Reseıde qamaýda otyrǵan oppozıııalyq saıasatker Alekseı Navalnyı túzetý mekemesiniń musylmandar úshin qasıetti kitap sanalatyn Qurandy oqýǵa bermegeni úshin kolonııany sotqa berdi. Seısenbi kúni onyń Instagramdaǵy paraqshasynda sol týraly habarlama jarııalandy, dep habarlaıdy Adyrna ulttyq portaly azattyq.org saıtyna silteme jasap.
«Maǵan Quran kitabymdy bermeı jatyr. Jynyńa tıedi. Meni jańadan túrmege otyrǵyzǵan kezde óz-ózimdi damytý úshin tizim qurastyrǵanmyn. Sondaǵy pýnkterdiń biri: Quran men Paıǵambar Súnnetin tereń zerttep, túsiný bolatyn» dep jazdy Navalnyı.
Ol jazbada ıslamdy túsinip qana qoımaı, Qurandy jattaýǵa da bekingenin jetkizgen. Biraq saıasatkerdiń aıtýynsha, №2 Pokrov kolonııasy ákimshiligi sottalýshylarǵa kitap bermeıdi, tipti ózimen ákelgen kitaptardy da alý qıynnyń qıyny. Reseılik aqparat quraldarynyń jazýynsha, buǵan deıin ol úsh apta ishinde Bıblııaǵa áreń qol jetkizgen. Jazbaǵa qaraǵanda Navalnyı ustalǵan kezde ózimen birge ákelgen kitaptar arasynda Quran da bolǵan.
«Mine, túrme bastyǵyna kezekti aryz jazyp, sotqa berdim. Qansha ýaqyt shydaýǵa bolady? Maǵan endi Quran oqýǵa da bolmaı ma ne? Onyń ústine ashtyq jarııalaǵanyma 13 kún boldy, fılosofııalyq kóńil kúıde júrmin» dedi ol.
Degenmen Reseıdiń aqparat quraldary ázirge sot saıtynan Navalnyıdyń shaǵymyn taba almaǵan.
- 2 aqpanda Máskeýdiń Sımonov soty Alekseı Navalnyıdy 2013 jyly «Iv Roshe isi» boıynsha shyqqan shartty jaza erejelerin oryndamady dep saıasatkerdi túrmege jibergen. Eýropanyń Adam quqyǵy jónindegi soty istiń saıasılanǵanyn aıtqan. Oppozııoner túrmede shamamen 2,5 jyl bolady.
- Naýryz aıynyń ortasynda Navalnyı beli men aıaǵynyń aýyratynyna shaǵymdanǵan. 31 naýryzda ózine qajetti dárejede medıınalyq kómek kórsetilmeı jatqanyn málimdep, ashtyq jarııalaǵan. Kompıýter tomografııasy onyń omyrtqa dıskisinde «gryja» baryn kórsetken. Osyǵan deıin saıasatker «respıratorlyq aýrý belgilerimen» túrmeniń medıınalyq bólimine jatqyzylǵan. Ol advokattaryna otrıadtaǵy 15 adamnyń úsheýinen túbirkúlez anyqtalyp, aýrýhanaǵa túskenin habarlaǵan. Al túrme dárigerleri Navalnyıdyń ózi de qatty jótelip, dene qyzýy joǵary bolǵanyn aıtqan.
- Naýryz aıynyń sońynda myńnan astam dáriger bılikke ashyq hat jazyp, saıasatkerge táýelsiz dárigerdi kirgizýge shaqyrǵan.
- Federaldyq qylmystyq jazany oryndaý komıteti (FSIN) oǵan kómek kórsetilip jatqanyn alǵa tartady.
