رەسەي 22 جىل جالعا العان جەرلەردى قازاقستانعا قايتارىپ جاتىر. قر قورعانىس مينيسترلىگىنىڭ وكىلدەرى بۇل جەرلەردىڭ قانداي ماقساتتا پايدالاناتىنىن ايتىپ بەردى، - دەپ حابارلايدى "ادىرنا كز" kaz.tengrinews.kz پورتالىنا سىلتەمە جاساپ.
ء"بىر جاعىنان پوليگوندى جالعا بەرۋ ءۇشىن تولەنەتىن 717 مىڭ دوللار (جىلىنا - اۆت.) پايدادان قاعىلىپ قالعاندايمىز. ال نەگىزىنەن بۇل جەرلەردى اۋىلشارۋاشىلىعى، پايدالى قازبالاردى بارلاۋ مەن ءوندىرۋ ماقساتىندا پايدالانۋ ەكونوميكالىق تۇرعىدا تيىمدىرەك بولادى دەپ ويلايمىن", - دەيدى قر قورعانىس ءمينيسترىنىڭ ورىنباسارى تالعات مۇحتاروۆ جۋرناليستەرگە.
سونىمەن بىرگە، پوليگون اۋماعىنىڭ ەكولوگيالىق جاعدايىن زەرتتەۋ ءۇشىن ارنايى كوميسسيا قۇرىلعانى ايتىلدى.
"عارىشتان ءتۇسىرىلىم جاسالدى، پوليگون اۋماعى اۋەدەن بارلاندى، جەردىڭ قۇرامى ساراپتاماعا جىبەرىلدى. ساراپتاما قورىتىندىسى ادامدار مەن جانۋارلار، جالپى ەكولوگياعا ەشقانداي زيان جوعى انىقتالدى", - دەپ اتاپ ءوتتى مۇحتاروۆ.
ەسكە سالايىق، رەسەي 22 جىلعا جالعا العان اقتوبە وبلىسىنداعى 300 مىڭ گەكتارلىق ەمبى پوليگونىن قايتارادى. جالعا الۋ كەلىسىمىنىڭ مەرزىمى 2017 جىلدىڭ 1 قاڭتارىندا اياقتالدى. مۇنىڭ الدىندا رەسەي قازاقستانعا پوليگون اۋماعىنداعى جىلجىمالى جانە جىلجىمايتىن مۇلىكتى قايتارعان بولاتىن. سونىڭ ىشىندە كازارمالىق 15 عيمارات بار.
"ادىرنا". كز
