قازاقستان اسكەرى بىتىمگەرلىك ميسسيامەن الەمنىڭ ءبىراز ەلىندە ءوز بورىشىن وتەۋدە. العاش رەت بىتىمگەرلىك كۇشتەرى رەتىندە 1992 جىلى 10 قىركۇيەكتە قازاقستاندىق 300 سارباز تاجىكستانعا اتتاندى. ارتىنشا ولاردىڭ سانى ارتىپ، 2000 جىلعا دەيىن 10500 سارباز تاجىكستانداعى بىتىمگەرلىك ميسسياسىن اتقاردى. ءدال وسى ەلدەگى سوعىستان كەيىن قازاقستاننىڭ بتىمگەرلىك كۇشتەرىنە "قازبات" باتالونى جاساقتالدى. كەيىننەن قازاقستاننىڭ بىتىمگەرلىك كۇشتەرى يراكتى مينادان تازارتتى، افريكا ەلدەرىندە بەيبىتشىلىكتى ساقتاۋعا اتسالىستى، قازىر ليۆان مەن باتىس ساحارادا تىنىشتىق رەجيمىن بۇزباۋ ماقساتىنداعى ميسسيالارعا قاتىسۋدا.
1995 جىلى، 7 ساۋىردە تاۋەلسىز قازاقستان تاريحىنداعى ۇرىس بارىسىندا ەڭ ۇلكەن اسكەري شىعىنعا ۇشىرادىق. قازاقستاننىڭ بىتىمگەرلىك كۇشتەرى تاجىكستانداعى ارنايى ميسسيا بارىسىندا، تاجىك-اۋعان شەكاراسىنداعى پشيحاۆر تاۋ شاتقالىندا قورشاۋدا قالىپ، قيان-كەسكى ۇرىس جۇرگىزدى. ءبىزدىڭ جاۋىنگەرلەر قارشا بوراعان وق پەن جەردى سىلكىندىرە جارىلعان گراناتا، گراناتومەتتەرگە قاراماستان، سانى ونداعان ەسە كوپ سودىرلارمەن 5 ساعات ايقاستى. 5 ساعاتتان كەيىن رەسەي ساربازدارى كومەككە كەلدى. قازاقستان بىتىمگەرلىك كۇشتەرى تاراپىنان 17 سارباز قازا تاۋىپ، 33 جاۋىنگەر اۋىر جارالاندى. رەسەي تاراپىنان 70-تەن استام سارباز وققا ۇشتى. سودىرلاردىڭ شىعىنى بىرنەشە جۇزگە جەتەدى.
قازا تاپقان، ۇرىسقا قاتىسقان جاۋىنگەرلەردىڭ بارلىعى دەرلىك جوعارى اسكەري ماراپاتتارعا يە بولدى. كومەككە كەلگەن رەسەي تىكۇشاعىنىڭ ءبىر ۇشقىشى وقيعا جايلى كەيىننەن بىلاي دەپ پىكىر ءبىلدىردى: "مەن ۇشىپ كەلگەندە، تومەندە از عانا توپتىڭ سانى بىرنەشە جۇزگە جەتەتىن سودىرلارمەن قيان-كەسكى ۇرىس جۇرگىزىپ، جان اياماي سوعىسىپ جاتقانىن كوردىم". اتالمىش ۇرىس جايلى 2019 جىلى "قازبات" ءفيلمى ءتۇسىرىلىپ، كوكرەرمەندەر نازارىنا ۇسىنىلدى.
تاجىكستانداعى بىتىمگەرلىك ميسسياسىن اتقارۋ بارىسىندا جالپى جيىنتىعى 54 قازاقستاندىق قازا تاۋىپ، ءىز ءتۇسسىز جوعالىپ كەتتى.
اسحات قاسەنعالي،
"ادىرنا" ۇلتتىق پورتالى
