«قۇراندى بەرمەدى»: ناۆالنىي تۇزەتۋ كولونياسىن سوتقا بەردى

1890

رەسەيدە قاماۋدا وتىرعان وپپوزيتسيالىق ساياساتكەر الەكسەي ناۆالنىي تۇزەتۋ مەكەمەسىنىڭ مۇسىلماندار ءۇشىن قاسيەتتى كىتاپ سانالاتىن قۇراندى وقۋعا بەرمەگەنى ءۇشىن كولونيانى سوتقا بەردى. سەيسەنبى كۇنى ونىڭ ينستاگرامداعى پاراقشاسىندا سول تۋرالى حابارلاما جاريالاندى، دەپ حابارلايدى ادىرنا ۇلتتىق پورتالى azattyq.org سايتىنا سىلتەمە جاساپ.

«ماعان قۇران كىتابىمدى بەرمەي جاتىر. جىنىڭا تيەدى. مەنى جاڭادان تۇرمەگە وتىرعىزعان كەزدە ءوز-ءوزىمدى دامىتۋ ءۇشىن ءتىزىم قۇراستىرعانمىن. سونداعى پۋنكتەردىڭ ءبىرى: قۇران مەن پايعامبار سۇننەتىن تەرەڭ زەرتتەپ، ءتۇسىنۋ بولاتىن» دەپ جازدى ناۆالنىي.

ول جازبادا يسلامدى ءتۇسىنىپ قانا قويماي، قۇراندى جاتتاۋعا دا بەكىنگەنىن جەتكىزگەن. بىراق ساياساتكەردىڭ ايتۋىنشا، №2 پوكروۆ كولونياسى اكىمشىلىگى سوتتالۋشىلارعا كىتاپ بەرمەيدى، ءتىپتى وزىمەن اكەلگەن كىتاپتاردى دا الۋ قيىننىڭ قيىنى. رەسەيلىك اقپارات قۇرالدارىنىڭ جازۋىنشا، بۇعان دەيىن ول ءۇش اپتا ىشىندە بيبلياعا ارەڭ قول جەتكىزگەن. جازباعا قاراعاندا ناۆالنىي ۇستالعان كەزدە وزىمەن بىرگە اكەلگەن كىتاپتار اراسىندا قۇران دا بولعان.

«مىنە، تۇرمە باستىعىنا كەزەكتى ارىز جازىپ، سوتقا بەردىم. قانشا ۋاقىت شىداۋعا بولادى؟ ماعان ەندى قۇران وقۋعا دا بولماي ما نە؟ ونىڭ ۇستىنە اشتىق جاريالاعانىما 13 كۇن بولدى، فيلوسوفيالىق كوڭىل كۇيدە ءجۇرمىن» دەدى ول.

دەگەنمەن رەسەيدىڭ اقپارات قۇرالدارى ازىرگە سوت سايتىنان ناۆالنىيدىڭ شاعىمىن تابا الماعان.

- 2 اقپاندا ماسكەۋدىڭ سيمونوۆ سوتى الەكسەي ناۆالنىيدى 2013 جىلى «يۆ روشە ءىسى» بويىنشا شىققان شارتتى جازا ەرەجەلەرىن ورىندامادى دەپ ساياساتكەردى تۇرمەگە جىبەرگەن. ەۋروپانىڭ ادام قۇقىعى جونىندەگى سوتى ءىستىڭ ساياسيلانعانىن ايتقان. وپپوزيتسيونەر تۇرمەدە شامامەن 2,5 جىل بولادى. ​

- ناۋرىز ايىنىڭ ورتاسىندا ناۆالنىي بەلى مەن اياعىنىڭ اۋىراتىنىنا شاعىمدانعان. 31 ناۋرىزدا وزىنە قاجەتتى دارەجەدە مەديتسينالىق كومەك كورسەتىلمەي جاتقانىن مالىمدەپ، اشتىق جاريالاعان. كومپيۋتەر توموگرافياسى ونىڭ ومىرتقا ديسكىسىندە «گرىجا» بارىن كورسەتكەن. وسىعان دەيىن ساياساتكەر «رەسپيراتورلىق اۋرۋ بەلگىلەرىمەن» تۇرمەنىڭ مەديتسينالىق بولىمىنە جاتقىزىلعان. ول ادۆوكاتتارىنا وتريادتاعى 15 ادامنىڭ ۇشەۋىنەن تۇبىركۇلەز انىقتالىپ، اۋرۋحاناعا تۇسكەنىن حابارلاعان. ال تۇرمە دارىگەرلەرى ناۆالنىيدىڭ ءوزى دە قاتتى جوتەلىپ، دەنە قىزۋى جوعارى بولعانىن ايتقان.

- ناۋرىز ايىنىڭ سوڭىندا مىڭنان استام دارىگەر بيلىككە اشىق حات جازىپ، ساياساتكەرگە تاۋەلسىز دارىگەردى كىرگىزۋگە شاقىرعان.

- فەدەرالدىق قىلمىستىق جازانى ورىنداۋ كوميتەتى (فسين) وعان كومەك كورسەتىلىپ جاتقانىن العا تارتادى.

پىكىرلەر
رەداكتسيا تاڭداۋى