بالقاش اۋدانىندا بىرنەشە كۇننەن بەرى جانىپ جاتقان قۇرعاق ءشوپ پەن قامىستىڭ ءورت وشاقتارى جويىلدى. بۇل تۋرالى "جەتىسۋ" گازەتى الماتى وبلىسىنىڭ توتەنشە جاعدايلار دەپارتامەنتىنە سىلتەمە جاساپ حابارلادى.
كوكجيدە اۋىلى ماڭىنداعى اقكول اۋىلدىق وكرۋگىندەگى جانۋ وشاعى 2021 جىلدىڭ 16 ساۋىرىندە جەرگىلىكتى ۋاقىتپەن ساعات 20-30-دا (اۋدانى - 30 گا) جويىلدى. ەرتەڭىندە جيدەلى اۋىلدىق وكرۋگىندە جيدەلى اۋىلىنىڭ ماڭىنداعى (اۋدانى 45 گا) جانە ساعات 11-14-تە قاراوي اۋىلدىق وكرۋگىندە (جانۋ الاڭى ناقتىلانۋدا) جانۋ وشاعى جويىلدى.
بالقاش اۋدانىندا ءورتتى سوندىرۋگە الماتى وبلىسى تجد، ورمان شارۋاشىلىعى، "قازاۆياورمانقورعاۋ", جەرگىلىكتى اتقارۋشى ورگاندار، ىلە-بالقاش مەملەكەتتىك تابيعي رەزەرۆاتى جانە ەرىكتى ءورت ءسوندىرۋ قۇرامالارىنىڭ 139 ادامى مەن 20 تەحنيكاسى جۇمىلدىرىلدى.
بىرلەسكەن كۇش-جىگەردىڭ ارقاسىندا ءتىلسىز جاۋ اۋىزدىقتالىپ، ءتورت شارۋا قوجالىعى امان قالدى. ولاردىڭ ۇشەۋى جيدەلى اۋىلدىق وكرۋگىندە جانە بىرەۋى اقكول اۋىلدىق وكرۋگىندە ورنالاسقان. اتالعان وكرۋگ تۇرعىندارى ءورت وشاقتارىن سوندىرۋگە جۇمىلدىرىلعان بارلىق قىزمەتكەرگە ۇلكەن العىستارىن ءبىلدىردى.
قۇرىلعان كوميسسيا ءورتتىڭ جالپى اۋدانىن جانە كەلتىرىلگەن ماتەريالدىق زالالىن ناقتىلاۋدا.
"قازاۆياورمانقورعاۋ" مەن الماتى وبلىسى تجد قىزمەتكەرلەرى جاساعان اەروۆيزۋالدى ۇشۋ كەزىندە كوكتال اۋىلدىق وكرۋگىنىڭ قوسكۇمبەز ۋچاسكەسىندە نەمەسە وزەن اتىراۋىنداعى جەتۋى قيىن، سۋلى-باتپاقتى ارالداردا قامىستىڭ جانۋ وشاقتارى بار ەكەنىن انىقتادى، وندا قانداي دا ءبىر قۇرىلىستار تابىلعان جوق.
ەستەرىڭىزگە سالا كەتەيىك، بالقاش اۋدانىندا ءورت سوندىرۋشىلەر بىرنەشە كۇن بويى جيدەلى، اقكول جانە قاروي اۋىلدىق وكرۋگتەرىندە قۇرعاق ءشوپ پەن قامىستىڭ ءۇش وشاعىن سوندىرگەن ەدى.
