1961 جىلدىڭ 12 ساۋىرىندە عارىشقا اعا لەيتەنانت شەنىندە ۇشىپ، مايور شەنىمەن جەرگە قايتىپ ورالعان يۋري گاگاريننىڭ عارىش ساپارىنا وراي بۇگىن الەۋمەتتىك جەلىدە ءتۇرلى ماتەريالدار جاريالانىپ جاتىر ەكەن.
ال ءبىزدىڭ قازاق حالقىنىڭ تۇڭعىش عارىشكەرى توقتار باتىرىمىز عوي. قىران قازاق توقتار اۋباكىروۆتىڭ عارىشقا سامعاۋ ءساتىن كوزىممەن كورۋ باقىتى بۇيىرعان ەدى ماعان.
ءالى ەسىمدە، 1991 جىلدىڭ 2-ءشى قازانى ەدى. قازاق حالقىنىڭ اتىنان بايقوڭىر كوسمودرومىنان عارىشقا قانات قاققان توقتار اۋباكىروۆ اعامىزدىڭ ۇشۋ ءساتىن كورۋ ءۇشىن ارنايى شاقىرىلعان قازاقستاندىق جۋرناليستەر قۇرامىنا «ورتالىق قازاقستان» گازەتىنىڭ رەداكتسياسى اتىنان قاتىستىم.
سول تاريحي وقيعا تۋرالى «ورتالىق قازاقستان» گازەتىنىڭ ەكى سانىندا «سۇڭقاردىڭ سامعاۋ ءساتى» دەپ اتالاتىن دەرەكتى رەپورتاجىم جاريالاندى.
توقاڭ ءبىر ايدان كەيىن جۇلدىزدى قالاشىقتان ەلگە كەلدى. قاراعاندى اۋەجايى باسىنان كۇتىپ الدىق تا، باتىردىڭ كىندىك قانى تامعان قارقارالى اۋدانىنا تارتىپ كەتتىك.
باتىردىڭ بۇل ساپارى جايلى رەپورتاجدارىم «ورتالىق قازاقستان» گازەتىندە ءبىر اپتا بويى كۇن قۇرعاتپاي جاريالانىپ تۇردى.
بۇل جۋرناليستىك ەڭبەك جولىمداعى جارقىن ساتتەردىڭ ءبىرى رەتىندە جادىمدا ساقتالىپ قالدى.
توقتار باتىردىڭ عارىشقا قانات قاققان كۇنىندە جانە ءبىر ايدان كەيىن ەلگە قايتىپ ورالعان ساپارىندا تۇسىرىلگەن فوتوسۋرەتتەردى جەكە مۇراعاتىمنان الىپ، جۇرتشىلىق نازارىنا ۇسىنۋدى ءجون كوردىم.
تولەۋباي ەرمەكباەۆ
