزاەۆا، جارما اۋىلىنىڭ تۇرعىنى:
امبۋلاتوريا قولدانىسقا بەرىلگەلى ونشاقتى جىل بولدى، ءتىپتى ودان دا كوپ جىل. بىراق، ءبىز ونىڭ بالەندەي يگىلىگىن كورىپ وتىرعانىمىز جوق. ول پوستوياننو جابىق تۇرادى. ونىڭ ىشىندە قۇرال-سايمانى، ءدارى-دارمەگى ، ەگەتىن ۋكولدارى بولماعاسىن ونىڭ ىشىندە مەدسەترادا تۇراقتى وتىرا المايدى. ۇلكەن كىسىلەرگە، كىشكەنتاي بالالارعا ،اياعى اۋىر كەلىنشەكتەرگە ودان بولىپ جاتقان كومەك جوق. ولاردىڭ بارلىعى دا سەلكىلدەپ، الىسقا قارا جولمەنەن دارىگەرگە كەتەدى».
اۋدان اتقامىنەرلەرى بۇل ماسەلەگە قانىق . بىراق، قولدان كەلەر قايران جوق دەپ قول قۋسىرىپ وتىر . ويتكەنى شالعاي اۋىلدارعا جاس ماماندار بارمايدى. ال جەرگىلىكتى قازىنانىڭ 66 ميلليون تەڭگەسىنە سالىنعان ءۇش بىردەي مەدپۋنكتتىڭ جابىلۋىن حالىق سانىنىڭ ازدىعىمەن جانە مامانداردىڭ تاپشىلىعىمەن بايلانىستىرادى. كەيىن بۇل نىسانداردى شاعىن بالا-باقشا رەتىندە پايدالانۋعا بەرمەكشى بولىپتى. الايدا، ول ويلارى دا جۇزەگە اسپاعان.
تالعات قىلانوۆ، ماڭعىستاۋ اۋدانى اكىمىنىڭ ورىنباسارى
ونداي ماسەلە بىزدە سازدىدا دا بار، جارمادا ، قياقتى دەگەن جەردە بار. وسىنداي ماسەلە بار. ۇشەۋى دە قاڭىراپ بوس تۇر. 2007 دە سالىنعان كەزىندە. رەسپۋبليكادان اقشا بولىنگەن تولىقتاي بارلىق اۋىلدارعا. ول، كەزدە حالىق سانىن قالاي ەسەپتەدى ول تۋرالى مەن بىلمەيمىن. ول كەزدە مەن بولعان جوقپىن. بەرگى جاقتاعى اۋىلداردا ءوسىم بولماي قالدى. حالىق قالاعا كوشىپ باستالدى. وسپەگەننەن كەيىن پەرسپەكتيۆا بولعان جوق».
ال، وبلىستىق دەنساۋلىق ساقتاۋ باسقارماسىنداعىدار مەدپۋنكتتەردى ۇستاپ تۇرۋ ءۇشىن جانجاقتان مامان تارتپاق بولىپتى، بىراق ودان دا تۇك شىقپاعان.
نۇربول وقۋوۆ ماڭعىستاۋ وبلىستىق دەنساۋلىق ساقتاۋ باسقارماسىنىڭ رەسمي وكىلى
ول جەردە كىنالى تۇلعانى ىزدەۋ قيسىنسىز سياقتى. دەنساۋلىق ساقتاۋ باسقارماسىنىڭ بۇل جەردە ەش قاتىسى جوق. ءبىز مامان تاۋىپ بەرۋگە بارىنشا ىقپال ەتتىك. بىراق حالىق كوشىپ كەتكەنىنە بايلانىستى كوشىپ كەتىپ جاتتى. …….مەدپۋنكتەردى سونىمەن جابىلۋىن بايلانىستىرىپ وتىرمىز».
ەندى اۋدان اكىمدىگى ءۇش بىردەي اۋىلداعى قاڭىراپ قالعان بوس عيماراتتاردى سەنىمگەرلىك جولمەن كاسىپكەرلەرگە جالعا بەرمەكشى. الايدا، وعان ازىرگە ەش سۇرانىس جوق كورىنەدى.
