ۇكىمەت مۇشەلەرى ەكى ءوڭىر اكىمى ورىنباسارىنا ازىق-تۇلىك باعاسى ءۇشىن قاتاڭ سوگىس جاريالاۋدى ۇسىندى، - دەپ حابارلايدى "ادىرنا" ۇلتتىق پورتالى Tengrinews.kz سايتىنا سىلتەمە جاساپ.
ساۋدا جانە ينتەگراتسيا ءمينيسترى باقىت سۇلتانوۆ جىل باسىنان بەرى الەۋمەتتىك ماڭىزى بار ازىق-تۇلىك 3,2 پايىزعا قىمباتتاعانىن ايتتى. بۇل رەتتە بىلتىر باعا 4,8 پايىزعا وسكەن، ونىڭ 4,1 پايىزى كارانتين سالدارىنان بولعان. ءمينيستردىڭ ايتۋىنشا، شارالار قابىلداۋ ناتيجەسىندە باعا تۇراقتاندىرىلعان.
"سوڭعى ءۇش اپتادا باعا 0,2 پايىزعا ارتتى، بىلتىر باعا 3,5 پايىزعا وسكەن. (...) سونىمەن قاتار، كەيبىر وڭىرلەردە جوعارى ءوسىم بايقالادى. 6 ساۋىردەگى جاعداي بويىنشا ەڭ جوعارعى باعا جامبىل وبلىسىندا - 4,2 پايىز، اتىراۋ وبلىسىندا - 3,8 پايىز، ەڭ از ءوسىم 2,9 پايىز - شقو مەن اقمولا وبلىسىندا تىركەلگەن.
مەملەكەت باسشىسىنىڭ تاپسىرماسى بويىنشا اتقارۋشى ورگانداردىڭ ماڭىزدى كورسەتكىشى باعانىڭ وسۋىنە جول بەرمەۋ. وسىعان بايلانىستى اسقار ۇزاقبايۇلىنا حاتتامادا: باعانىڭ بارىنشا وسۋىنە جول بەرگەن اكىمدەردىڭ جەتەكشىلىك ەتەتىن ورىنباسارىنا تارتىپتىك شارالار قولدانۋدى بەكىتۋدى ۇسىنامىن", - دەدى سۇلتانوۆ ۇكىمەت وتىرىسىندا.
سونداي-اق، ول باسەكەلەستىكتى قورعاۋ جانە دامىتۋ اگەنتتىگىنە باسىم بيزنەس سۋبەكتىلەرىنىڭ باعالىق ءسوز بايلاسۋىنا جول بەرمەۋدى تۇراقتى باقىلاۋدا ۇستاۋدى، ورتالىق جانە جەرگىلىكتى مەملەكەتتىك ورگاندارعا باقىلاۋدى كۇشەيتۋدى جانە الەۋمەتتىك ماڭىزى بار تاۋارلارعا، اسىرەسە ەكسپورتقا تاۋەلدى جانە ەكسپورتقا باعدارلانعان ونىمدەرگە باعانىڭ وسۋىنە جول بەرمەۋ بويىنشا ءتيىستى شارا قولدانۋدى ۇسىندى.
پرەمەر-ءمينيستردىڭ ءبىرىنشى ورىنباسارى ءاليحان سمايىلوۆ قاي وڭىرلەر اكىمىنىڭ ورىنباسارىنا قاتاڭ سوگىس جاريالاۋ كەرەكتىگىن ناقتىلادى.
"اتىراۋ، جامبىل وبلىستارىندا الەۋمەتتىك ماڭىزى بار تاۋارلار قىمباتتاعانىن كوردىك. سوندىقتان وسى وڭىرلەر اكىمىنىڭ ورىنباسارىنا قاتاڭ سوگىس جاريالاۋ كەرەك. بۇل وبلىس اكىمدەرىنە تاپسىرما.
سونداي-اق، جەرگىلىكتى بيۋدجەت كىرىسى مولشەرىنىڭ كوبەيگەنىن بايقايمىز. وسىعان بايلانىستى جەرگىلىكتى اتقارۋشى ورگاندار پروبلەمالاردى انىقتاپ، ولاردى جەرگىلىكتى بيۋدجەت ەسەبىنەن جابۋى ءتيىس. جاعدايدىڭ تۇراقتانۋى جۇمىسقا ەشقانداي اسەر ەتپەۋى كەرەك", - دەدى سمايىلوۆ.
پرەمەر-مينيستر اسقار مامين اتىراۋ جانە جامبىل وبلىستارى اكىمىنىڭ ورىنباسارىنا الەۋمەتتىك ماڭىزى بار تاۋارلار باعاسىنىڭ نەگىزسىز وسۋىنە جول بەرگەنى ءۇشىن قاتاڭ سوگىس جاريالاۋ ۇسىنىسىن قولدادى.
