Balqash aýdanynda birneshe kúnnen beri janyp jatqan qurǵaq shóp pen qamystyń órt oshaqtary joıyldy. Bul týraly "Jetisý" gazeti Almaty oblysynyń tótenshe jaǵdaılar departamentine silteme jasap habarlady.
Kókjıde aýyly mańyndaǵy Aqkól aýyldyq okrýgindegi janý oshaǵy 2021 jyldyń 16 sáýirinde jergilikti ýaqytpen saǵat 20-30-da (aýdany - 30 ga) joıyldy. Erteńinde Jıdeli aýyldyq okrýginde Jıdeli aýylynyń mańyndaǵy (aýdany 45 Ga) jáne saǵat 11-14-te Qaraoı aýyldyq okrýginde (janý alańy naqtylanýda) janý oshaǵy joıyldy.
Balqash aýdanynda órtti sóndirýge Almaty oblysy TJD, orman sharýashylyǵy, "Qazavıaormanqorǵaý", jergilikti atqarýshy organdar, Ile-Balqash memlekettik tabıǵı rezervaty jáne erikti órt sóndirý quramalarynyń 139 adamy men 20 tehnıkasy jumyldyryldy.
Birlesken kúsh-jigerdiń arqasynda tilsiz jaý aýyzdyqtalyp, tórt sharýa qojalyǵy aman qaldy. Olardyń úsheýi Jıdeli aýyldyq okrýginde jáne bireýi Aqkól aýyldyq okrýginde ornalasqan. Atalǵan okrýg turǵyndary órt oshaqtaryn sóndirýge jumyldyrylǵan barlyq qyzmetkerge úlken alǵystaryn bildirdi.
Qurylǵan komıssııa órttiń jalpy aýdanyn jáne keltirilgen materıaldyq zalalyn naqtylaýda.
"Qazavıaormanqorǵaý" men Almaty oblysy TJD qyzmetkerleri jasaǵan aerovızýaldy ushý kezinde Kóktal aýyldyq okrýginiń Qoskúmbez ýchaskesinde nemese ózen atyraýyndaǵy jetýi qıyn, sýly-batpaqty araldarda qamystyń janý oshaqtary bar ekenin anyqtady, onda qandaı da bir qurylystar tabylǵan joq.
Esterińizge sala keteıik, Balqash aýdanynda órt sóndirýshiler birneshe kún boıy Jıdeli, Aqkól jáne Qaroı aýyldyq okrýgterinde qurǵaq shóp pen qamystyń úsh oshaǵyn sóndirgen edi.
