وسكەمەن قالاسىندا كوپقاباتتى تۇرعىن ءۇيدىڭ تۇرعىندارى قاۋىپسىز جەرگە شىعارىلدى، دەپ حابارلادى Altaynews.kz.
تۇرعىندار گاز ءيىسىنىڭ قاتتى سەزىلۋىنە بايلانىستى قۇتقارۋشىلاردان كومەك سۇرادى. وقيعا ورنىنا كەلگەن شقو توتەنشە جاعدايلار دەپارتامەنتىنىڭ قىزمەتكەرلەرى قاۋىپسىزدىك ماقساتىندا جەدەل تۇردە 40 ازاماتتى، ونىڭ ىشىندە 9 بالانى ەۆاكۋاتسيالادى.
ءۇيدى تەكسەرگەننەن كەيىن قۇتقارۋشىلار ءۇيدىڭ جەرتولەسىنەن 3 وتتەگى مەن 3 گاز باللونىن الىپ شىقتى.
ءورت قاۋىپسىزدىگى ەرەجەلەرىن بۇزعانى ءۇشىن ۇيگە قىزمەت كورسەتەتىن ۇيىمنىڭ قىزمەتكەرى اكىمشىلىك جاۋاپكەرشىلىككە تارتىلدى.
"قۇتقارۋشىلار جەرتولەنى جەلدەتىپ، قاۋىپ سەيىلگەنىنە كوز جەتكىزگەن سوڭ تۇرعىندارعا پاتەرلەرىنە ورالۋعا رۇقسات بەردى. تجد ءورت قاۋىپسىزدىگى ەرەجەلەرىن بۇزعانى ءۇشىن جاۋاپكەرشىلىك كوزدەلگەنىن ەسكە سالادى، - دەپ حابارلادى دەپارتامەنتتىڭ ءباسپاسوز قىزمەتى.
ايتا كەتەيىك، گاز باللوندارىن تۇرعىن ۇيلەردىڭ جەرتولە ءۇي-جايلارىندا ساقتاۋعا قاتاڭ تىيىم سالىنادى. توتەنشە جاعداي تۋىنداعان كەزدە 112 نومىرىنە حابارلاسۋ كەرەك.
